Farao anamkataa Bwana.

¹Baadaye Mose na Haroni wakaenda, wakamwambia Farao: Hivi ndivyo, anavyosema Bwana Mungu wa Isiraeli: Hawa watu walio ukoo wangu wape ruhusa kwenda kunifanyizia sikukuu nyikani![#2 Mose 3:18; 7:16; 8:1,20; 9:1,13.]

²Lakini Farao akasema: Bwana ni nani, nimsikie sauti yake na kuwapa Waisiraeli ruhusa kwenda? Simjui Bwana, wala sitawapa Waisiraeli ruhusa kwenda.[#Dan. 3:15.]

³Nao wakasema: Mungu wa Waebureo amekutana nasi, kwa hiyo tunataka kwenda nyikani safari ya siku tatu, tumtambikie Bwana Mungu wetu, asitupige kwa magonjwa yauayo wala kwa upanga.

⁴Lakini mfalme wa Misri akawaambia: Mbona ninyi Mose na Haroni mnataka kuwatoa tu watu hawa katika kazi zao? Nendeni kuzifanya hizo kazi zenu ngumu!

⁵Tena Farao akasema: Tazameni, jinsi watu hawa wa nchi hii walivyo wengi sasa! Nanyi mwataka kuwapumzisha, wasizifanye kazi zao ngumu.[#2 Mose 1:7,12.]

Waisiraeli wanateswa zaidi.

⁶Siku ile Farao akawaagiza wale wasimamizi wakali wa hao watu nao waangaliaji wao kwamba:

⁷Watu hawa msiwape tena majani makavu ya kuumbia matofali kama siku zote! Sharti waende wenyewe kujiokotea majani makavu.

⁸Lakini hesabu ya matofali, waliyoyafanya siku zote, sharti mwabandikie iyo hiyo, msiipunguguze! Kwani ndio walegevu, kwa hiyo hupiga kelele kwamba: Twende kumtambikia Mungu wetu!

⁹Kazi za utumwa sharti ziwalemee zaidi watu hawa, wakizifanya, wasitazamie maneno ya uwongo.

¹⁰Ndipo, wasimamizi wale wakali wa watu hao na waangaliaji wao walipowaambia watu kwamba: Hakuna tena atakayewapa ninyi majani makavu;

¹¹nendeni wenyewe kujiokotea majani makavu po pote, mtakapoyaona! Lakini agano la kazi zenu halipunguki.

¹²Ndipo, watu hao walipotawanyika katika nchi nzima ya Misri kuokota majani makavu ya kuumbia matofali.

¹³Nao wasimamizi wakawahimiza kwa ukali wao kwamba: Zimalizeni kazi zenu za kuitimiza hesabu yao ya siku zote kama hapo, mlipopewa majani makavu!

¹⁴Nao waangaliaji wana wana wa Isiraeli, wale wasimamizi wakali wa Farao waliowawekea, wakapigwa kwa kwamba: Mbona hamkulitimiza jana na leo agano lenu la matofali la siku zote?

¹⁵Ndipo, waangaliaji wa wana wa Isiraeli walipokuja, wakamlilia Farao kwamba; Mbona unawafanyizia watumwa wako hivyo?

¹⁶Majani makavu watumwa wako hawapewi, lakini wanatuambia: Fanyeni matofali yayo hayo! Nasi watumwa wako tunapigwa, lakini wenye kukosa ni watu wako.

¹⁷Lakini akasema: Ninyi m walegevu, m walegevu kweli. Kawa sababu hii mnasema: Twende, tumtambikie Bwana!

¹⁸Sasa haya! Nendeni kuzifanya kazi zenu! Majani makavu hamtapewa, ila hesabu ya matofali iliyowekwa sharti mwitoe!

¹⁹Nao waangaliaji wa wana wa Isiraeli wakajiona, ya kuwa wamepatwa na mabaya kwa kuambiwa: Msiipunguze hesabu ya matofali ya siku zote!

²⁰Walipotoka kwake Farao, wakamkuta Mose na Haroni waliosimama hapo na kuwangoja.

²¹Ndipo, walipowaambia: Bwana na awatazame ninyi, mlivyo, awapatilize! Kwani mmeufanya mnuko wetu kuwa mbaya puani mwake Farao namo puani mwao watumishi wake, mkawapa panga mikononi mwao, watuue.[#1 Mose 34:30.]

²²Naye Mose akamrudia Bwana na kusema: Bwana, kwa nini unawafanyia watu hawa mabaya kama hayo? Ndiyo haya, uliyonituma?

²³Kwani tangu hapo, nilipoingia kwake Farao kusema naye katika Jina lako, amezidi kuwafanyizia watu hawa mabaya, wewe nawe hukuwaponya kabisa wao walio ukoo wako.