Ufunuo wa mambo, Waamoni watakayoyaona.

¹Neno la Bwana likanijia la kwamba:

²Mwana wa mtu, waelekezee wana wa Amoni uso wako, uwafumbulie yatakayokuwa![#Ez. 21:28-32; Yer. 49:1-6.]

³Waambie wana wa Amoni: Lisikieni neno la Bwana Mungu! Hivi ndivyo, Bwana Mungu anavyosema: Kwa kuwa ulipazomea Patakatifu pangu, palipotiwa uchafu, kwa kuwa uliizomea nayo nchi ya Isiraeli, ilipoangamizwa, ukawagutia nao walio mlango wa Yuda, walipotekwa na kuhamishwa,[#Ez. 36:2; Omb. 2:16.]

⁴kwa hiyo utaniona, nikikutia mikononi mwao watakao maawioni kwa jua, waichukue nchi yako, iwe yao, wayapige mahema yao kwako, waitumie nchi yako kuwa makao yao; hao ndio watakaoyala matunda yako, tena ndio watakaoyanywa maziwa yako.

⁵Nao mji wa Raba nitautoa kuwa malisho ya ngamia, navyo vijiji vya wana wa Amoni vitakuwa matulio ya makundi ya mbuzi na kondoo. Ndipo mtakapojua, ya kuwa mimi ni Bwana.

⁶Kwani hivi ndivyo, Bwana Mungu anavyosema: Kwa kuwa ulipiga makofi pamoja na kupiga shindo kwa miguu yako, ukafurahi kwa moyo wako wote ulio wenye mabezo kwa ajili ya nchi ya Isiraeli,

⁷kwa hiyo utaniona, nikikukunjulia mkono wangu, nikutolee mataifa mengine, wakunyang'anye, kisha nitakuangamiza kwenye makabila ya watu, nikupoteze na kukutowesha katika nchi hizi. Ndipo, utakapojua, ya kuwa mimi ni Bwana.

Ufunuo wa mambo, Wamoabu na Waedomu watakayoyaona.

⁸Hivi ndivyo, Bwana Mungu anavyosema: Kwa kuwa Wamoabu na Waseiri husema: Tazameni, mlango wa Yuda unafanyiziwa kama mataifa yote,[#Yes. 15; Yer. 48.]

⁹kwa hiyo mtaniona, nikiufunua ubavu wake Moabu kuanzia kwenye miji, kwenye ile miji yake iliyoko mipakani, iliyokuwa urembo wa nchi, kama Beti-Yesimoti na Baali-Meoni na Kiriataimu.

¹⁰Nchi yao nitaitoa nayo yao wana wa Amoni, niwape watokao maawioni kwa jua, iwe yao, kusudi wana wa Amoni wasikumbukwe tena kwenye mataifa.

¹¹Wamoabu nao nitawahukumu; ndipo, watakapojua, ya kuwa mimi ni Bwana

¹²Hivi ndivyo, Bwana Mungu anavyosema: Kwa kuwa Waedomu walijilipiza kwao wa mlango wa Yuda na kuwatoza malipizi, wamekora manza papo hapo, walipojilipiza kwao.[#Sh. 137:7; Yer. 49:7-22; Oba. 1-21.]

¹³Kwa hiyo Bwana Mungu anasema hivi: Nitaikunjulia nchi ya Waedomu mkono wangu niangamize kwake watu na nyama, niigeuze kuwa mabomoko tu, kuanzia Temani mpaka Dedani watu watauawa kwa panga.

¹⁴Nami nitawatia mikononi mwao walio ukoo wangu wa Isiraeli, wawatoze malipizi, niyatakayo, wakiwafanyizia Waedomu mambo, machafuko yangu makali yenye moto yanayoyataka, wapate kujua, ya kuwa lipizi ni langu mimi; ndivyo, asemavyo Bwana Mungu[#5 Mose 32:35.]

Ufunuo wa mambo, Wafilisti watakayoyaona.

¹⁵Hivi ndivyo, Bwana Mungu anavyosema: Kwa kuwa Wafilisti waliendelea kujilipiza, wakijilipiza na kutoza malipizi kwa mioyo yenye mabezo, wakayazidisha mabaya yao kwa kushika machukio ya kale na kale,[#Yes. 14:29; Yer. 47; Sef. 2:5.]

¹⁶kwa hiyo Bwana Mungu anasema hivi: Mtaniona, nikiwakunjulia Wafilisti mkono wangu, niwaangamize hao Wakreta na kuyapoteza masao yao yaliyoko pwani kwenye bahari.[#1 Sam. 30:14.]

¹⁷Nami nitawatoza malipizi makubwa na kuwapiga kwa makali yenye moto. Ndipo, watakapojua, ya kuwa mimi ni Bwana, nitakapowatoza malipizi yangu.