Mapatilizo ya wakuu wa ulimwengu.

¹Siku ile Bwana atatokea akishika upanga

ulio mgumu na mkubwa na wenye nguvu,

amlipishe Lewiatani, ni lile joka limkimbialo;

yeye Lewiatani, lile joka la kujizinga kabisa,

atamwua pamoja na yule nondo alioko baharini.

²Siku ile watasema: Mzabibu mzuri! Uimbieni![#Yes. 5:1.]

³Mimi Bwana ni mlinzi wake; mara kwa mara ninaunywesha;

kusudi mtu asiuharibu, ninaulinda usiku na mchana.

⁴Ukali sinao tena; kama ningeona mikunju na mibigili,

ningeipelekea vita mara moja, niichome moto yote pamoja;

⁵nao watanishika, niwalinde kwa nguvu zangu,

wataniomba, watulie kwangu,

kweli wataniomba, watulie kwangu.

⁶Siku zitakazokuja Yakobo atatia mizizi,

Isiraeli atachanua na kuzaa matunda,

waueneze ulimwengu wote hayo matunda.

⁷Je? Amewapiga, kama alivyowapiga waliowapiga?

Au wameuawa, kama walivyouawa waliowaua?

⁸Amewagombeza tu na kuwafukuza na kuwatuma, wajiendee,

akawakimbiza kwa upepo mgumu siku za kimbunga

kilichotoka maawioni kwa jua.

⁹Hivyo manza zao, wa Yakobo walizozikora,

zimefunikwa kweli,

nalo hili ndilo pato la kuwaondolea makosa yao:

mawe yote ya mahali pa kutambikia miungu wameyaponda

kuwa mavumbi kama ya mawe ya chokaa yaliyobunguliwa,

nayo mifano ya mwezi na ya jua haikusimikwa tena.

¹⁰Kwani mji uliokuwa wenye nguvu peke yake tu,

ni mahame tu pasipo watu; yalipoachwa, pakawa nyika:

ng'ombe wanalisha huko,

wanapumzika huko na kuvimaliza vijiti vyake.

¹¹Matawi yao yakiisha kukauka, huvunjwa;

wanawake wanakuja, wanayatumia kuwa kuni,

kwani sio watu wanaotambua maana.

Kwa hiyo yeye aliyewafanya hawahurumii,

muumba wao hawaonei uchungu.

¹²Siku ile Bwana atayapura masuke yote,

kuanzia kwenye lile jito kubwa kufikisha mpaka mtoni kwa Misri.

Nanyi wana wa Isiraeli, mtakusanywa mmoja kwa mmoja.

¹³Tena siku ile, baragumu kubwa litakapopigwa,

ndipo, wote waliopotelea katika nchi ya Asuri

watakapokuja pamoja nao waliotawanyika katika nchi ya Misri,

wamtambikie Bwana kwenye mlima mtakatifu wa Yerusalemu.