Maelezo ya Agano la kwanza.

¹Nayo haya ndiyo maagizo na maongozi na maamuzi, Bwana Mungu wenu aliyoniagiza, niwafundishe ninyi, mpate kuyafanya katika nchi, mnayoivukia kuichukua, iwe yenu.

²Sharti umwogope Bwana Mungu wako, uyaangalie maongozi na maagizo yake yote, ninayokuagiza, wewe na wanao na wana wa wanao siku zote za maisha yako, kusudi siku zako zipate kuwa nyingi.

³Isiraeli, yasikie na kuyaangalia, uyafanye, kusudi uone mema, nanyi mpate kuwa wengi sana, kama Bwana Mungu wa baba zako alivyokuagia kukupa nchi ichuruzikayo maziwa na asali.

⁴*Sikia, Isiraeli: Bwana Mungu wetu ni Bwana peke yake.[#Mar. 12:29; 1 Kor. 8:4,6.]

⁵Nawe umpende Bwana Mungu wako kwa moyo wako wote na kwa roho yako yote na kwa nguvu yako yote.[#5 Mose 10:12; Mat. 22:37.]

⁶Maneno haya, ninayokuagiza leo, sharti yawe moyoni mwako.[#5 Mose 11:18-20.]

⁷Jikaze kuwafundisha watoto wako na kuyasema nao ukikaa nyumbani mwako, ukienda safari zako, ukitaka kulala, hata ukiamka![#1 Mose 18:19.]

⁸Yafunge mkononi pako kuwa kielekezo, yawe napo pajini pako katikati ya macho yako![#2 Mose 13:9.]

⁹Yaandike vizingitini namo milangoni nyumbani mwako!

¹⁰Hapo Bwana Mungu wako atakapokuingiza katika hiyo nchi, aliyowaapia baba zako Aburahamu na Isaka na Yakobo, kwamba akupe wewe miji mikubwa mizuri, usiyoijenga,

¹¹na nyumba zijaazo mema yote, usizozijaza, na visima vilivyochimbuliwa, usivyovichimbua, na mizabibu na michekele, usiyoipanda, basi, hapo utakapoila na kushiba,[#5 Mose 8:10.]

¹²jiangalie, usimsahau Bwana aliyekutoa katika nchi ya Misri nyumbani, mlimokuwa watumwa!

¹³Mwogope Bwana Mungu wako na kumtumikia yeye! Hapo utakapoapa litaje Jina lake!*[#5 Mose 10:20; Mat. 4:10.]

¹⁴Msifuate miungu mingine miongoni mwa miungu ya makabila yanayowazunguka!

¹⁵Kwani Bwana Mungu wako anayekaa katikati yako ni Mungu mwenye wivu; angalia, makali yake Bwana Mungu wako yasikuwakie, akakuangamiza, utoweke juu ya nchi.[#2 Mose 20:5.]

¹⁶Msimjaribu Bwana Mungu wenu, kama mlivyomjaribu kule Masa.[#2 Mose 17:2,7; Mat. 4:7.]

¹⁷Yaangalieni sana maagizo ya Bwana Mungu wenu na mashuhuda yake na maongozi yake, aliyoyaagiza!

¹⁸Yafanye yaongokayo nayo yafaayo machoni pake Bwana, kusudi uone mema, upate kuingia katika hiyo nchi njema, Bwana aliyowaapia baba zako, uichukue, iwe yako.

¹⁹Naye na akupe kuwakimbiza adui zako wote mbele yako, kama Bwana alivyosema.[#2 Mose 23:27-28.]

²⁰Mwanao atakapokuuliza siku zijazo kesho kwamba: Nini maana yao haya mashuhuda na maongozi na maamuzi, Bwana Mungu wetu aliyowaagiza ninyi?[#2 Mose 13:14.]

²¹ndipo umwambie mwanao: Sisi tulikuwa watumwa wa Farao kule Misri, lakini Bwana akatutoa Misri kwa mkono wake wenye nguvu,

²²Bwana alipofanya machoni petu kule Misri vielekezo na vioja vikubwa vilivyomwogopesha Farao na mlango wake wote.

²³Ndivyo, alivyotutoa huko na kutuleta huku, atupe nchi hii, aliyowaapia baba zenu.

²⁴Ndipo, Bwana alipotuagiza kuyafanya haya maongozi yote kwa kumcha Bwana Mungu wetu, tuone mema siku zote za maisha yetu, kama inavyoelekea leo.

²⁵Nao wongofu wetu ndio huu wa kujiangalia, tuyafanye haya maagizo yote mbele ya Bwana Mungu wetu, kama alivyotuagiza.