Mungu anawaokoa walio ukoo wake.

¹Hivi ndivyo, anavyosema Bwana aliyekuumba, Yakobo,

aliyekutengeneza, Isiraeli:

Sasa usiogope! Kwani nimekukomboa,

nimekuita kwa jina lako, ndiwe wangu!

²Utakapopita majini, mimi niko pamoja na wewe;

utakapopita katika majito, hayatakutosa;

utakapopita motoni hutachomwa,

wala ndimi za moto hazitakuunguza.

³Kwani mimi Bwana Mungu wako, Mtakatifu wa Isiraeli,

mimi mwokozi wako,

nimetoa Misri kuwa makombozi yako,

nikatoa Nubi na Seba mahali pako.

⁴Kwa kuwa uliwaziwa machoni pangu kuwa mali,

umepata utukufu, nikakupenda.

Kwa hiyo nimetoa watu, nikukomboe,

hata makabila mazima, niikomboe roho yako.

⁵Usiogope! Kwani mimi niko pamoja na wewe;

walio uzao wako nitawaleta na kuwatoa maawioni kwa jua,

nitawakusanya na kuwatoa nako machweoni kwa jua.

⁶Nitauambia upepo wa kaskazini: Watoe!

nao upepo wa kusini: Usiwazuie!

Walete wanangu wa kiume na kuwatoa mbali

nao wanangu wa kike na kuwatoa mapeoni kwa nchi,

⁷wao wote waitwao kwa Jina langu!

Ndio, niliowaumba, nijipatie utukufu,

ndio, niliowatengeneza na kuwafanya.

⁸Watokezeni watu walio vipofu! Tena macho wanayo.

Nao walio viziwi! Tena masikio wanayo.

⁹Wamizimu wote na wakusanyike pamoja,

makabila ya watu na yakutane;

kwao yuko nani aliyetangaza kama hayo?

Yuko nani aliyetuambia yale ya mbele?

Na watoe mashahidi, wapate kushinda shaurini,

watu wayasikie, kisha waseme: Ni kweli!

¹⁰Ninyi m mashahidi wangu! ndivyo, asemavyo Bwana,

u mtumishi wangu, niliyekuchagua kwamba:

Mjue, mpate kunitegemea, tena mtambue, ya kuwa mimi ndiye!

Mbele yangu hakufanyika Mungu,

hata nyuma yangu hatakuwa.

¹¹Mimi ndimi Bwana, pasipo mimi hakuna mwokozi.[#Yes. 44:6; 5 Mose 32:39.]

¹²Mimi nimeyatangaza, nikatengeneza wokovu,

nikaujulisha, mkingali hamna mungu mgeni kwenu;

nanyi m mashahidi wangu, nami ndimi Mungu!

ndivyo, asemavyo Bwana.

¹³Tena tangu leo nitakuwa yeye niliyekuwa,

hakuna aopoaye mkononi mwangu;

nikitaka kufanya kitu, yuko nani atakayekizuia?

¹⁴Hivi ndivyo, anavyosema Bwana, mkombozi wenu,

aliye Mtakatifu wa Isiraeli:

Kwa ajili yenu nilituma watu kwenda Babeli,

niwakimbize wote pia, washuke mtoni,

nao Wakasidi na wakimbie katika vyombo vyao,

walivyovipigia shangwe.

¹⁵Mimi Bwana ndimi Mtakatifu wenu,

mimi niliyemwumba Isiraeli ndimi mfalme wenu.

¹⁶Hivi ndivyo, anavyosema Bwana awekaye njia baharini,

hata mapito katika maji yenye nguvu,

¹⁷atokezaye magari na farasi, vikosi na wakuu pamoja:

Mara wataanguka, wasiinuke tena,

watazimia, kama utambi unavyozimika.

¹⁸Msiyakumbuke yaliyoko mbele,

wala msiyatambue yaliyopita kale!

¹⁹Tazameni! Ninafanya mapya, nayo yameanza kuchipuka!

Nanyi hamjayaona bado?

Hata nyikani ninatoa njia, nako jangwani majito.

²⁰Nyama wa porini watanitukuza, mbwa wa mwitu na mbuni,

kwa kuwa nimetoa maji nyikani na majito jangwani,

niwanyweshe wao, niliowachagua, wawe ukoo wangu.

²¹Hao watu, niliojitengenezea, watayasimulia na kushangilia.[#1 Petr. 2:9.]

²²Nawe Yakobo, hukuniita mimi,

nawe Isiraeli, hukujichokesha kwa ajili yangu.

²³Hukuniletea wana kondoo wako kuwa wa kunitambikia,

wala hukuniheshimu na kunitolea vipaji vya tambiko.

Nami sikukusumbua, unipatie matunzo,

wala sikukuchokesha na kutaka uvumba kwako.

²⁴Hukuninunulia vipande vya kichiri na kutoa fedha zako,

wala hukuninywesha mafuta ya ng'ombe zako za tambiko.

Ila ulinisumbua kwa makosa yako,

ukanichokesha kwa manza zako, ulizozikora.

²⁵Mimi ninayafuta mapotovu yako

kwa ajili yangu mimi,

nayo makosa yako sitayakumbuka tena.

²⁶Nikumbushe, tubishane!

Nawe yaseme yako, upate kushinda humu shaurini!

²⁷Baba yako wa kwanza alikosa naye,

nao wasemaji wako walinitengua.

²⁸Ndipo, nilipowatia mwiko wakuu wa Patakatifu,

nikamtoa Yakobo kuwa wa kuapizwa

naye Isiraeli kuwa wa kufyozwa.