Mti wa mzabibu usiofaa.

¹Neno la Bwana likanijia la kwamba:[#Yer. 2:21.]

²Mwana wa mtu, mti wa mzabibu unaipita miti yote kwa nini? Au liko, tawi lake linalolipata likikaa kwenye miti ya mwituni?

³Je? Huchukuliwa mti wake wa kutumiwa kwa kazi yo yote? Au watu huuchukua, wautumie kuwa mambo tu ya kutungikia vyombo vyao?

⁴Mtauona, nikiutoa kuwa kuni za moto; moto ukiisha kuzila pande zake mbili za mwisho, nacho kipande cha katikati kikiungua, Je? Iko kazi, utakayotumikia?[#Yoh. 15:6.]

⁵Tazameni! Ungaliko mzima bado hautumiwi kwa kazi yo yote; sembuse moto ukiisha kuula na kuunguza, hautatumiwa kabisa kwa kazi yo yote.

⁶Kweli hivi ndivyo, Bwana Mungu anavyosema: Kama mti wa mzabibu ulioko kwenye miti ya mwituni nilivyoutoa kuwa kuni za moto tu, ndivyo, nitakavyowatoa wakaao Yerusalemu.

⁷Nitawakazia macho yangu: ijapo wametoka motoni, moto ndio utakaowala; ndipo, watakapojua, ya kuwa mimi ni Bwana, nitakapowakazia macho yangu.

⁸Nayo nchi hii nitaigeuza kuwa peke yake tu, kwa kuwa wamevunja maagano; ndivyo, asemavyo Bwana Mungu.