Mfumbuaji anamwomba Mungu kwa kumtegemea.

¹Bwana, nimeusikia utume wako, nikaogopa.

Bwana, itokeze kazi yako, iwepo katika miaka ijayo!

²Ijulishe katika miaka ijayo!

Ukikasirika zikumbuke

huruma! (Kituo.)

³Mungu alikuja toka Temani, Mtakatifu alitoka mlimani

kwa Parani.

Utukufu wake huzifunika mbingu, nchi hii nayo hujaa

matukuzo yake.

⁴Huangaza kama mwanga wa jua,

miali hutoka mkononi mwake;

ndimo, nguvu zake zifichikamo.

⁵Magonjwa yauayo humtangulia,

nazo homa kali huifuata miguu yake.

⁶Anaposimama ndipo, anapoitetemesha nchi;

anapochungulia ndipo, anapoyastusha mataifa.

Milima iliyoko toka kale huatuka,

vilima vilivyoko kale na kale huangukiana chini;

ni vilevile, alivyovikanyaga juu tangu kale alipopita.

⁷Vijumba vya Wanubi niliviona vyenye shida,

nayo mahema ya nchi ya Midiani yakatikisika.

⁸Je? Bwana anaikasirikia mito?

Makali yako yataitokea mito?

Je? Machafuko yako yanaiendea bahari?

Kwa kuwa unavutwa na farasi katika gari lako lishindalo!

⁹Uta wako umefunuliwa, utokee waziwazi,

kama ulivyoziapia koo za watu kwa neno lako (Kituo.)

Unapoipasua nchi, hapo hutokea majito.

¹⁰Ukioneka, milima hustuka, nayo

mafuriko ya maji huzidi,

vilindi vya baharini huvuma na kuikweza mikono yao juu.

¹¹Jua na mwezi husimama kwao, mishale yako ikija kumulika,

nao umeme wa mkuki wako ukimetameta.

¹²Kwa kukasirika unaikanyaga nchi,

kwa kuchafuka unayaponda mataifa.

¹³Umetokea kuwaokoa walio ukoo wako,

upate kumwokoa uliyempaka mafuta,

ukaviponda vichwa vyao wasiokucha nyumbani mwao,

ukazibomoa toka misingi hata vipaani. (kituo.)

¹⁴Kwa mikuki yao unavichoma vichwa vya vikosi vyao

vijavyo mbio kama kimbunga kunikimbiza mimi

na kunizomea kama watu wanaotaka kula mnyonge fichoni pake.

¹⁵Lakini wewe ukaja na kuikanyaga bahari

ukipanda farasi wako, ijapo maji mengi yavume.

¹⁶Nilipoyasikia, ndipo, tumbo langu lilipotetemeka,

midomo yangu nayo ikajipigapiga kwa uvumi wao,

ugonjwa wa ubovu ukaingia mifupani mwangu,

nikatetemeka wote hata chini, niliposimama,

kwa sababu sina budi kuingoja siku ya kusongwa,

itakapolipata lile kabila lililokuja kutushambulia.

¹⁷Kwani mkuyu hauchanui, wala mizabibu haizai,

vichipukizi vya mchekele navyo hudanganya,

mashamba ya ngano hayaleti chakula,

kondoo wametoweka mazizini kwao,

hata ng'ombe hamna vibandani mwao.

¹⁸Lakini mimi ninayemfurahia, ndiye Bwana,

ninamshangilia Mungu wangu aliyeniokoa.

¹⁹Bwana Mungu ndiye aliye nguvu yangu!

Anipa miguu ipigayo mbio kama yake kulungu,

akiniendesha vema, nifike juu vilimani kwangu.

Kwa mwimbishaji, ayaimbie mazeze yangu.