Mapatilizo ya Yerusalemu.

¹Mmeona nini mkipanda wote vipaani?[#Yes. 15:3.]

²Wewe mji uliojaa makelele ya machafuko,

mliomo na wapiga vigelegele,

watu wako waliouawa hawakuuawa kwa panga,

wala hawakufa vitani.

³Wakuu wako wamekimbia wote pamoja,

wakatekwa pasipo upindi,

nao watu wako waliopatikana wametekwa wote,

nao waliokimbia mbali.

⁴Kwa hiyo nimesema: Msinitumbulie macho,

nilie kwa uchungu!

Wala msinibembeleze na kunituliza moyo

kwa ajili ya kuangamia kwao walio wazaliwa wa ukoo wangu!

⁵Kwani siku ya mastuko na ya maangamizo na ya machafuko

imetoka kwake Bwana Mungu Mwenye vikosi,

ikaja Bondeni kwenye Maono,

ni siku iliyobomoa maboma,

vilio vyake vikasikilika mlimani.

⁶Waelamu wameshika mapodo, wakapanda magari na farasi,

Wakiri nao wakazifunua ngao.

⁷Ndipo, mabonde yako mazuri yalipojaa magari,

nao wapanda farasi wakajisimamisha

upande wa lango la maji.

⁸Hivyo akayafunua, ambayo Wayuda walijifunika nayo,

siku ile wakayatazamia mata

yaliyowekwa katika nyumba ya mwituni.

⁹Mkapaona, mji wa Dawidi ulipobomokabomoka,

ya kuwa ni pengi,

mkayakusanya maji ya ziwa la chini.

¹⁰Mkazihesabu nazo nyumba za Yerusalemu,

mkabomoa nyingine, mpate ya kuujengajenga ukuta wa boma.

¹¹Katikati ya kuta mbili za boma mkatengeneza mahali,

pawe pa kukusanyia maji ya ziwa la kale.

Lakini yeye aliyeyafanya mambo hayo hamkumtazama,

hamkumwona aliyeyalinganya, yalipokuwa yangaliko mbali.

¹²Bwana aliye Bwana Mwenye vikosi aliwaita siku ile,

mlie na kuomboleza, mnyoe vichwa na kuvaa magunia.

¹³Kumbe mkacheza na kufurahi,

mkaua ng'ombe, mkachinja nao kondoo,

mkala nyama, mkanywa mvinyo, mkasema:

Na tule, na tunywe! Kwani kesho tutakufa!

¹⁴Kwa hiyo Bwana Mwenye vikosi ameyafumbua masikioni mwangu:

Mpaka mtakapokufa, hamtaondolewa kabisa

manza hizi, mlizozikora.

Ndivyo, anavyosema Bwana Mungu Mwenye vikosi.

Sebuna anaondolewa katika utunzaji wake.

¹⁵Ndivyo, anavyosema Bwana Mungu Mwenye vikosi:

Nenda, uje kwake huyo mtunza mali,

huyo Sebuna aliye mkuu wa nyumba ya mfalme.

¹⁶Unafanya nini hapa? Kuna nani wa kwenu huku?

Kumbe unajichimbia kaburi hapa!

Kweli unajichimbia hapa juu kaburi lako,

unajichongea magengeni kao lako!

¹⁷Tazama, Bwana atakutupa na kukubwaga kwa nguvu!

Wewe mtu wa kiume atakukunja kabisa.

¹⁸Atakuzinga, uviringane kama mpira,

akutupe katika nchi iliyopanuka pande mbili;

ndiko, utakakokufa,

ndiko, magari yako mazuri yatakakokufuata

wewe uliyeitweza Nyumba ya Bwana wako.

¹⁹Nitakutangua katika utunzaji wako,

nitakuondoa katika usimamizi wako.

Eliakimu anawekwa kuwa mtunzaji.

²⁰Siku ile ndipo, nitakapomwita

mtumishi wangu Eliakimu, mwana wa Hilkia.

²¹Nitamvika kanzu yako, nitamfunga nao mshipi wako,

utunzaji wako nitampa, uwe mkononi mwake,

atakuwa baba yao wakaao Yerusalemu,

hata baba yao walio wa mlango wa Yuda.

²²Nitampa ufunguo wa nyumba ya Dawidi, uwe begani pake;

atakapofungua, hatakuwako awezaye kupafunga,

atakapofunga, hatakuwako awezaye kupafungua.

²³Nitampigilia kama msumari mahali pagumu,

atauwia lango wa baba yake kiti chenye utukufu.

²⁴Kwake utatundikwa utukufu wote wa mlango wa baba yake;

miche na machipukizi na vyombo vyote vidogo,

kuanzia vikombekombe kufikisha mitungitungi yote.

²⁵Ndivyo, asemavyo Bwana Mwenye vikosi:

Msumari uliokuwa umepigiliwa mahali pagumu

siku ile uvunjike, utajipinda,

uanguke chini, nao mzigo ulioangikwa kwake utaanguka,

kwani Bwana amevisema.