Mapatilizo ya dunia yote nzima.

¹Tazameni, Bwana anaondoa watu katika nchi, iwe peke yake!

Anaiumbua umbo lake na kuwatawanya wanaokaa huku.

²Wote watakuwa sawa: watu na mtambikaji,

mtumwa na mabwana wake, kijakazi na bibi yake,

anunuaye na auzaye, akopeshaye na akopaye,

mwenye kudai na mwenye kudaiwa.

³Kweli nchi itaondolewa watu kabisa,

nazo mali zitapokonywa,

kwani Bwana amelisema neno hilo.

⁴Nchi imesikitika, maana imenyauka,

ulimwengu wote umefifia, maana umenyauka,

nao walio wakuu wa watu katika nchi wamefifia.

⁵Chini yao wakaao huku nchi imechafuliwa,

kwani wameyapita Maonyo, hawakuyafuata maongozi,

wakalivunja Agano la kale na kale.

⁶Kwa sababu hii apizo limeila nchi;

nao wakaao huku wanalipishwa manza, walizozikora;

kwa sababu hii waikaao nchi wameunguzwa,

watu waliosalia ni wachache tu.

⁷Mvinyo mbichi zimesikitika, mizabibu imefifia,

wote waliokuwa na furaha mioyoni hupiga kite.

⁸Patu zilizofurahisha hunyamaza,

makelele yao wapigao vigelegele yamekoma,

nayo mazeze yaliyofurahisha hunyamaza.

⁹Hawanywi tena mvinyo na kuiimbia,

kileo cha sasa ni chenye uchungu kwao wanaokinywa.

¹⁰Mji umebomolewa, uko peke yake tu,

kila nyumba imefungwa, hakuna anayekuja.

¹¹Makelele ya kulilia mvinyo yanasikilika huko nje,

furaha yote imeguiwa na giza,

maana yote yaliyoifurahisha nchi yamehama.

¹²Yaliosalia mjini ni mahame tu,

nalo lango lake limevunjwavunjwa kuwa vipandepande tu.

¹³Kwani hivyo ndivyo, mambo yatakavyokuwa

katika nchi katikati ya watu,

kama yalivyo penye mavuno ya matunda ya mchekele

au penye kuokoteza, mavuno ya zabibu yakiisha.

¹⁴Hawa wanapaza sauti zao kwa kupiga vigelegele

wakiushangilia utukufu wa Bwana kuanzia baharini.

¹⁵Kwa hiyo mtukuzeni Bwana nako maawioni kwa jua,

nako kwenye visiwa vilivyoko baharini

litukuzeni Jina la Bwana Mungu wa Isiraeli!

¹⁶Toka mapeoni kwa nchi tulisikia nyimbo kwamba:

Mwongofu na apambwe!

Nikajibu kwamba: Ni mnyonge! Ni mnyonge! Nimekufa!

Wakorofi wanakorofisha,

kweli wakorofi wanakorofisha kwa ukorofi.

¹⁷Mastuko na miina na matanzi yanawangoja

ninyi mkaao katika nchi!

¹⁸Itakuwa hivi:

Atakayeyakimbia makelele ya kustusha ataanguka mwinani,

naye atakayepanda na kutoka mwinani atanaswa na tanzi,

kwani madirisha ya huko juu yatakuwa yamefunguliwa,

nayo misingi ya nchi itatetemeka.

¹⁹Nchi itavunjikavunjika,

nchi itaatukaatuka, nchi itayumbayumba.

²⁰Nchi itapepesukapepesuka kama mlevi,

itachukuliwa huko na huko kama machela,

italemewa na mapotovu yake,

itaanguka, isiweze kuinuka tena.

Utukufu wa Mungu utakaotokea Sioni.

²¹Siku ile itakuwa hivi:

Bwana atavijilia vikosi vya juu huko juu,

nao wafalme wa nchi atawajilia huku chini.

²²Watakusanywa, kama wafungwa wanavyokusanywa,

wapelekwe shimoni, wafungwe kifungoni,

tena wafunguliwe, siku nyingi zitakapopita.

²³Hapo ndipo, mwezi utakapojifunika,

ndipo, nalo jua litakapoona soni,

kwa kuwa Bwana Mwenye vikosi atakuwa yuko mfalme

mlimani kwa Sioni namo Yerusalemu,

nako mbele ya wazee wake utakuwako utukufu.