Maagizo kumi ya Mungu.

¹Mose akawapazia sauti Waisiraeli wote, akawaambia: Sikieni, Waisiraeli, maongozi na maamuzi, mimi ninayoyasema leo masikioni mwenu, mjifundishe na kuyaangalia, mpate kuyafanya!

²Bwana Mungu wetu alifanya Agano na sisi kule Horebu;[#2 Mose 19:5; 5 Mose 29:1.]

³Agano hilo Bwana hakulifanya na baba zetu, ila na sisi wenyewe tuliopo leo hapa sote wenye uzima.[#5 Mose 29:14-15.]

⁴Huko mlimani Bwana alisema nasi uso kwa uso toka motoni.[#2 Mose 19:19; 5 Mose 5:24.]

⁵Siku hiyo mimi nilisimama katikati ya Bwana nanyi, niwatangazie Neno la Bwana, kwani mliuogopa ule moto, kwa hiyo hamkupanda mlimani; naye alisema:[#2 Mose 19:16.]

⁶Mimi ndimi Bwana Mungu wako niliyekutoa katika nchi ya Misri nyumbani, mlimokuwa watumwa.

⁷Usiwe na miungu mingine ila mimi![#5 Mose 11:16,28.]

⁸Usijifanyie kinyago, wala mfano wo wote wa vitu vilivyoko mbinguni juu, wala vilivyoko nchini chini, wala vilivyomo majini chini ya nchi![#5 Mose 27:15.]

⁹Usivitambikie, wala usivitumikie! Kwani mimi Bwana Mungu wako ni Mungu mwenye wivu; manza za baba nitazipatilizia wana, nikifikishe kizazi cha tatu na cha nne, kwao wanichukiao.

¹⁰Lakini nitawafanyizia mema, nikifikishe hata kizazi cha maelfu, kwao wanipendao na kuyashika maagizo yangu.

¹¹Usilitaje Jina la Bwana Mungu wako bure! Kwani Bwana hatamwachilia alitajaye Jina lake bure.

¹²Ishike siku ya mapumziko kuitakasa, kama Bwana Mungu wako alivyokuagiza!

¹³Siku sita sharti ufanye kazi, uyamalize mambo yako yote!

¹⁴Lakini siku ya saba ndiyo ya kumpumzikia Bwana Mungu wako. Hapo usifanye kazi yo yote, wala wewe, wala mwanao wa kiume, wala wa kike, wala mtumishi wako wa kiume, wala wa kike, wala ng'ombe wako wala punda wako wala nyama wako ye yote wa kufuga, wala mgeni wako aliomo malangoni mwako, mtumishi wako wa kiume na wa kike apate kupumzika kama wewe!

¹⁵Sharti ukumbuke, ya kama ulikuwa mtumwa katika nchi ya Misri, naye Bwana Mungu wako akakutoa huko kwa kutoa nguvu za kiganja chake na kwa kuukunjua mkono wake; kwa hiyo Bwana Mungu wako alikuagiza kuifanya siku ya mapumziko.[#5 Mose 15:15; 16:12; 24:18.]

¹⁶Mheshimu baba yako na mama yako, kama Bwana Mungu wako alivyokuagiza, siku zako zipate kuwa nyingi, nawe upate kuona mema katika nchi, akupayo Bwana Mungu wako!

¹⁷Usiue!

¹⁸Usizini!

¹⁹Usiibe!

²⁰Usimshuhudie mwenzio uwongo!

²¹Usimtamani mke wa mwenzio!

Wala usiitamani nyumba ya mwenzio, wala shamba lake,

wala mtumishi wake wa kiume, wala wa kike,

wala ng'ombe wake, wala punda wake, wala cho chote,

mwenzio alicho nacho!

²²Maneno haya Bwana aliwaambia wao wote wa mkutano wenu kule mlimani kwa sauti kuu toka motoni mle winguni mwenye weusi, hakuongeza neno, kisha akayaandika katika mbao mbili za mawe, akanipa mimi.[#2 Mose 31:18.]

²³Ikawa, mlipoisikia sauti toka gizani, nao mlima ulipowaka moto, mkanikaribia ninyi mliokuwa vichwa vya mashina yenu na wazee wenu,

²⁴mkasema: Tazama, Bwana Mungu wetu ametuonyesha utukufu na ukuu wake, tukaisikia nayo sauti yake toka motoni, siku hii ya leo tumeona, ya kuwa Bwana anasema na mtu, naye hafi.[#5 Mose 4:33.]

²⁵Sasa mbona tufe, moto huu mkubwa ukitula? Tukiendelea kuisikia tena sauti ya Bwana Mungu wetu hatuna budi kufa.

²⁶Kwani yuko wapi mwingine mwenye mwili, ndiye aisikie kama sisi sauti ya Mungu Mwenye uzima, akisema toka motoni, kisha awepo mwenye uzima?

²⁷Nenda wewe, uyasikilize yote, Bwana Mungu wetu atakayoyasema, kisha wewe tuambie yote, Bwama Mungu wetu aliyoyasema! Nasi tutakapoyasikia tutayafanya.

²⁸Bwana alipozisikia sauti za maneno yenu, mliyoniambia, yeye Bwana akaniambia: Nimezisikia sauti za maneno ya watu hawa, waliyokuambia, hayo yote waliyoyasema ni mema.

²⁹Laiti wangekuwa siku zote wenye mioyo inayoniogopa hivyo, wayaangalie maagizo yangu yote, wao na wana wao wapate kuona mema kale na kale![#4 Mose 11:29; 5 Mose 29:4.]

³⁰Nenda, uwaambie: Rudini tu mahemani mwenu!

³¹Lakini wewe uje hapa kusimama kwangu, nikuambie maagizo na maongozi na maamuzi yote, utakayowafundisha, wayafanye katika nchi hiyo, mimi nitakayowapa, waichukue, iwe yao.

³²Kwa hiyo angalieni, mfanye, kama Bwana Mungu wenu alivyowaagiza ninyi, msiondoke kwake kwenda wala kuumeni wala kushotoni![#5 Mose 4:2; 28:14; Yos. 1:7; Fano. 4:27.]

³³Ila njia zote, Bwana Mungu wenu alizowaagiza ninyi, zishikeni na kuzifuata, mkae uzimani na kuona mema, nazo siku zenu ziwe nyingi katika nchi, mnayokwenda kuichukua, iwe yenu.