Yaepukeni matendo ya giza!

¹Mwigeni Mungu, kama inavyowapasa watoto wapendwa![#Mat. 5:48.]

²Tena mwendeane na kupendana, kama Kristo alivyowapenda ninyi! Akajitoa kwa ajili yetu sisi kuwa ng'ombe ya tambiko ya kuuawa, Mungu asikie mnuko mzuri.[#Ef. 5:25; Gal. 2:20; Ebr. 10.]

³Lakini mambo ya ugoni na ya uchafu wo wote na ya choyo yasitajwe kwenu kamwe, kama inavyowapasa watakatifu;

⁴wala matusi wala mapuzi wala mafyozi mabaya, maana siyo yafaayo; yafaayo ni ya kushukuru.

⁵Kwani haya yajueni na kuyatambua vema: hakuna mgoni wala mchafu wala mwenye choyo aliye mtambikia vinyago atakayepata fungu katika ufalme wa Kristo na wa Mungu.

⁶Pasioneke mwenye kuwadanganya na maneno yasiyo na maana! Kwani kwa ajili yao makali ya Mungu huwajia wakataao kutii.

⁷Kwa hiyo msichanganyike nao!

⁸Kwani kale mlikuwa giza, lakini sasa mmekuwa mwanga kwa kuwa naye Bwana. Mwendelee, kama iwapasavyo wana wa mwanga![#Ef. 2:11,13; 1 Petr. 2:9.]

⁹Kwani matunda yanayozaliwa mwangani ndio wema wo wote na wongofu na ukweli.*[#Mat. 5:16; Luk. 16:8; Yoh. 12:36.]

¹⁰Pambanueni, kama ni mambo gani yampendezayo Bwana![#Ef. 5:17; Rom. 12:2.]

¹¹Msiwe wenzao wenye kuzifanya kazi za giza zisizofaa, ila mkaze kuwaumbua!

¹²Kwani hutia soni kuyataja tu yanayofanywa nao na kuyafichaficha.[#Rom. 1:24.]

¹³Lakini yote hufunuliwa yakiumbuliwa na mwanga, kwani kila kitu kinachofunuliwa huangazika.[#Yoh. 3:20-21.]

¹⁴Kwa hiyo husema:

Amka, wewe uliyelala!

Inuka, utoke kwenye wafu!

Kisha Kristo atakuangaza.

¹⁵*Kwa hiyo angalieni sana, mtakavyoendelea! Msiwe wenye ujinga, ila mwe wenye werevu wa kweli![#Mat. 10:16; Kol. 4:5.]

¹⁶Mzitumie vema siku za sasa! Kwani siku hizi ndizo mbaya.

¹⁷Kwa hiyo msipumbae, ila mjijulishe, Bwana ayatakayo![#Ef. 5:10.]

¹⁸Wala msilewe pombe! Kwani hazikomeki tena! Ila mjijaze Roho![#Luk. 21:34.]

¹⁹Mwongeleane na kuambiana shangwe na nyimbo na tenzi za Kiroho, mkimwimbia Bwana na kumshangilia mioyoni mwenu,[#Sh. 33:2-3; Kol. 3:16.]

²⁰mkamshukuru Mungu Baba po pote kwa ajili yao yote, mliyoyapata katika Jina la Bwana wetu Yesu Kristo!

²¹Kisha na mnyenyekeane kila mtu na mwenziwe kwa hivyo, mnavyomwogopa Kristo!*[#1 Petr. 5:5.]

Mke amtii mumewe! Mume ampende mkewe!

²²Ninyi wanawake, watiini waume wenu, kama mnavyomtii Bwana![#1 Mose 3:16; Kol. 3:18; 1 Petr. 3:1.]

²³Kwani mume ni kichwa cha mkewe, kama Kristo alivyo kichwa chao wateule, maana yeye ndiye aliyeuokoa mwili.

²⁴Lakini kama wateule wanavyomtii Kristo, vivyo hivyo nao wake sharti wawatii waume wao katika mambo yote![#1 Kor. 11:3.]

²⁵Ninyi waume, wapendeni wake zenu, kama Kristo naye alivyowapenda wateule, akajitoa mwenyewe kwa ajili yao,[#Kol. 3:19.]

²⁶awatakase na kuwang'aza akiwaosha maji, kama alivyoagana nao.[#Tit. 3:5.]

²⁷Ndivyo, alivyotaka kujitengenezea mwenyewe wateule wenye tukuzo hilo la kwamba: Hawanalo doa wala kunjo wala lo lote lifananalo nayo yaliyo hivyo, maana ndio watakatifu pasipo kilema.[#Sh. 45:14; 2 Kor. 11:2.]

²⁸Ndivyo, inavyowapasa nao waume kuwapenda wake zao, kama ni miili yao. Kwani mwenye kumpenda mkewe hujipenda mwenyewe.

²⁹Kwani toka kale hakuna mtu ye yote aliyeuchukia mwili wake mwenyewe, ila huulea na kuutunza, kama Kristo naye anavyowafanyia wateule;

³⁰kwani sisi tu viungo vya mwili wake.[#Ef. 1:23; 1 Mose 2:23; 1 Kor. 6:15.]

³¹Kwa sababu hii mtu atamwacha baba yake na mama yake,

agandamiane na mkewe, nao hao wawili watakuwa mwili mmoja.

³²Fumbo hili ni gumu la kulifumbua, lakini mimi nasema la Kristo na la wateule!

³³Lakini hata ninyi kila mmoja wenu na ampende mkewe, kama anavyojipenda mwenyewe! Lakini mke amche mumewe!