Mapatilizo ya Misri.

¹Tazameni: Bwana amepanda wingu jepesi, aje Misri!

Vinyago vya Misri vinatikisika usoni pake,

mioyo yao Wamisri imeyeyuka vifuani mwao.

²Nitawachochea Wamisri, wapigane na Wamisri wenzao,

wagombane mtu na ndugu yake, hata mtu na mwenziwe,

hata mji upigane na mji mwingine,

vilevile ufalme ugombane na ufalme mwingine.

³Hapo ndipo, roho zao Wamisri zitakapozimia vifuani mwao,

nikiitengua mizungu yao; nao watatafuta msaada

kwa vinyago na kwa waganga, kwa wachawi na kwa waaguaji.

⁴Nitawafungia Wamisri mikononi mwa bwana mgumu,

mfalme, mwenye ukorofi, awatawale!

Ndivyo, asemavyo Bwana aliye Bwana Mwenye vikosi.

⁵Kisha maji yatakupwa baharini,

nao mto mkubwa utakauka, pawe pakavu tu.

⁶Mifereji mikubwa ya maji itanuka vibaya,

nayo mito ya Misri ya chini itakuwa minyonge,

kisha itakauka nayo,

hata matete na manyasi yatanyauka.

⁷Viwanda vilivyoko kando ya mto kwenye kingo za mto,

nayo mashamba yote ya mtoni yatanyauka,

yatakauka kabisa yatoweke.

⁸Wavuvi watalia, pamoja nao wote

waliokamata samaki mtoni kwa ndoana watasikitika,

nao waliotanda nyavu majini watafifia.

⁹Hata wafanyao kazi za pamba wataangamia

pamoja nao wafumao nguo nyeupe.

¹⁰Hivyo misingi yao itakuwa imepondeka,

wote wafanyao kazi za kibarua wataumia rohoni.

¹¹Wakuu wa Soani watakuwa wamepumbaa kabisa;

nao wajuzi wa Farao wasiokosa mizungu,

hapo mizungu yao itakuwa ujinga tu.

Mtawezaje kumwambia Farao: Mimi ni mwana wao watambuzi?

au: Mimi ni mwana wao wafalme wa kale?

¹²Sasa watambuzi wako wako wapi?

Kama wanalitambua, na wakufumbulie shauri,

Bwana Mwenye vikosi aliloikatia nchi ya Misri!

¹³Wakuu wa Soani ni wajinga kweli,

nao wakuu wa Nofu wamedanganyika,

waliokuwa vichwa vya milango wameiangamiza Misri.

¹⁴Bwana amemwaga mioyoni mwao roho za kizunguzungu,

wawapoteze Wamisri katika matendo yao yote,

wapepesuke kama mlevi kwenye matapiko yake.

¹⁵Hakuna tendo tena, Wamisri, watakalolitenda,

kama ni kichwa au mkia, kama ni makuti au majani.

Wamisri na Waasuri na Waisiraeli pamoja watamtambikia Mungu.

¹⁶Siku zile Wamisri watakuwa kama wanawake, watetemeke kwa kuyastukia matisho ya mkono wa Bwana Mwenye vikosi, atakaowakunjulia.

¹⁷Hapo nchi ya Yuda itawawia Wamisri kitisho, kila mtu aingiwe na kituko atakaposikia, ikitajwa, kwa ajili ya shauri la Bwana Mwenye vikosi, alilowakatia.

¹⁸Siku ile miji mitano itakuwako katika nchi ya Misri itakayosema msemo wa Kanaani, itakayoapa na kulitaja Jina la Bwana Mwenye vikosi, mmoja wao utaitwa Mji wa Mabomoko.[#Yes. 65:16; Yer. 12:16.]

¹⁹Siku zile patakuwako pa kumtambikia Bwana katika nchi ya Misri katikati na nguzo ya Bwana iliyojengwa kwa mawe mpakani kwake.

²⁰Hivyo Bwana Mwenye vikosi atakuwa na kielekezo cha kumshuhudia katika nchi ya Misri; napo, watakapomlilia Bwana kwa ajili yao wawasongao, atatuma mwokozi, awagombee, awaponye.

²¹Ndivyo, Bwana atakavyojulikana kwa Wamisri, kweli Wamisri watamjua Bwana siku zile, watamtumikia na kumtolea ng'ombe za tambiko na vipaji vingine vya tambiko, nayo waliyomwagia Bwana kumpa, watayalipa.

²²Itakuwa hivyo: Bwana akiwapiga Wamisri na kuwaponya, nao wakimrudia Bwana, atawaitikia, wakimwomba, awaponye kabisa.

²³Siku zile itakuwako barabara toka Misri kwenda Asuri, nao Waasuri watakuja Misri, nao Wamisri watakuja Asuri kuamkiana, hivyo Wamisri na Waasuri watatumikiana.

²⁴Siku zile Isiraeli atakuwa wa tatu wa kupatana na Misri na Asuri, hawa watakuwa mbaraka katika nchi katikati.

²⁵Naye Bwana Mwenye vikosi atawabariki na kusema: Wabarkiwe Wamisri walio ukoo wangu! Wabarikiwe Waasuri walio kazi ya mikono yangu! Wabarikiwe Waisiraeli walio fungu langu, nililojipatia![#Rom. 15:10.]