Maangamaizo ya Waedomu.

¹Neno la Bwana likanijia la kwamba:

²Mwana wa mtu, ielekezee milima ya Seiri uso wako na kuifumbulia yatakayokuwa![#Ez. 25:8,12.]

³Iambie: Hivi ndivyo, Bwana Mungu anavyosema: Utaniona, nikikujia, mlima wa Seiri; nitakukunjulia mkono wangu, nikugeuze kuwa mapori yaliyo peke yao!

⁴Miji yako nitaivunja, iwe mabomoko tu, nawe utakuwa mapori tu; ndipo, utakapojua, ya kuwa mimi ni Bwana.

⁵Kwa kuwa umeshika uchukivu wa kale na kale, ukawabwaga wana wa Isiraeli kwenye panga siku zile, waliposhindwa, ni siku zile, walipolipishwa manza zao, walizozikora.

⁶Kwa hiyo Bwana Mungu anasema: Hivyo, nilivyo Mwenye uzima, nitaimwaga damu yako, nazo damu zitakukimbiza; kwa kuwa hukuchukiwa na kumwaga damu, damu zitakukimbiza.[#Ufu. 16:5-6.]

⁷Nitaigeuza milima ya Seiri kuwa mapori yaliyo peke yao, nikitowesha kwao wapitaji wanaokwenda na kurudi.

⁸Milima yao nitaijaza mizoga yao waliouawa, katika vilima vyako na katika mabonde yako na katika makorongo lyako yote wataanguka waliouawa na panga.

⁹Nitakugeuza kuwa mapori ya kale na kale, miji yako isikae watu tena; ndipo, mtakapojua, ya kuwa mimi ni Bwana.

¹⁰Kwa kuwa ulisema: Hayo mataifa mawili nazo nchi zao mbili zitakuwa zangu, tuzichukue! naye Bwama alikuwa yupo;

¹¹kwa hiyo Bwana anasema: Hivyo, nilivyo Mwenye uzima, nitakufanyizia yayo hayo, uliyoyataka kuyafanya kwa makali yako na kwa wivu wako, uliyoyatenda kwa hivyo ulivyowachukia; ndipo, nitakapojulikana kwao, nitakapokuwa nimekwisha kukuhukumu.

¹²Ndipo, utakapojua, ya kuwa mimi ni Bwana. Nimeyasikia maapizo yako yote, uliyoyasema na kuiapiza milima ya Isiraeli kwamba: Na iwe mapori, tupewe sisi kuila!

¹³Ndivyo, mlivyovikuza vinywa vyenu mbele yangu, nayo maneno yenu, mliyoyasema mbele yangu, yakawa ya majivuno tu; mimi nimeyasikia.

¹⁴Hivi ndivyo, Bwana Mungu anavyosema: Nchi yote nzima itafurahi, nitakapokugeuza kuwa mapori tu.

¹⁵Kama wewe ulivyofurahi, fungu lao walio mlango wa Isiraeli lilipogeuzwa kuwa mapori, hivyo ndivyo, nitakavyokufanyzia: utakuwa mapori tu, mlima wa Seiri, pamoja na nchi yote nzima ya Edomu; ndipo, mtakapojua, ya kuwa mimi ni Bwana.[#Ez. 25:3; Sh. 137:7.]