Sisi tu wana wa Mungu.

¹Nasema: Kibwana siku anapokuwa mchanga bado, hakuna, apitanacho na mtumwa, angawa ni bwana wa vyote,

²ila hana budi kuwatii walezi na watunza mali, mpaka siku zitimie zilizowekwa na baba yake.

³Vivyo hivyo nasi tulipokuwa wachanga tulikuwa tumeyatumikia kitumwa mambo ya kwanza ya humu ulimwenguni.[#Gal. 3:23; 4:8-10; 5:1; Kol. 2:20.]

⁴Lakini siku zilipotimia, Mungu alimtuma Mwanawe, akizaliwa na mwanamke, akawa akiyatii Maonyo,[#Ef. 1:10.]

⁵kusudi awakomboe walioyatii Maonyo, kwamba tupate kuwa wana.[#Gal. 3:13,26.]

⁶Kwa sababu m wana, Mungu alimtuma Roho wa Mwanawe, aingie mioyoni mwetu, ndiye anayetuombea na kulia: Ee, Baba yetu![#Rom. 8:15.]

⁷Kwa hiyo hu mtumwa tena, ila umekuwa mwana. Lakini kama umekuwa mwana, umekuwa hata mrithi wa Mungu kwa kuwa wake Kristo.*[#Gal. 3:29; Rom. 8:16-17.]

Msirudie kuwa wanyonge!

⁸Lakini hapo kale, mlipokuwa hammjui Mungu, mlitumikia miungu isiyo miungu kwa hivyo, ilivyo.

⁹Lakini sasa, mnapomtambua Mungu, tena mnapotambulikana kwake Mungu, mwaigeukiaje tena ile miiko ya kale ikosayo nguvu, iletayo ukiwa tu? Mwatakaje, mwanze kuitumikia tena?[#Kol. 2:20-21.]

¹⁰Mwaangalia sana siku na miezi na miongo na miaka.[#Rom. 14:5; Kol. 2:16.]

¹¹Naogopa kwa ajili yenu kwamba: Labda nimejisumbua kwenu bure.[#2 Yoh. 8.]

Paulo anawaonya kama watoto wake.

¹²Ndugu, nawabembeleza, mwe, kama mimi nilivyo! Maana, mimi ni kama ninyi. Hamkunipotoa lo lote.[#2 Kor. 2:5.]

¹³Lakini mwajua: hapo kwanza nilipowapitia hiyo mbiu njema nilikuwa mnyonge wa mwili;[#Tume. 16:6; 1 Kor. 2:3.]

¹⁴nikawapo nikijaribiwa na mambo yale ya mwili wangu, lakini hamkunibeua, wala hamkunifukuza, ila mmenipokea kama malaika wa Mungu, kama Kristo Yesu mwenyewe.

¹⁵Yale mashangilio yenu sasa yako wapi? Kwani nawashuhudia ninyi kwamba: Kama ingaliwezekana, mngaliyang'oa hata macho yenu, mkanipa.

¹⁶Je? Nimegeuka kuwa mchukivu wenu kwa kuwaambia yaliyo ya kweli?[#Amo. 5:10.]

¹⁷Wanavyowahimiza, si vizuri, ila wanataka kuwatenganisha na sisi, mpate kujihimiza kuwatumikia wao.[#Gal. 1:7.]

¹⁸Ni vizuri kujihimiza kwa ajili ya jambo zuri po pote, msijihimize hapo tu, nikiwako kwenu.

¹⁹Watoto wangu, ninao uchungu, kama nitawazaa mara ya pili, mpaka Kristo aonekane kuwa yumo mwenu.[#1 Kor. 4:15.]

²⁰Ingefaa, niwe kwenu sasa, nikaweza kuigeuza sauti yangu, maana ninawahangaikia ninyi.

Sara na Hagari.

²¹Mniambie ninyi mnaotaka kujitwika Maonyo: Hamyasikii Maonyo?[#Gal. 3:23; 4:9.]

²²Kwani imeandikwa: Aburahamu alikuwa na wana wawili waume, mmoja wa kijakazi, mmoja wa mkewe mwenyewe.[#1 Mose 16:15; 21:2.]

²³Lakini yule wa Kijakazi alizaliwa kwa tamaa ya mwili, lakini yule wa mwungwana alizaliwa kwa nguvu ya kiagio[#Rom. 9:7-9.]

²⁴Mambo hayo yako na maana: kwani wale wanawake wawili ndio maagano mawili. La kwanza ndilo lililotokea mlimani kwa Sinai, linalozaa watumwa tu; hili ndio Hagari.[#Gal. 5:1; Rom. 8:15.]

²⁵Maana mlima wa Sinai huitwa Hagari kule Arabuni; nao umelingana na Yerusalemu wa sasa, kwani uko utumwani pamoja na watoto wake.

²⁶Lakini ule Yerusalemu wa juu ndio yule mwungwana, naye ndiye mama yetu sisi.[#Ebr. 12:22.]

²⁷Kwani imeandikwa:

Shangilia, wewe uliye mgumba, usiyezaa!

Jichekelee na kupaza sauti, wewe usiyeona uchungu wa

kuzaa!

Kwani wana wake yule aliye peke yake ni wengi

kuliko wana wake yule aliye na mumewe.

²⁸Lakini ninyi ndugu, mmekuwa wana wa kiagio kama Isaka.

²⁹Lakini kama hapo kale yule aliyezaliwa kwa tamaa ya mwili alivyomchokoza yule aliyezaliwa kwa nguvu ya Roho, ndivyo, vilivyo hata sasa.[#Gal. 4:23; 1 Mose 21:9.]

³⁰Lakini Maandiko yasemaje?

Mfukuze huyu kijakazi pamoja na mwanawe!

Kwani mwana wa kijakazi hatapata urithi

pamoja na mwana wa mwungwana.

³¹Kwa hiyo, ndugu, sisi hatu watoto wa kijakazi, ila wake mwungwana.[#Gal. 3:29.]