Ufunuo wa fumbo la Mungu.

¹Hayo yamenipeleka mimi Paulo kifungoni kuwa mfungwa wake Kristo Yesu kwa ajili yenu ninyi wamizimu.[#Fil. 1:7,13.]

²Labda mmesikia, Mungu alivyonipa utunzaji wa magawio yake, niwagawie nanyi.[#Ef. 1:9-10; Gal. 1:12.]

³Nilifumbuliwa, niyatambue yale yaliyofichwa tangu kale, kama nilivyowaandikia kidogo hapo kwanza.

⁴Mkiyasoma mwaweza kuuona ujuzi wangu wa fumbo la Kristo.

⁵Siku zilizopita zote wana wa watu hawajatambulishwa fumbo hilo, ambalo mitume na wafumbuaji wake watakatifu walifunuliwa sasa na Roho,[#Kol. 1:26.]

⁶hilo la kwamba: Wamizimu nao ndio wenye urithi pamoja nasi, kwamba: Nao wamo pamoja nasi mwilini mwake, kwamba: Nao ni wenye kiagio, tulichopewa katika Kristo Yesu tulipotangaziwa Utume mwema.[#Ef. 2:13,18-19; Tume. 15:7-9.]

⁷Ndio, niutumikiao nami kwa hivyo, Mungu alivyonigawia kipaji changu, nilichopewa hapo, niliposhindwa na nguvu zake.[#Tume. 9:15.]

⁸Mimi niliye mdogo kuliko watakatifu wote nikapewa gawio hili, niwapigie wamizimu mbiu njema ya mema yote ya Kristo yaliyo mengi, yasiwezekane kupelelezeka yote;[#Ef. 1:7; 1 Kor. 15:9-10; Gal. 1:16.]

⁹kisha niueleze vema utunzaji wa lile fumbo lililokuwa limefichwa tangu zamani zote kwake Mungu aliyeviumba vyote.

¹⁰Maana siku hizi sharti wakubwa na wanguvu wote walioko mbinguni watambulishwe na wateule, ujuzi wake Mungu ulivyo mwingi sana.[#Rom. 11:32-33; 1 Petr. 1:12.]

¹¹Mwenyewe aliviweka hivyo kale kabisa moyoni mwake, vitimie katika Kristo Yesu, Bwana wetu;[#Ef. 1:11.]

¹²kisha akatuongoza njia ya kumwendea pasipo woga wowote, mpaka tumfikie tukiwa tumejishikizia kwake yeye kwa kumtegemea.[#Yoh. 14:6; Rom. 5:1-2; Ebr. 4:16.]

¹³Kwa hiyo naomba, msichoke kwa ajili ya maumivu yangu, niliyopatwa nayo kwa ajili yenu, maana yanawapatia utukufu.[#Kol. 1:24.]

¹⁴Kwa sababu hii nampigia Baba na Bwana wetu Yesu Kristo magoti;

¹⁵kwani kila aliye baba, kama yuko mbinguni au yuko nchini, hujiita na jina hili la baba.

¹⁶Nawaombea, kwa wingi wa utukufu wake awape, mtu wenu wa ndani apate nguvu akikuzwa na Roho wake.[#Ef. 1:7; 6:10.]

¹⁷Tena awape, Kristo akae mioyoni mwenu kwa hivyo, mnavyomtegemea, mpate kushusha mizizi katika upendo, mshikizwe nayo![#Yoh. 14:23; Kol. 2:7.]

¹⁸Kisha awape, mweze kupima pamoja na watakatifu wote, upendo ulivyo mpana na mrefu, tena unavyoingia chini, hata unavyokwenda juu;

¹⁹ndivyo, mtakavyoutambua upendo wake Kristo, ya kuwa unaupita utambuzi wote, mpate kuujaa katika mambo yote, kama Mungu alivyoujaa.

²⁰Lakini yeye kwa hivyo, nguvu yake inavyokaza mwetu, anaweza kufanya kuyapita yote, tuyaombayo nayo tuyawazayo,

²¹yeye atukuzwe kwao wateule walio wake Kristo Yesu siku zote zitakazokuwapo kale na kale pasipo mwisho! Amin.*