Shangilio lao waliookoka.

¹Tunao mji ulio wenye nguvu,

anatumia wokovu kuwa kuta za boma lake.

²Yafungueni malango, watu waongofu waingie,

washikao welekevu!

³Mawazo ya moyo yakiwa yamejishikiza,

utaendelea kuutengemanisha, utengemane kweli,

kwani tumekutegemea.

⁴Mtegemeeni Bwana kale na kale!

Kwani mnapokuwa naye Bwana Mungu,

mnao mwamba wa siku zote za kale na kale.

⁵Kwani amewanyenyekeza waliokaa juu mjini mwenye boma,

akawainamisha chini kabisa, mpaka akawaangusha uvumbini,

⁶wakanyagwe na miguu,

ndiyo miguu yao wakiwa na mateke yao wanyonge.

⁷Njia ya mwongofu hunyoka,

napo pa kupitia, unapomlinganyia mwongofu, huwa pamenyoka.

⁸Kweli penye maamuzi yako, Bwana, tulikungojea,

roho zetu zikalitunukia Jina lako, likumbukwe.

⁹Moyoni mwangu nilikutamani usiku,

namo rohoni mwangu ninakutafuta mapema,

kwani maamuzi yako yakiitokea nchi,

wakaao ulimwenguni hujifunza wongofu.

¹⁰Asiyekucha akihurumiwa hajifunzi wongofu.

ila katika nchi yenye mambo yanyokayo, huendelea kuyapotoa,

lakini utukufu wa Bwana hauoni.

¹¹Bwana, ijapo mkono wako utukuke, hawautazami;

na wapatwe na soni wakivitazama,

jinsi unavyouhimiza wokovu wa watu.

Moto uliowamaliza wabishi wako na uwale nao.

¹²Ila sisi, Bwana, utatupa kutengemana,

kwani yote, tuliyoyafanya sisi, ni kazi zako, ulizotutendea.

¹³Bwana Mungu wetu, kuliko wewe

hata mabwana wengine walitutawala,

lakini wewe peke yako tunakutangaza, Jina lako likumbukwe.

¹⁴Wafu hawatarudi uzimani, wala wazimu hawatainuka;

kweli ulipowajia uliwaangamiza,

ukalitowesha kumbukumbu lao lote.

¹⁵Kabila hili umeliongeza, Bwana, umeliongeza kweli,

ukalitukuza, ukaipanua mipaka yote ya nchi yake.

¹⁶Bwana, wanaposongeka wanakutokea;

ulipowapiga, ndipo, walipokuja

kukunong'onezea maneno yao ya kukuomba.

¹⁷Mwenye mimba akifikisha kuzaa

hujipinda na kulia kwa uchungu wake,

ndivyo, nasi tulivyokuwa mbele yako, Bwana.

¹⁸Tulikuwa na mimba, tukashikwa na uchungu,

lakini tulipozaa, ni upepo tu!

Hatukuipatia nchi wokovu,

wala hawakupatikana wenye kukaa ulimwenguni.

¹⁹Wafu wako watarudi uzimani,

miili yao wa kwetu waliokufa itainuka.

Amkeni, mshangilie, mlalao uvumbini!

Kwani umande utokao kwenye mianga ni umande wako,

nchi iwaweke wazimu, wapate kukaa tena.

²⁰Njoni, mlio ukoo wangu, mwingie vyumbani

na kuifunga milango yenu nyuma yenu!

Jificheni kitambo kidogo,

mpaka hayo mapatilizo makali yatakapopita!

²¹Kwani tazameni! Bwana anatoka mahali pake,

aje kuwalipisha wakaao katika nchi manza walizozikora.

Hapo ndipo, nchi itakapozifunua damu zilizomwagwa kwake,

haitawafunika tena waliouawa juu yake.