Kuzaliwa kwake Mose.

¹Mtu wa mlango wa Lawi akaenda, akaoa mwanamke wa Kilawi.

²Huyo mwanamke akapata mimba, akazaa mtoto wa kiume; naye alipomwona kuwa mtoto mzuri, akamficha miezi mitatu.[#2 Mose 6:20; Tume. 7:20; Ebr. 11:23.]

³Asipoweza kumficha tena, akamchukulia sanduku ya mafunjo, akayaziba kwa udongo wenye utomvu mweusi na kuyapata lami, akamweka mtoto humo ndani; kisha akaiweka hiyo sanduku katika manyasi kando ya mto mkubwa.

⁴Umbu lake mtoto akasimama mbali, aone yatakayompata.

Kukua kwake Mose nyumbani mwa Farao.

⁵Mara akatelemka binti Farao, aoge mtoni, vijakazi wake wakitembea kando ya jito. Yeye alipoiona hiyo sanduku katikati ya manyasi akatuma kijakazi wake mmoja kuichukua.

⁶Alipoifunua akamwona mtoto, naye huyu kitoto alikuwa akilia; naye akamhurumia, akasema: Ni mtoto wa Waebureo huyu.

⁷Ndipo, umbu lake mtoto alipomwuliza binti Farao: Niende kukuitia mnyonyeshaji wa Kiebureo, akunyonyeshee mtoto?

⁸Binti Farao akamwambia: Nenda! Ndipo, yule kijana wa kike alipokwenda, akamwita mamake mtoto.

⁹Naye binti Farao akamwambia: Mchukue huyu mtoto, uninyonyeshee! Nami nitakupa msahahara wako. Kisha huyo mwanamke akamchukua mtoto, akamnyonyesha.

¹⁰Mtoto alipokuwa mkubwa, akampeleka kwa binti Farao, naye akamwia mwanawe, akamwita jina lake Mose akisema: Kwani nilimtoa majini.

¹¹Siku zile Mose alipokwisha kukua akatoka kwenda kwa ndugu zake; alipovitazama, walivyofanyishwa kazi ngumu, akaona Mmisri mmoja, akimpiga mmoja wao ndugu zake wa Kiebureo.[#Ebr. 11:24-25.]

¹²Ndipo, alipogeuka huko na huko, tena alipoona, ya kama hakuna mtu, akampiga yule Mmisri na kumwua, kisha akamfukia mchangani.[#Tume. 7:24.]

¹³Kesho yake alipotoka akaona, wawili wa Kiebureo wakipigana, akamwambia aliye mkorofi: Mbona unampiga mwenzako?

¹⁴Naye akajibu: Yuko nani aliyekuweka kuwa mkuu wa mwamuzi kwetu? Je? Wewe unataka kuniua nami, kama ulivyomwua yule Mmisri? Ndipo, Mose aliposhikwa na woga, akasema: Kumbe lile jambo limejulikana.[#Tume. 7:22-28,35.]

Kukimbia na kuoa kwake Mose.

¹⁵Farao alipolisikia neno hilo, akamtafuta Mose, amwue; lakini Mose akamkimbia Farao, asimwone, akaenda kukaa katika nchi ya Midiani, akakaa kwenye kisima.[#Ebr. 11:27.]

¹⁶Naye mtambikaji wa Midiani alikuwa na wana wa kike saba; hao walipokuja kuchota maji na kupajaza maji hapo, walipopatengeneza pa kunyweshea mbuzi na kondoo wa baba yao,[#2 Mose 3:1.]

¹⁷wakaja wachungaji wengine na kuwafukuza. Ndipo, Mose alipoinuka, akawasaidia akiwanywesha mbuzi na kondoo wao.[#1 Mose 29:10.]

¹⁸Walipofika kwa baba yao Reueli, akawauliza: Inakuwaje, mkifika leo, kukiwa mchana bado?

¹⁹Wakasema: Mtu wa Kimisri ametuponya mikononi mwa wale wachungaji, kisha akatuchotea maji, akawanywesha mbuzi na kondoo.

²⁰Akawauliza wanawe: Yuko wapi? Mbona mmemwacha huko? Mwalikeni, ale nasi!

²¹Kisha Mose akapatana kukaa kwake yule mtu, akampa Mose mwanawe Sipora kuwa mkewe.

²²Alipomzalia mtoto wa kiume, akamwita jina lake Gersomu (Mgeni wa Huku), kwani alisema: Nimekuwa mgeni katika nchi isiyo ya kwetu.[#2 Mose 18:3.]

Mungu anayasikia malalamiko ya Waisiraeli.

²³Siku zilipopita nyingi, yule mfalme wa Misri akafa. Nao wana wa Isiraeli wakapiga kite pamoja na kulia kwa ajili ya utumwa wao, nayo hayo malalamiko yao yakapanda, yakafika kwake Mungu kwa ajili ya huo utumwa wao.[#2 Mose 3:7.]

²⁴Mungu alipoyasikia hayo mauguzi yao, yeye Mungu akalikumbuka Agano lake, alilomwekea Aburahamu na Isaka na Yakobo.[#1 Mose 15:18; 26:3; 28:13-14.]

²⁵Ndipo, Mungu alipowaonea machngu wana wa Isiraeli, kwani yeye Mungu aliwajua, walivyo.