Kuangamia kwa Babeli.

¹Kama upepo wenye nguvu unavyovuma upande wa kusini,

ndivyo, mambo yanavyotoka nyikani katika nchi inayoogopwa.

²Nimefumbuliwa na kuonyeshwa yenye ugumu:

mdanganyifu hudanganya, naye mwangamizaji huangamiza.

Pandeni, Waelamu! Shambulieni, Wamedi!

Hivyo nitawanyamazisha wote waliowapigia kite.

³Kwa hiyo viuno vyangu vimeenea kukauka,

uchungu ukanishika kama uchungu wa mwanamke azaaye,

kizunguzungu kikanipata, nisisikie, nikastushwa, nisione.

⁴Roho yangu ikazimia, mastuko yakanigundua;

saa za jioni, nilizozipenda, zikawa za kunitetemesha.

⁵Wao hutandika meza, huweka wangoja zamu, hula, hunywa.

Mara wanaambiwa: Inukeni, wakuu! Zipakeni ngao mafuta!

⁶Kwani ndivyo, Bwana alivyoniambia:

Nenda, uweke mlinzi, akuambie, atakayoyaona!

⁷Atakapoona kikosi cha watu waliopanda farasi,

wakienda wawiliwawili,

hata kikosi cha punda na kikosi cha ngamia,

na aangalie sana kwa uangalifu mwingi.

⁸Akaita na kupaza sauti kama simba kwamba:

Bwana, hapa kilindoni mimi ninasimama mchana kutwa,

nao usiku kucha nimewekwa mimi kungoja hapa kidunguni.

⁹Sasa tazameni! Panakuja kikosi cha watu

waliopanda farasi wakienda wawiliwawili!

Kisha akasema: Umeanguka! Umeanguka mji wa Babeli!

Navyo vinyago vyake vyote vya miungu yao

amevivunja na kuvitupa chini.

¹⁰Ninyi wenzangu mliopigwa,

kama mpunga unavyopigwa penye kuupuria,

niliyoyasikia kwa Bwana Mwenye vikosi, Mungu wa Isiraeli,

nimewatangazia ninyi.

Patilizo la Edomu.

¹¹Toka Seiri wananiita kwamba:

Mlinzi, saa ngapi sasa za usiku?

Mlinzi, saa ngapi sasa za usiku?

¹²Mlinzi akajibu: Ijapo mapema yaje,

usiku utakuwa ungalipo.

Kama mnataka kuuliza mengine, haya! Ulizeni!

Patilizo la Arabia.

¹³Sharti mlale kwenye mapori nyikani,

ninyi watembezi wa Dedani!

¹⁴Waliokufa kiu wapelekeeni maji,

ninyi mkaao katika nchi ya Tema!

Waliokimbia wagawieni vilaji vya kuwatunza!

¹⁵Kwani wamezikimbia panga,

zile panga walizochomolewa wao,

wamezikimbia nazo pindi, walizovutiwa,

hata uzito wote wa vita.

¹⁶Kwani ndivyo, Bwana alivyoniambia:

Ungaliko bado mwaka, kama miaka ya kibarua ilivyo,

ndipo, utukufu wote wa Kedari utakapokuwa umekwisha.

¹⁷Watakaosalia kwa wana wa Kedari walio wenye nguvu

katika hesabu yao ya wavuta pindi watakuwa wachache,

kwani Bwana Mungu wa Isiraeli amevisema.