Yerusalemu utakuwa ufalme wa utengemano.

¹Hili ni neno, Yesaya, mwana wa Amosi, aliloliona la Yuda na la Yerusalemu:

²*Mwisho wa siku utakapotimia,

mlima wenye Nyumba ya Bwana utakuwa umeshikizwa na nguvu,

uwe wa kwanza wa milima, uende juu kuliko vilima vingine,

hata wamizimu wote wataukimbilia.

³Makabila mengi ya watu watakwenda wakisema:

Njoni, tupande mlimani kwa Bwana

kwenye Nyumba ya Mungu wa Yakobo!

Atufundishe, njia zake zilivyo,

tupate kwenda na kuifuata mikondo yake!

Kwani ufundisho utatoka Sioni,

namo Yerusalemu litatoka Neno la Bwana.

⁴Ndipo, atakapowaamulia wamizimu

na kuyapatiliza makabila mengi ya watu;

nao watazifua panga zao kuwa majembe,

hata mikuki yao kuwa miundu,

kwani halitakuwako tena kabila

litakalochomolea jingine upanga,

wala hawatajifundisha tena mapigano ya vita.

Mapatilizo yao waliomwacha Mungu.

⁵Mlio wa mlango wa Yakobo, njoni,

tuendelee pamoja katika mwanga wa Bwana!*

⁶Kwani umewatupa wao waliokuwa ukoo wako,

wale wa mlango wa Yakobo,

kwani wamejaa mambo yatokayo maawioni kwa jua,

huagulia mawingu kama Wafilisti,

hufanya maagano nao vijana wa nchi ngeni.

⁷Nchi yao ikajaa fedha na dhahabu, malimbuko yao hayana mwisho;

nchi yao ikajaa farasi, magari yao hayana mwisho.

⁸Nchi yao ikajazwa vinyago;

huziangukia kazi za mikono yao, walizozitengeneza kwa vidole vyao.

⁹Watu wakavinyenyekea, mabwana nao wakaviinamia;

hivi hatawaondolea kabisa.

¹⁰Nenda magengeni! Jifiche uvumbini!

Usiuone uso wake ukutishao wala utukufu wa ukuu wake!

¹¹Macho ya watu wajivunao yatanyenyekezwa,

nao waume wajikwezao watainamishwa,

kwa maana atakayetukuka siku ile ni Bwana peke yake.

¹²Kwani siku ya Bwana Mwenye vikosi itawajia watu,

wanyenyekezwe wenye majivuno na ukuu, nao wajitukuzao;

¹³nayo miangati ya Libanoni iliyo mikubwa na mirefu,

nayo mikwaju yote ya Basani inyenyekezwe,

¹⁴nayo milima mirefu yote,

hata vilima vyote vinavyokwenda juu sana;

¹⁵nayo minara mirefu yote,

hata maboma yote yenye nguvu;

¹⁶nazo merikebu zote za Tarsisi ziletazo mali

na vitu vizuri vyote pia, watu wanavyovitamani.

¹⁷Nao watu wajivunao watainamishwa,

hata waume wajikwezao watanyenyekezwa,

kwa maana atakayetukuka siku ile ni Bwana peke yake,

¹⁸navyo vinyago vitatoweka vyote pia.

¹⁹Ndipo, watakapokwenda mapangoni kwenye magenge

namo mashimoni kwenye nchi kavu,

wasiuone uso wa Bwana uwatishao wala utukufu wa ukuu wake,

atakapoinuka kuistusha nchi.

²⁰Siku ile watu watavikupa vinyago vyao,

ijapo viwe vya fedha na vya dhahabu;

hivyo, walivyojifanyizia vya kuvitambikia,

watavitupa kwenye panya na mapopo,

²¹wapate kujiendea kwenye nyufa za magenge

na kwenye mapango ya miamba,

wasiuone uso wa Bwana uwatishao wala utukufu wa ukuu wake,

atakapoinuka kuistusha nchi.

²²Sasa waacheni wale watu! Nao puani mwao ni pumzi tu;

huwaziwa kuwa nini?