Shangilio lao Waisiraeli waliookoka Babeli.

¹Kwani Bwana atawahurumia wa Yakobo,

atawachagua Waisiraeli tena,

awarudishe katika nchi yao, watue kuko huko,

hata wageni wataandamana nao,

wajitie katika mlango wa Yakobo.

²Watu wengine watawachukua, wawapeleke kwao,

kisha mlango wa Isiraeli utawatumia katika nchi ya Bwana

kuwa watumishi wao wa kiume na wa kike.

Hivyo watawateka waliowateka, wawatawale waliowasonga.

³Hapo Bwana atakapokupatia pa kutulia na kuyapumzikia masumbufu na mahangaiko na matumishi yako magumu, waliyokutumikisha,

⁴utamwimbia mfalme wa Babeli wimbo huu wa kumfyoza kwamba:

Kumbe mwenye kusonga ametulia!

Kumbe napo tulipoumizwa pametulia!

⁵Bwana amezivunja fimbo zao wasiomcha,

fimbo zao waliotutawala!

⁶Ni zile fimbo zao walioyapiga

makabila ya watu kwa ukali pasipo kukoma.

Ni fimbo zao walioponda mataifa mazima

wakiyakanyaga kwa ukali tu pasipo huruma.

⁷Nchi yote nzima imetulia kimya, wote pia wanapiga shangwe.[#Hab. 2:20.]

⁸Hata mivinje imefurahi pamoja na miangati ya Libanoni kwamba:

Tangu hapo ulipotulizwa hakuna aliyepanda kutukata.

⁹Kule chini kuzimuni kumevurugika kwa ajili yako:

kwa kungoja, uje, kukawaamsha wazimu wote,

waliokuwa wenye nguvu katika nchi,

kukawainua wafalme wote, wao wa kimizimu,

waondoke katika viti vyao vilivyo vya kifalme.

¹⁰Wote pamoja wanakuzomea kwamba:

Kumbe nawe umegeuzwa kuwa mnyonge kama sisi!

Ukafananishwa kuwa sawasawa kama sisi!

¹¹Kumbe nao utukufu wako umekumbwa kushuka kuzimuni

pamoja na milio ya mapango yako!

Chini umetandikiwa funyo kuwa kilalio chako,

nalo blanketi lako la kujifunika ni vidudu.

¹²Kumbe umeanguka toka mbinguni,

ulimokuwa nyota yenye mwanga

uliokuwa kama mwanga wa macheche ya jua!

Kumbe umepondwa, ukaanguka chini

uliyeyalaza mataifa chini yako!

¹³Nawe ulijiwazia moyoni mwako kwamba:

Na nipande mbinguni kwenye nyota za Mungu,

nikisimike kiti changu cha kifalme huko juu,

nikae mlimani kwa miungu mapeoni kwa kaskazini!

¹⁴Na nipande kupita mawingu yaliyoko mbinguni juu,

nijifananishe kuwa sawasawa naye Mwenyezi!

¹⁵Kumbe umeshushwa kuzimuni mapeoni kwenye mashimo!

¹⁶Wakuonao watakutumbulia macho, wakutambue kwamba:

Je? Huyu siye aliyeitetemesha nchi,

aliyewatikisa nao wafalme?

¹⁷Je? Siye aliyezigeuza nchi kuwa mapori tu?

Je? Siye aliyebomoa miji mizima?

Je? Siye aliyewakataza wafungwa wake, wasirudi kwao?

¹⁸Wafalme wote wa kimizimu hulala kwenye utukufu,

kila mtu chumbani mwake;

¹⁹lakini wewe umetupwa mbali, usifike kaburini mwako,

ukawa kama tawi litapishalo watu,

ukafunikwa na mizoga yao waliochomwa kwa panga,

waliotupwa mashimoni kwenye majiwe,

ukawa kama kibudu kinachokanyagwa.

²⁰Wewe hutafika kaburini pamoja nao wale,

kwani nchi yako umeiangamiza, nao walio ukoo wako umewaua.

Uzao wao wasiomcha hautatajwa kale na kale.

²¹Watu husema: Na tuwatengenezee wana wao pa kuwachinjia

kwa ajili ya manza, baba zao walizozikora,

wasije kuinuka tena na kutwaa nchi

na kupajaza hapa juu nchini miji yao!

²²Ndivyo, asemavyo Bwana Mwenye vikosi:

Nitawainukia, niling'oe jina la Babeli nalo sao lake,

wanawe na wajukuu; ndivyo, asemavyo Bwana.

²³Nitaiweka nchi yao kuwa kao lao nungu,

iwe yenye mabwawa ya matopetope tu;

nitapazoa kabisa na kutumia kizoleo kiangamizacho!

Ndivyo, asemavyo Bwana Mwenye vikosi.

Kuangamia kwao Waasuri.

²⁴Bwana Mwenye vikosi ameapa kwamba:

Kama nilivyoyawaza moyoni, yatakuwa vivyo hivyo;

kama nilivyokata shauri, yatatimia vivyo hivyo.

²⁵Nitawaponda Waasuri katika nchi yangu,

nitawamaliza na kuwakanyagakanyaga mlimani kwangu.

Mizigo yao iondoke kwao wanaokaa kule,

hata miti ya kuchukulia mizigo iondoke kwao mabegani.

²⁶Hili ndilo shauri, alilozipigia nchi zote;

kwa hiyo mkono wake uko umewakunjukia wamizimu wote.

²⁷Kwani Bwana Mwenye vikosi akikata shauri,

yuko nani atakayelitangua?

Yuko nani atakayeukunja mkono wake uliokunjuka?

Kuangamia kwao Wafilisti.

²⁹Ninyi wa nchi nzima ya Ufilisti, msifurahie kwamba:

Fimbo iliyotupiga imevunjika!

Kwani kooni mwa nyoka atatoka pili,

naye atazaa nondo mwenye mabawa.

³⁰Hapo ndipo, wanyonge waliosongeka sana watakapolisha,

nao wakiwa watalala hapohapo na kutulia vizuri;

lakini mizizi yako nitaifisha kwa njaa,

nao watakaosalia atawaua yule nondo.

³¹Piga kilio, wewe lango! Omboleza, wewe mji!

Zimia, nchi nzima ya Ufilisti!

Kwani uko moshi utakaotoka kaskazini,

kwao asiwe atakayeachwa peke yake kambini.

³²Nao majumbe wa taifa la kimizimu watapata jibu gani?

Ni hili: Bwana ameushikiza Sioni!

Wanyonge wao walio ukoo wake watapakimbilia!