Anwani.

¹Mimi Paulo niliye mtume wa Kristo Yesu kwa hayo, Mungu ayatakayo, nawaandikia ninyi watakatifu mlioko Efeso, nanyi mliomtegemea Kristo Yesu:[#Rom. 1:7; 1 Kor. 1:2.]

²Upole uwakalie na utengemano unaotoka kwa Mungu Baba yetu na kwa Bwana wetu Yesu Kristo!

Mungu alitupatia Ukombozi kabla ya Kuumba Ulimwengu

³*Atukuzwe Mungu, Baba wa Bwana wetu Yesu Kristo, aliyetugawia mema yote ya kiroho yatokayo mbinguni kwake Kristo![#Ef. 2:6.]

⁴Kwani ulimwengu ulipokuwa haujaumbwa bado, alituchagua sisi kuwa wake yeye, tuwe watakatifu machoni pake pasipo kilema.[#Ef. 5:27; Yoh. 15:16; Rom. 8:28-30.]

⁵Kwa hivyo, anavyotupenda, alitutenga kale, tupokelewe kuwa wana wake mwenyewe tukimfuata Yesu Kristo; ndiyo yaliyompendeza, akayataka, yawepo.[#Yoh. 1:12.]

⁶Nasi huusifu utukufu wa kipaji chake, alichotugawia hapo, alipomtoa mpendwa wake.[#Mat. 3:17.]

⁷Katika damu yake yeye ndimo, tupatiamo ukombozi, maana twaondolewa makosa; hayo ndiyo magawio yake mengi[#Ef. 2:7; 3:8,16; Kol. 1:14.]

⁸yaliyotuongezea nasi werevu wote ulio wa kweli, hata ujuzi wote.

⁹Kisha akatutambulisha, ayatakayo, yaliyokuwa yamefichwa. Ndivyo, ylivyompendeza, akayaweka kale moyoni mwake,[#Ef. 3:3-6,9; Rom. 16:25; Kol. 1:26-27.]

¹⁰yatengenezeke, siku alizoziweka zitakapotimia, Kristo awe kichwa chao yote yaliyoko mbinguni nacho chao yaliyoko nchini.[#Gal. 4:4.]

¹¹Yeye ndiye, ambaye tulipatiwa naye urithi wetu, tuliokatiwa kale na kuwekewa kale, maana yeye huyafanya yote, yawepo, kama ayatakavyo mwenyewe.[#Rom. 8:28; Kol. 1:12.]

¹²Kwa hiyo sisi tuliotangulia kumngojea Kristo ndio tutakaousifu utukufu wake.

¹³Nanyi mmelisikia Neno la kweli, ni ule Utume mwema wa wokovu wenu; napo hapo, mlipolitegemea, mlitiwa muhuri yake mlipompata Roho Mtakatifu, tuliyeagiwa.[#Ef. 4:30.]

¹⁴Huyu ni rehani ya urithi wetu, tujue: tumekombolewa, tu watu wake, utukufu wake upate wenye kuusifu.*[#2 Kor. 1:22; 5:5.]

Yesu kichwa chao wateule.

¹⁵*Kwa hiyo mimi niliposikia, mnavyomtegemea Bwana Yesu, tena mnavyowapenda watakatifu wote,[#Kol. 1:4.]

¹⁶sichoki kushukuru kwa ajili yenu kila, niwakumbukapo nikiomba.

¹⁷Nawaombea, Mungu wa Bwana wetu Yesu Kristo, Baba mwenye utukufu, awape roho ya werevu wa kweli na ya ufunuzi, mmtambue yeye alivyo.

¹⁸Namo mioyoni mwenu atiemo macho yaliyoangazwa, mpate kujua, kilivyo hicho kingojeo, mlichoitiwa naye, tena mwujue nao utukufu wa urithi wake, aliowawekea watakatifu, ulivyo mwingi.

¹⁹Mpate kuujua nao uwezo wake, unavyokua kuupita wote mwingine ulioko; huo akatupa sisi tumtegemeao kwa kuhimizwa na nguvu zake kuu.

²⁰Ndizo, alizozitumia alipomfufua Kristo katika wafu na kumketisha kuumeni kwake mbinguni[#Sh. 110:1.]

²¹na kumpa cheo kuupita ukubwa na ufalme na uwezo na ubwana wote na kuyapita majina yo yote yatakayotajwa siku hizi, nazo siku zote zitakazokuja.[#Rom. 8:38-39; Kol. 2:10.]

²²Akayaweka yote kuwa chini migguni pake, naye mwenyewe akamfanya kuwa mkuu peke yake, awe kichwa chao wateule wote,[#Ef. 4:15; Sh. 8:7; Mat. 28:18.]

²³maana wao ni mwili wake; huu ndio utimilifu wake yeye anayeyatimiza yote pia kwao wote po pote pasipo kusaza.*[#Ef. 4:10; Rom. 12:5; 1 Kor. 12:27.]