Wamisri hawaokoi, ila Bwana peke yake.

¹Yatawapata washukao kwenda Misri kutafuta msaada,

wakijishikiza kwa farasi,

wakaegemea magari, kwamba ni mengi,

hata wapanda farasi, kwamba ni wenye nguvu sana,

lakini hawakumtazamia Mtakatifu wa Isiraeli,

Bwana hawakumtafuta.

²Naye ni mwenye werevu wa kweli; kwa hiyo analeta kibaya,

nayo maneno yake hayaondoi:

nyumba zao wafanyao mabaya ataziinukia,

vilevile msaada wao wafanyao maovu.

³Misri ndio watu tu, sio Mungu;

farasi wao ndio nyama, sio roho.

Bwana akiukunjua mkono wake,

ndipo, huyo mwenye kusaidia anapojikwaa,

ndipo, naye mwenye kusaidiwa anapoanguka,

wakaanguka wote pamoja.

⁴Kwani hivi ndivyo, Bwana alivyoniambia:

Itakuwa kama simba au mwana wa simba,

akikamata kondoo na kunguruma;

kisha wachungaji wakiitana wengi, wamnyang'anye,

hazistukii sauti zao, wala hatishiki kwa makelele yao;

ndivyo, Bwana Mwenye vikosi atakavyoshuka kupiga vita,

mlimani kwa Sioni nako kwenye kilima chake.

⁵Bwana Mwenye vikosi ataukingia Yerusalemu

kama ndege warukao,

kwa kukinga atawaponya, kwa kuwapita atawakomboa.

⁶Rudini kwake yeye, mliyemwacha kabisa,

ninyi wana wa Isiraeli!

⁷Kwani siku ile kila mtu atavikataa

vinyago vyake vya fedha na vinyago vyake vya dhahabu,

mlivyojitengenezea kwa mikono yenu, vikawakosesha.

⁸Ndipo, Waasuri watakapouawa kwa panga zisizo za waume,

kweli panga zitawala, lakini sizo za watu;

hizo panga watazikimbia,

nao vijana wao watakuwa watumwa.

⁹Naye aliyekuwa mwamba wao atakimbia kwa woga,

nao walio wakuu wao watazimia kwa kuona bendera.

Ndivyo, asemavyo Bwana alioko Sioni na moto wake

alioko na jiko lake huko Yerusalemu.