Tambiko la ndama ya dhahabu

¹Watu walipoona, ya kuwa Mose anakawia kushuka mlimani, watu wakamkusanyikia Haroni, wakamwambia: Haya! Tufanyie miungu itakayotuongoza! Kwani hatuyajui yaliyompata huyo Mose aliyetutoa katika nchi ya Misri.

²Haroni akawaambia: Ziondoeni pete za dhahabu masikioni kwa wake zenu na kwa wana wenu wa kiume na wa kike, mniletee!

³Ndipo, watu wote walipoziondoa pete za dhahabu za masikioni kwao, wakampelekea Haroni.

⁴Akazichukua mikononi mwao, akazivunjavunja kwa patasi, akaziyeyusha, akazitengeneza kuwa ndama. Ndipo, waliposema: Huyu ndiye Mungu wako, Isiraeli, aliyekutoa katika nchi ya Misri.[#1 Fal. 12:28; Sh. 106:19-20; Tume. 7:41.]

⁵Haroni alipoyaona, akajenga mbele yake pa kutambikia, kisha Haroni akatangaza kwamba: Kesho ni sikukuu ya Bwana.

⁶Kesho yake wakaamka na mapema, wakatoa ng'ombe za tambiko za kuteketezwa nzima pamoja na kuleta ng'ombe za tambiko za shukrani. Kisha watu wakakalia kula na kunywa, kisha wakainukia kucheza.[#1 Kor. 10:7.]

⁷Lakini Bwana akamwambia Mose: Nenda kushuka! Kwani wao walio ukoo wako, uliowatoa katika nchi ya Misri, wamefanya mabaya

⁸Wakiondoka upesi katika njia, niliyowaagiza; wamejitengenezea ndama kwa kuyeyusha dhahabu, wakaiangukia na kuitambikia wakisema: Huyu ndiye Mungu wako, Isiraeli, aliyekutoa katika nchi ya Misri.[#2 Mose 20:4,23; 32:4.]

⁹Bwana akamwambia Mose: Nikiwatazama watu hawa ninawaona kuwa watu wenye kosi ngumu.

¹⁰Sasa niache, makali yangu yawawakie moto, uwale! Kisha nitakufanya wewe kuwa taifa kubwa.[#1 Mose 14:11-20.]

¹¹Lakini Mose akambembeleza Bwana Mungu wake kwamba: Bwana, mbona utayaacha makali yako, yawawakie watu wako, uliowatoa katika nchi ya Misri kwa uwezo mkuu na kwa mkono ulio na nguvu?

¹²Mbona unataka, Wamisri waseme kwamba: Aliwatoa kwa ubaya, awaue milimani na kuwatowesha juu ya nchi? Geuka na kuyaacha makali yako yanayowaka moto, uwahurumie walio ukoo wako kwa ajili ya mabaya, waliyoyafanya!

¹³Wakumbuke watumishi wako, Aburahamu na Isaka na Isiraeli, uliowaapia ukijitaja mwenyewe na kuwaambia: Wa uzao wenu nitawafanya kuwa wengi kama nyota za mbinguni, nayo nchi hiyo yote, niliyoisema, nitawapa wao wa uzao wenu, waichukue kuwa yao kale na kale.[#1 Mose 22:16-17; 26:4; 28:14.]

¹⁴Ndipo, Bwana alipogeuza moyo, asiwafanyie hayo mabaya, aliyoyasema, ya kuwa atawafanyizia wao walio ukoo wake.

Mose anatokea.

¹⁵Kisha Mose akageuka, akatelemka mlimani akizishika zile mbao mbili za Ushahidi mkononi mwake, nazo hizo mbao zilikuwa zimeandikwa pande zao zote mbili, kweli zilikuwa zimeandikwa huku na huko.

¹⁶Tena hizi mbao zilikuwa kazi ya Mungu, nayo maandiko yalikuwa maandiko ya Mungu mwenyewe yaliyochorwa humo mbaoni.[#2 Mose 31:18.]

¹⁷Yosua alipozisikia sauti za makelele, watu waliyoyapiga, akamwambia Mose: Yako makelele makambini kama ya vita.

¹⁸Akajibu: Haya siyo makelele ya wapiga vita walioshinda, wala siyo makelele yao walioshindwa, mimi ninasikia tu sauti zao wanaoitikiana na kuimba.

¹⁹Mose alipoyafikia makambi karibu na kuona, jinsi hiyo ndama ilivyochezewa, ndipo, makali yake yalipowaka, akazitupa zile mbao, alizozishika mikononi mwake, akazivunja mlimani chini.

²⁰Kisha akaichukua hiyo ndama, waliyoitengeza, akaitekeketeza kwa moto, akaipondaponda kuwa majivu, akayamwaga majini, akawapa wana wa Isiraeli, wayanywe.

²¹Kisha Mose akamwuliza Haroni: Watu hawa wamekukosea nini, ukiwakosesha kosa kubwa kama hili?

²²Haroni akamwambia: Bwana wangu, makali yako yasiwake moto! Unawajua watu hawa, ya kuwa ni wabaya.

²³Waliniambia: Tufanyie miungu itakayotuongoza! Kwani hatuyajui yaliyompata huyo Mose aliyetutoa katika nchi ya Misri.

²⁴Nikawaambia: Kila mwenye dhahabu na aziondoe kwake, anipe mimi! Basi, waliponipa, nikazitupa motoni, ikatoka ndama hii.

²⁵Mose alipoona, ya kuwa watu wanajikweza sana, kwa kuwa Haroni amewakweza, wafyozwe vibaya nao wawainukiao,

²⁶ndipo, Mose alipokwenda kusimama langoni penye makambi, akasema: Aliye wa Bwana na aje kwangu! Ndipo, wana wa Lawi walipokusanyika wote kwake,

²⁷akawaambia: Hivi ndivyo, alivyosema Bwana Mungu wa Isiraeli: Jifungeni kila mtu upanga wake kiunoni pake, mzunguke makambini kwenda na kurudi toka lango la huku hata lango la huko, mkiua kila mtu ndugu yake naye mwenzake naye rafiki yake!

²⁸Wana wa Lawi wakayafanya, Mose aliyowaambia, wakauawa siku hiyo watu wa ukoo huo kama 3000.

²⁹Kisha Mose akawaambia: Yajazeni leo magao yenu, mwe wa Bwana, maana kila mmoja wenu hakumjua wala mtoto wake wala ndugu yake; Bwana na awape leo mbaraka![#2 Mose 28:41; 4 Mose 3:6-10; 5 Mose 33:8-11.]

Mose anawaombea Waisiraeli.

³⁰Ikawa kesho yake, ndipo, Mose alipowaambia watu: Ninyi mmekosa kosa kubwa; sasa nitapanda kwenda kwa Bwana, nitazame, kama nitaweza kuwapatia upozi kwa ajili ya kosa lenu.

³¹Mose aliporudi kwa Bwana akamwambia: Watu wa ukoo huu wamekosa kosa kubwa wakijifanyizia mungu wa dhahabu.[#Sh. 69:29; Dan. 12:1; Luk. 10:20; Rom. 9:3.]

³²Lakini sasa uwaondolee kosa lao! Kama haiwezekani, lifute jina langu katika Kitabu chako, ulichokiandika!

³³Naye Bwana akamwambia Mose: Anikoseaye ndiye, nitakayemfuta katika Kitabu changu.

³⁴Sasa nenda, uwapeleke watu hawa hapo, nilipokuambia! Naye malaika wangu utamwona, akikutangulia. Lakini siku yangu ya mapatilizo itakapofika, nitawapatilizia hili kosa lao.

³⁵Ndivyo, Bwana alivyowapiga watu wa huo ukoo kwa kuifanya hiyo ndama, Haroni aliyoifanya.