Mapatilizo ya Wamoabu.

¹Kumbe Ari wa Moabu umebomolewa usiku, ukaangamia!

Kumbe Kiri wa Moabu nao umebomolewa usiku!

²Wabeti na Wadiboni wanapanda vilimani kupiga vilio;

kule Nebo na Medeba Wamoabu wanaomboleza,

vichwa vyao vyote viko na vipara,

nazo ndevu zote zimekatwa.

³Wakitoka nje huwa wamejivika magunia,

wao wote, kama wamo vipaani au kama wamo mawanjani,

wanapiga vilio na kutoa machozi.

⁴Wahesiboni na Waelale wanapiga makelele,

sauti zao zinasikilika mpaka Yasa.

Kwa hiyo nao wapiga vita wa Moabu wanapiga yowe,

maana mioyo yao imekwisha kuwa mibaya.

⁵Moyo wangu unawalilia Wamoabu,

kwa kukimbizwa wamefika Soari na Eglati wa tatu,

hata njia za Luhiti watu wanazipanda na kulia,

vilevile njiani kwenda Horonemu

wanapiga makelele ya kuyalilia maangamizo.

⁶Kwani maji ya Nimurimu yamekupwa, pakawa nyika,

majani ya hapo yamenyauka, malisho yamekauka,

hakuna kitakachoota hapo tena.

⁷Kwa sababu hii wanayapeleka masao ya mali zao,

hata malimbiko yao, wayavushe mtoni huko nyikani.

⁸Vilio vimezunguka kwenye mipaka yote ya Moabu,

maombolezo yao yanasikilika mpaka Eglemu,

hata Beri-Elimu yamefika maombolezo yao.

⁹Kwani maji ya Rimoni yamejaa damu;

nao Wamoabu waliokimbilia Dimoni

nitawaletea kibaya kingine:

ni simba atakayewamaliza

pamoja nao waliosalia katika nchi yao.