Mkumbuke Mungu katika ujana, akutulize moyo katika uzee!

¹Mkumbuke Muumbaji wako ukingali kijana bado, siku mbaya zikiwa hazijafika, wala miaka haijakupata bado, unayoisema: Hii sipendezwi nayo!

²Jua na mchana na mwezi na nyota zikiwa hazijaguiwa bado na giza, mawingu mengine yakitokea, mvua ikiisha kupita:

³siku hizo walinda nyumba watatetemeka, nao waume wenye nguvu watapindika, nao wanawake wasagao watakomesha kazi kwa kuwa wachache, nao wake waliochungulia madirishani wataguiwa na giza.

⁴Nayo milango ielekeayo njiani itafungwa, nacho kishindo cha mawe ya kusagia kitakuwa kidogo; ndipo, watu watakapoamka, jogoo akiwika, nao waimbaji wote wa kike watazipunguza sauti zao.

⁵Ndipo, watu watakapoogopa kupanda juu, nako njiani wataona mastusho; ni siku zile, mlozi unapochanua maua, mapanzi wasipoweza kuruka kwa kushiba, nacho kiungo cha pilipili kisipofaa kitu; kwani hapo mtu huiendea nyumba yake, atakamokaa kale na kale, nao waombolezaji humjia mara kwa mara.

⁶Kwani siku ziko karibu, kamba ya fedha itakapokatika, chano cha dhahabu kitakapopondeka, mtungi utakapovunjika kisimani, gurudumu la kutekea maji litakapokatika na kuangukia mlemle shimoni.

⁷Ndipo, nalo vumbi litakaporudi mchangani, lilikokuwa, nayo roho itarudi kwake Mungu aliyeitoa.[#Mbiu. 3:20; 1 Mose 3:19; Mbiu. 1:2.]

⁸Mpiga mbiu asema: Yote ni ya bure kabisa, yote pia ni ya bure.

Kumcha Mungu huyapita yote mengine.

⁹Jingine ni hili: huyu mpiga mbiu hakuwa mwerevu wa kweli yeye tu, ila nao watu aliwafundisha ujuzi, akawa mwenye mawazo makuu ya kuchunguza mambo, akatunga mafumbo mengi.[#1 Fal. 4:32.]

¹⁰Yeye mpiga mbiu alitafuta, aone maneno yapendezayo; nayo maneno yaliyokuwa ya kweli, yaliyoongoka, yakaandikwa.

¹¹Maneno ya werevu wa kweli ni kama fimbo za wachungaji au kama misumari iliyopigiliwa vema; wenye kuyakusanya waliyapata kwa mchungaji mmoja.[#Ebr. 4:12.]

¹²Jingine lililoko ni hili: onyeka, mwanangu, usijitie katika kazi hiyo! Kutengeneza vitabu ni kwingi mno, hakukomi, nako kujifunza mengi huchokesha mwili.

¹³Na tusikie neno linaloyachanganya yote: Mche Mungu na kuyaangalia maagizo yake! Kwani hivi ndivyo vinavyompasa kila mtu.[#1 Tim. 1:5.]

¹⁴Kwani matendo yote Mungu atayatakia shauri, nayo yaliyofichwa, kama ni mema, au kama ni mabaya.[#Rom. 2:16; 1 Kor. 4:5.]