Mapatilizo ya mji wa Babeli.

¹Tamko zito la kuwaambia Wababeli, Yesaya, mwana wa Amosi, aliloliona:[#Yer. 50—51.]

²Twekeni bendera mlimani juu kileleni palipokatwa miti!

Walioko karibu wapalizieni sauti na kuwapungia mikono,

waje kuingia malangoni mwenye wakuu wa nchi!

³Wao waliojitakasia mimi nimewaagiza kuja huku,

nikawaita nao walio mafundi wangu wa kupiga vita,

wapige yowe na kujikuza wakiyatimiza makali yangu.

⁴Makelele mengi mno yako milimani kama ni ya watu wengi,

sauti za uvumi ziko za wafalme wanaokusanya watu wao.

Bwana Mwenye vikosi anavitazama

vikosi vyake vya kwenda vitani.

⁵Wamekuja na kutoka nchi za mbali mapeoni kwa mbingu,

yeye Bwana na vyombo vya machafuko yake

vitakavyoziangamiza nchi zote.

⁶Pigeni vilio! Kwani siku ya Bwana iko karibu;

itakuja kama pigo la umeme, likitoka kwake Mwenyezi.

⁷Kwa hiyo mikono yote italegea,

nayo mioyo yote ya watu itayeyuka.

⁸Vituko na masongano na maumivu yatawashika,

wajipinde kama mzazi,

watatumbulizana macho kwa kushangaa,

nyuso zao zitawaiva kama ni zenye moto.

⁹Tazameni: Siku ya Bwana inakuja,

inaleta mastuko na makali na machafuko yenye moto,

yaziangamize nchi, ziwe jangwa,

kwa kuwamaliza wakosaji, wasikae.

¹⁰Kwani nyota za mbinguni kama kilimia na wenziwe

hazitaangaza mwanga wao,

jua nalo litakapokucha litakuwa jeusi lenye giza,

nao mwezi hautaumulikisha mwanga wake.

¹¹Nitayaumbua mabaya kwao wakaao nchini,

nayo mapotovu yao kwao wasionicha,

niyanyamazishe majivuno yao wajitutumuao,

niwanyenyekeze wakorofi wajiwaziao kuwa wakuu.

¹²Nitafanya, watu wawe wachache kuliko dhahabu,

kweli wenye kufa watakuwa haba kuliko dhahabu ya Ofiri.

¹³Kwa sababu hii nitazitikisa mbingu,

nayo nchi itatenguliwa mahali pake kwa kutetemeka,

makali ya Bwana Mwenye vikosi yatakapotokea,

siku ya kuyaleta machafuko yake yenye moto itakapotimia.

¹⁴Watakuwa kama paa akimbiaye kwa kustushwa

au kama kondoo wakosao mchungaji;

ndivyo, watakavyowageukia kila mtu wenziwe wa kwao,

ndivyo, watakavyokimbilia kila mtu shamba lake.

¹⁵Kwani kila atakayeonekana atachomwa,

kila atakayekamatwa atauawa kwa upanga.

¹⁶Nao watoto wao wachanga watapondwa machoni pao,

nyumba zao zitatekwa, wanawake wao watatiwa soni.

¹⁷Jueni, nitawaletea Wamedi wasiotaka fedha,

wasiopendezwa na dhahabu.

¹⁸Lakini pindi zao hupiga vijana, wafe;

hata wenye mimba hawawaonei huruma,

wala macho yao hayatazami watoto, waache kuwaua.

¹⁹Kweli Babeli umekuwa urembo wa wafalme

nao utukufu, Wakasidi waliojivunia,

lakini Mungu atauangamiza,

kama alivyoiangamiza miji ya Sodomu na ya Gomora.

²⁰Hautakaa kale na kale, wala havitatua humo vizazi na vizazi,

Waarabu tu hawatapiga mle mahema yao,

wala wachungaji hawatawapumzisha kondoo wao hapohapo.

²¹Ila nyama wa porini watalala hapo,

nyumba zao zitajaa mabundi,

nao mbuni watalala huko,

hata mashetani watachezacheza hapo.

²²Mbwa wa mwitu watalia majumbani mwao,

nao mbweha katika nyumba zao zilizokuwa na furaha tu.

Kweli mwisho wa mji huo uko karibu kutimia,

siku zake hazitakawilia.