Waisiraeli wanafika Sinai.

¹Katika mwezi wa tatu tangu hapo, wana wa Isiraeli walipotoka katika nchi ya Misri, siku hiyohiyo wakafika nyikani kwa Sinai.

²Walipoondoka Refidimu, wakafika nyikani kwa Sinai; nao Waisiraeli wlipoyapiga makambi yao wakayapiga ng'ambo ya huku kwenye huo mlima.

³Naye Mose akaupanda huo mlima kwenda kwake Mungu, Bwana alipomwita huko mlimani, akamwambia: Hivi ndivyo, utakavyowaambia wao wa mlango wa Yakobo na kuwatangazia wana wa Isiraeli:

⁴Ninyi mmeyaona niliyowafanyizia Wamisri, nikawachukua ninyi, kama tai anavyowachukua watoto wake mabawani, nikawafikisha kwangu.[#5 Mose 32:11.]

⁵Sasa mtakapoisikia sauti yangu na kuliangalia Agano langu, mtakuwa watu wangu mwenyewe kuliko makabila yote ya watu, kwani ulimwengu wote ni wangu.[#5 Mose 7:6.]

⁶Ninyi mtakuwa ufalme wangu wenye watambikaji na taifa takatifu. Haya ndiyo maneno, utakayowaambia wana wa Isiraeli.[#3 Mose 19:2; 1 Petr. 2:9; Ufu. 1:6.]

⁷Mose aliporudi akawaita wazee wao hawa watu, akawaeleza haya maneno yote, Bwana aliyomwagiza.

⁸Watu wote wakaitikia pamoja kwamba: Yote, Bwana aliyoyasema, tutayafanya. Naye Mose akampelekea Bwana majibu haya ya watu;

⁹Bwana naye akamwambia Mose: Utaniona mimi, nikikujia katika wingu jeusi, hawa watu wasikie, nikisema na wewe, wakutegemee nawe kale na kale. Kisha Mose akamsimulia Bwana maneno yote ya watu.

Waisiraeli wanajitengeneza kuyapata Maonyo ya Bwana.

¹⁰Kisha Bwana akamwambia Mose: Nenda kwao hawa watu, uwaeue leo na kesho, wazifue nazo nguo zao,

¹¹wawe tayari siku ya tatu! Kwani hiyo siku ya tatu Bwana atashuka machoni pao watu wote kufika juu ya mlima wa Sinai.

¹²Tena uwakatie hawa watu mpaka wa kuuzunguka mlima na kuwaambia: Jiangalieni, msiupande mlima huu, wala msiuguse hapo chini yake! Kwani kila atakayeugusa mlima huu atakufa;[#2 Mose 34:3.]

¹³lakini mkono wa mwingine usimguse mtu huyo, ila auawe kwa kupigwa mawe au kwa kuchomwa mikuki, kama ni mtu au nyama, asiwepo tena! Lakini hapo, panda lenye mlio mrefu litakapopigwa, ndipo wao nao na waupande mlima huu![#Ebr. 12:18-20.]

¹⁴Kisha Mose akatelemka huko mlimani kwenda kwao hao watu, akawaeua watu, wakazifua nguo zao.

¹⁵Tena akawaambia: Msiwakaribie wake zenu, mpate kuwa tayari siku ya tatu![#1 Kor. 7:5.]

Mungu anatokea mlimani kwa Sinai.

¹⁶Siku ya tatu ilipofika, ilipokuwa asubuhi, zikasikilika ngurumo, nao umeme ukapiga, nako mlimani juu kukawa na wingu jeusi, nao mlio wa baragumu lenye nguvu ukasikilika, nao watu wote waliokuwa makambini wakatetemeka.[#Ebr. 12:21.]

¹⁷Ndipo, Mose alipowatoa watu makambini, waje kukutana na Mungu, wakajipanga mlimani chini.

¹⁸Lakini mlima wote wa Sinai ulitoka moshi, kwa kuwa Bwana aliutelemkia kwa moto, nao moshi wake ukapanda, kama moshi wa tanuru, nao mlima wote ukatetemeka sana,

¹⁹nao mlio wa lile baragumu ukaendelea, ukazidi sana. Mose akasema, naye Mungu akamwitikia na kupaza sauti.[#Tume. 7:38.]

²⁰Bwana alipokwisha kushuka huko kwenye mlima wa sinai na kufika kileleni juu ya mlima huu, Bwana akamwita Mose kufika kileleni juu ya mlima huu, naye Mose akapanda.

²¹Ndipo, Bwana alipomwambia Mose: Shuka, uwaonye hawa watu, wasijivunjie njia ya kufika kwa Bwana, wapate kumwona, wasife wengi miongoni mwao.

²²Nao watambikaji watakaomkaribia Bwana, sharti wajieue, Bwana asije, akawaponda.

²³Lakini Mose akamwambia Bwana: Hawa watu hawawezi kupanda mlimani kwa Sinai, kwani wewe mwenyewe umetuonya na kuniagiza kwamba: Kata mpaka wa mlima huu na kuueua, wasiuguse.

²⁴Ndipo, Bwana alipomwambia: Nenda, ushuke! Kisha upande wewe, naye Haroni pamoja na wewe! Lakini watambikaji na watu wasijivunjie njia ya kupanda kwake Bwana, asije, akawaponda.

²⁵Kisha Mose akatelemka kwenda kwao hao watu, akawaambia maneno hayo.