Mapatilizo ya Damasko.

¹Na mwone, mji wa Damasko ukiondolewa, usiwe mji,

utakuwa chungu la mawe yatawanyikayo.

²Miji ya Aroeri itakuwa imeachwa nayo, itakuwa malisho,

makundi yatapumzikia hapo pasipo kuona atakayeyastusha.

³Hivyo ngome ya Efuraimu itapotea,

ufalme utakapoondoka Damasko,

nalo sao la Ushami litakuwa kama utukufu wa Waisiraeli;

ndivyo, asemavyo Bwana Mwenye vikosi.

⁴Siku ile ndipo, utukufu wa Yakobo utakapopunguka sana,

nao mwili wake mnene utakuwa gofu la mtu tu.

⁵Itakuwa kama mvunaji akishika manyasi,

mkono wake ukate masuke,

au itakuwa kama mtu akitaka kuokota masuke

katika bonde la Refaimu.

⁶Watakaosalia watakuwa wa kuokoteza,

itakuwa kama penye mavuno ya matunda ya mchekele:

mawili matatu yatasalia kileleni juu kabisa,

manne matano yatasalia katika matawi ya mti, ulioyazaa;

ndivyo, asemavyo Bwana Mungu wa Isiraeli.

⁷Siku ile watu watamtazamia tena aliyewaumba,

macho yao yatamwelekea Mtakatifu wa Isiraeli;

⁸hawatapatazamia tena mahali pao pa kutambikia,

mikono yao ilipopatengeneza,

wala hawatataka kuiona tena mifano ya mwezi wala ya jua,

waliyoifanya kwa vidole vyao.

⁹Siku ile miji yenu yenye maboma itageuka

kuwa kama mahame ya mwituni au ya milimani,

waliyoyaacha walipowakimbia Waisiraeli,

maana itakuwa peke yao tu pasipo watu.

¹⁰Kwani umemsahau Mungu aliye wokovu wako,

hukuukumbuka mwamba ulio nguvu yako.

Kwa hiyo panda tu mashamba ya kupendeza

na kumwaga mle mbegu za miti migeni!

¹¹Siku ya kupandia uzichipuze, kesho zipate kuchanua!

Lakini mavuno yatakuwa yamekimbia siku ile,

utakapougua kwa kupatwa na maumivu yasiyopona.

Mapatilizo yao wawasongao Waisiraeli.

¹²Je? Uvumi gani huu wa makabila mengi ya watu?

Wanavuma, kama maji yanavyovuma yakiwa mengi.

Ni ngurumo gani ya makabila ya watu?

Wananguruma kama ni ngurumo ya maji yenye nguvu.

¹³Lakini ijapo makabila ya watu yangurume,

kama maji mengi yanavyonguruma,

yeye atakapowakaripia, watakimbia mbali sana,

watafukuzwa, waruke kama makapi,

yakipeperushwa na upepo vilimani juu,

au kama mavumbi, yakichukuliwa na kimbunga.

¹⁴Ilipokuwa jioni, mastuko yakawa yangaliko bado,

lakini kulipotaka kupambazuka, yalikuwa yametoweka.

Hilo ndilo fungu lao waliotaka kututeka,

hilo ndilo gawio, kura lililowapatia wao

waliotaka kuzipokonya mali zetu.