Anwani.

¹Mimi Paulo ni mtume, lakini sikutumwa na watu wala kwa agizo la mtu, ila nimetumwa kwa agizo lake Yesu Kristo nalo lake Mungu Baba aliyemfufua katika wafu.[#Gal. 1:11-12.]

²Mimi pamoja na ndugu wote walio pamoja nami tunawaandikia ninyi wateule wa Galatia.

³Upole uwakalie na utengemano unaotoka kwa Mungu, Baba yetu, na kwa Bwana Yesu Kristo![#Rom. 1:7.]

⁴Ndiye aliyejitoa kwa ajili ya makosa yetu, apate kutuokoa katika dunia hii mbaya ya sasa. Ndivyo, Mungu, Baba yetu, alivyotaka.[#Gal. 2:20; 1 Tim. 2:6; Tit. 2:14; 1 Yoh. 5:19.]

⁵Huyu atukuzwe kale na kale pasipo mwisho! Amin.

Mbiu nyingine ya Yesu haiko.

⁶Nastaajabu, ya kuwa mwageuzwa upesi hivyo, mwondoke kwake yeye aliyewaita, mgawiwe kipaji chake Kristo, mkafuata utume mwema mwingine.

⁷Tena hakuna utume mwema mwingine, ila wako watu tu wanaowahangaisha; ndio wanaotaka kuugeuza Utume mwema wa Kristo.[#Tume. 15:1,24.]

⁸Lakini ikiwa sisi, au ijapo malaika wa mbinguni, akiwatangazia utume mwema mwingine kuliko ule, tuliowapigia sisi, na awe ameapizwa![#1 Kor. 16:22.]

⁹Tuliyoyasema sasa hivi, narudia kuyasema tena: Mtu akiwatangazia utume mwema mwingine kuliko ule, mlioupokea, na awe ameapizwa!

¹⁰Je? Hayo nayasemea kuitikiwa nao watu au naye Mungu? Au je? Natafuta kuwapendeza watu? Kama ningependeza watu bado, basi, singekuwa mtumwa wake Kristo.[#1 Tes. 2:4.]

Kuitwa kwa Paulo.

¹¹Ndugu zangu, nawatambulisha, ya kuwa Utume mwema uliotangazwa nami sio wa kimtu.

¹²Kwani nami sikuupokea kwa mtu, wala sikufundishwa, ila nimefunuliwa na Yesu Kristo.[#Tume. 9:1-15.]

¹³Kwani mmesikia, nilivyoendelea hapo, nilipolifuata tambiko la Kiyuda, ya kuwa nalijipingia kuwafukuza wateule wa Mungu na kuwajengua.[#Tume. 26:4-20.]

¹⁴Nami hapo, nilipolifuata tambiko la Kiyuda, nikapita wenzangu wengi, ambao tulizaliwa nao mwaka mmoja, maana nilikaza kujihimiza, niandamane nayo, tuliyoyapokea kwa baba zetu.

¹⁵Lakini Mungu alikuwa amenitenga hapo, nilipokuwa tumboni mwa mama yangu, akaniita, nigawiwe kipaji chake.[#Yer. 1:5; Rom. 1:1.]

¹⁶Hapo, alipopendezwa kumfunua Mwana wake moyoni mwangu, kusudi nije, niwapigie wamizimu hiyo mbiu yake njema, papo hapo nikakata mawazo pasipo kuuliza mwili wangu ulio wenye nyama na damu,[#Gal. 2:7; Mat. 16:17.]

¹⁷wala sikupanda kwenda Yerusalemu kwao waliokuwa mitume mbele yangu, ila nalikwenda Arabuni, kisha nikarudi tena Damasko.

¹⁸Miaka mitatu ilipokwisha kupita, nikapanda kwenda Yerusalemu, nijuane na Kefa, nikakaa kwake siku kumi na tano.[#Tume. 9:26.]

¹⁹Lakini hakuna mtume mwingine, niliyemwona, asipokuwa Yakobo, nduguye Bwana.

²⁰Lakini haya, ninayowaandikia, tazameni, Mungu anayajua, ya kuwa sisemi uwongo.

²¹Kisha nikafika upande wa Ushami na Kilikia.[#Tume. 9:30.]

²²Nami nilikuwa sijajulikana uso kwa uso nao wateule wake Kristo walioko Yudea.

²³Ila walikuwa wamesikia tu: Yule aliyetufukuza kwanza sasa huipiga hiyo mbiu njema ya kumtegemea Bwana, alikokuwa amekujengua. Wakamtukuza Mungu kwa ajili yangu.