Wakuu wabaya wataondolewa.

¹Mtaona, Bwana aliye Bwana Mwenye vikosi

akiondoa katika Yerusalemu na katika Yuda

yote yatumikayo kuwa shikizo:

kila shikizo la vilaji na kila shikizo la maji;

²wenye nguvu nao wajuao kazi za vita,

waamuzi na wafumbuaji, waaguaji na wazee,

³wakuu wa askari na wenye macheo makubwa,

wakata mashauri na mafundi wa kazi na mafundi wa uganga.

⁴Kisha nitawapa vijana, wawe wakuu wao,

nao wenye ukorofi watawatawala;

⁵nao wenyewe watatesana waume na waume wenzao,

kila mtu na ndugu yake,

vijana watajivuna na kuwabeza wazee,

nao wanyonge watawabeza wenye utukufu.

⁶Hapo itakuwa, mtu amkamate ndugu yake,

ambaye alizaliwa naye nyumbani mwa baba yake,

amwambie: Unazo nguo bado, sharti uwe mwamuzi wetu!

Hame hili liwe mkononi mwako!

⁷Naye atajibu siku ileile na kupaza sauti: Mimi si mganga!

Humu nyumbani mwangu hamna mkate wala nguo,

msiniweke kuwa mwamuzi wenu!

⁸Kwani Yerusalemu utakuwa umejikwaa,

nayo Yuda itakuwa imeanguka,

kwa kuwa ndimi zao na kazi zao zilimpinga Bwana

na kuyachafua macho yake yenye utukufu,

⁹ukorofi wa nyuso zao ukawaumbua,

nao huyasimulia makosa yao pasipo kuyaficha

kwa hivyo, wanavyofanana nao Wasodomu.

Roho zao zitalipizwa vibaya,

walivyojifanyizia wenyewe.

¹⁰Yawazeni, ya kuwa waongofu huona mema,

kwani huyala mapato ya kazi zao!

¹¹Lakini wasiomcha Mungu huona mabaya,

kwani mikono yao iliyoyafanya, watafanyiziwa nao.

¹²Wanaowasonga walio ukoo wangu ni watoto,

nao wanawake ndio wanaowatawala.

Ninyi mlio ukoo wangu, viongozi wenu huwapoteza,

nazo njia zenu zilizowapasa kuzishika huzifisha.

¹³Bwana ameinuka kupigana,

Bwana amesimama kuyapatiliza makabila ya watu.

¹⁴Bwana atakuja kuwahukumu wazee na wakuu wao walio ukoo wake,

kwamba: Ninyi mmeilisha mizabibu yangu!

Mliyoyanyang'anya wanyonge, yamo nyumbani mwenu.

¹⁵Imekuwaje, mkiwaponda hivyo walio ukoo wangu?

Mkizirarua nyuso za wanyonge hivyo?

Ndivyo, asemavyo Bwana Mungu Mwenye vikosi.

Nao wanawake wabaya watapatilizwa.

¹⁶Bwana amesema: Kwa kuwa wanawake wa Sioni wamejikuza,

wakatembea na kunyosha shingo

na kutupia wengine macho yenye utongozi,

wakienda na kuchezacheza

na kuipigapiga mikufu ya miguu yao:

¹⁷Bwana atawauguza wanawali wa Sioni upele wa vichwani,

yeye Bwana atawavua nazo nguo za kujifunika shungi.

¹⁸Siku ile Bwana atayaondoa mapambo kwao:

vikuku na mifano ya jua vipajini nayo manyamwezi shingoni,

¹⁹mapete masikioni na mikufu mikononi na mabuibui nyusoni;

²⁰hata miharuma vichwani na mikufu miguuni na mikanda viunoni

na vichupa vya marashi vifuani na hirizi zote miilini po pote,

²¹nazo pete vidoleni na vipini puani,

²²tena nguo za sikukuu, kama marinda na kanga na vijamanda,

²³hata vioo na fulana za hariri na vilemba na kaya.

²⁴Hivyo penye manukato mazuri utakuwa mnuko wa kuoza,

penye mikanda watapata kamba tu,

penye misuko ya nywele patakuwa na vipara,

penye zile nguo za urembo watajivika magunia,

maumbufu matupu yatapashika mahali pa uzuri.

²⁵Waume wenu watauana kwa panga,

vijana wenu wenye nguvu watamalizika vitani.

²⁶Kwa hiyo malango yake yatapiga kite kwa kusikitika,

nao wenyewe watakaa uvumbini kwa kuwa peke yao tu.