Waisiraeli wanahimizwa kumshukuru Mungu.

¹Maagizo yote, mimi ninayokuagiza leo, sharti myaangalie, myafanye, mpate kupona na kuwa wengi na kuiingia hiyo nchi, Bwana aliyowaapia baba zenu, mwichukue, iwe yenu.[#5 Mose 13:3; Amu. 2:22.]

²Zikumbuke njia zote, Bwana Mungu wako alizokuendesha nyikani hii miaka 40, akunyenyekeze na kukujaribu, ayajue yaliyomo moyoni mwako, kama utayaangalia maagizo yake, au kama utayakataa.

³Akakunyenyekeza na kukutia njaa, lakini kisha akakulisha Mana, usizozijua wewe, wala baba zako hawakuzijua, akajulisha, ya kama mtu hataishi kwa chakula tu, ila kwa kila neno linalotoka kinywani mwa Bwana.[#2 Mose 16:13-15; Mat. 4:4.]

⁴Nguo zako hazikuchakaa mwilini pako, wala miguu yako haikuvimba hii miaka 40.[#5 Mose 29:5.]

⁵Hapo ujue moyoni mwako, ya kuwa Bwana Mungu wako anakuchapa, kama mtu anavyomchapa mwanawe.[#5 Mose 1:31.]

⁶Kwa hiyo yaangalie maagizo ya Bwana Mungu wako, upate kuzishika njia zake na kumcha.

⁷Kwani Bwana Mungu wako ndiye atakayekuingiza katika nchi hiyo njema iliyo nchi yenye vijito na visima na viziwa vya maji yatokeayo mabondeni na vilimani.

⁸Ni nchi yenye ngano na mawele na mizabibu na mikuyu na mikomamanga, ni nchi yenye michekele iletayo mafuta, nazo asali ziko.

⁹Ni nchi, utakakokula chakula na kushiba sana, kwani hutakosa cho chote; ni nchi yenye mawe ya chuma, nazo shaba utazichimbua ndani ya milima yake.

¹⁰Kwa hiyo utakapokula na kushiba sharti umtukuze Bwana Mungu wako kwa ajili ya nchi hiyo njema, aliyokupa.

¹¹Jiangalie, usimsahau Bwana Mungu wako, ukiacha kuyaangalia maagizo yake na maamuzi yake na maongozi yake, mimi ninayokuagiza leo.

¹²Hapo, utakapokula na kushiba, tena utakapojenga nyumba nzuri na kukaa humo,

¹³tena ng'ombe na mbuzi na kondoo wako watakapokuwa wengi, nazo fedha na dhahabu zako zitakapokuwa nyingi, nazo mali zako zote zitakapokuwa nyingi,

¹⁴jiangalie, moyo wako usijikuze, ukamsahau Bwana Mungu wako aliyekutoa katika nchi ya Misri nyumbani, mlimokuwa watumwa!

¹⁵Naye ndiye aliyekuongoza katika ile nyika kubwa inayoogopesha sana kwa nyoka za moto na kwa nge walioko na kwa kiu iliyoko nyingi, kwa kuwa hakuna maji; lakini yeye alikutolea maji katika mwamba mgumu sana.[#4 Mose 21:6; 2 Mose 17:6.]

¹⁶Akakulisha nyikani Mana, baba zako wasizozijua, akunyenyekeze na kukujaribu, apate kukufanyizia mema, yawe ya mwisho ya kukupa.

¹⁷kama sivyo, ungalisema moyoni mwako: Nguvu zangu na uwezo wa mikono yangu ndizo zilizonipatia mali hizi.

¹⁸Mkumbuke Bwana Mungu wako, kwani yeye ndiye anayekupa nguvu za kujipatia mali, alishikize Agano lake, alilowaapia baba zako, kama inavyoelekea leo.[#5 Mose 4:31.]

¹⁹Lakini itakapokuwa, umsahau Bwana Mungu wako na kufuata miungu mingine, uitumikie na kuitambikia, ninawashuhudia leo, ya kuwa mtaangamia kabisa.

²⁰Kama Bwana alivyoyaangamiza yale mataifa mbele yenu, ndivyo, mtakavyoangamia nanyi, kwa kuwa hamkuisikiliza sauti ya Bwana Mungu wenu.