Mfalme Kiro ni chombo cha Bwana.

¹Hivi ndivyo, Bwana anavyomwambia Kiro, aliyempaka mafuta:

Nimemshika mkono wake wa kuume,

nikanyage mbele yake mataifa mazima,

nikafungua mishipi viunoni kwa wafalme,

nikafungua mbele yake milango na malango,

yasifungike tena.

²Mimi nitakwenda mbele yako, nipalinganye pasipopitika,

nivunje milango ya shaba, nikate makomeo ya chuma.

³Nitakupa malimbiko yaliyomo gizani

nazo tunu zilizofichwa,

kusudi upate kujua, ya kuwa mimi ni Bwana,

Mungu wa Isiraeli ndiye aliyekuita kwa jina lako.

⁴Ni kwa ajili ya mtumishi wangu Yakobo

na kwa ajili ya mteule wangu Isiraeli,

nikikuita kwa jina lako na kukupa jina la macheo,

nawe ulikuwa hukunijua.

⁵Mimi ni Bwana, hakuna mwingine tena;

pasipo mimi hakuna Mungu;

nimekuvika, nawe ulikuwa hukunijua.

⁶Kwani walioko maawioni nao walioko machweoni kwa jua

ninawataka wote, wajue,

ya kuwa hakuna aliye Mungu, isipokuwa mimi,

mimi ni Bwana, hakuna mwingine tena.

⁷Natengeneza mwanga, naumba giza nayo,

nafanya utengemano, naumba ubaya nao,

mimi Bwana ndiye ayafanyaye hayo yote.

⁸Ninyi mbingu, nyesheni huko juu,

nanyi mawingu umimineni wongofu,

nchi ifunguliwe, ijae wokovu, ioteshe wongofu nao;

mimi Bwana ndiye aliyeiumba.

⁹Yatampata ambishiaye mfinyanzi wake,

naye ni kigae tu kwenye vigae wenziwe vya udongo!

Je? Udongo unaweza kumwambia mfinyanzi: Unafanya nini?

Au kiko kiumbe chako kiwezacho kukuambia: Hana mikono?

¹⁰Yatampata amwambiaye baba yake:

Watoto unawazalia nini?

au amwambiaye mama yake: Mimba unazipatia nini?

¹¹Hivi ndivyo, anavyosema Bwana, Mtakatifu wa Isiraeli,

yeye aliyemtengeneza asema: Niulizeni yatakayokuja!

Niagizieni nayo mambo ya watoto wangu!

Kwani ndio kazi za mikono yangu.

¹²Mimi nilifanya nchi, nikawaumba watu waikaao;

mikono yangu mimi iliziwamba mbingu,

navyo vikosi vyao vyote niliviagiza, vitokee.

¹³Mimi nimemwamsha naye yeye (Kiro) kwa hivyo, nilivyo mwongofu,

nazo njia zake zote na nizinyoshe.

Yeye ndiye atakayeujenga mji wangu,

nao watu wangu waliotekwa atawafungua, wajiendee;

lakini havitakuwa kwa makombozi

wala kwa fedha za kupenyezewa.

Ndivyo, Bwana Mwenye vikosi anavyosema.

¹⁴Hivi ndivyo, Bwana anavyosema:

Wamisri na mali zao, walizozisumbukia,

nao Wanubi na mapato yao, waliyoyachuuzia,

nao Waseba, wale watu warefu, watakufikia, wawe wako;

wakikuangukia na kukulalamikia,

watakwenda nyuma yako wakiwa wamejifunga mapingu,

kwani kwako yuko Mungu,

hakuna mwingine tena awaye yote aliye Mungu.

¹⁵Wewe ndiwe Mungu kweli, ijapo uwe mwenye mafumbo,

u Mungu wa Isiraeli, u mwokozi.

¹⁶Wao wote pamoja watakuwa wameona soni kwa kutwezwa,

mafundi wa vinyago watakuwa wamejiendea kwa kutwezwa.

¹⁷Isiraeli atakuwa ameokolewa na Bwana,

atapata wokovu wa kale na kale,

hamtaona soni, wala hamtatwezeka

siku za kale na kale zitakazokuwa zote.

¹⁸Kwani hivi ndivyo, anavyosema Bwana aliyeziumba mbingu,

yeye Mungu, aliyeifanya nchi na kuitengeneza vema,

yeye aliyeishikiza, kwa kuwa hakuiumba, iwe tupu,

yeye aliyeitengeneza, watu waikae, yeye anasema:

Mimi ndimi Bwana, hakuna mwingine tena.

¹⁹Sikusema fichoni mahali penye giza ya nchi,

wala sikuwaambia walio uzao wa Yakobo: Nitafuteni bure!

Mimi Bwana husema yenye wongofu, hutangaza yanyokayo!

²⁰Njoni, kusanyikeni, mfike karibu,

ninyi masao ya wamizimu mliopona!

Hawajui kitu wajitwikao vinyago vya miti

kulalamikia mungu usioweza kuokoa.

²¹Semeni, leteni mashahidi! Na wapige shauri pamoja!

Yuko nani aliyeambia watu haya, wakiyasikia huko kale?

Yuko nani aliyeyatangaza tangu mwanzo?

Si mimi Bwana? Hakuna tena aliye Mungu, isipokuwa mimi.

Mungu aliye mwongofu na mwokozi hayuko pasipo mimi.

²²Nigeukieni, mwokoke, ninyi mapeo yote ya nchi!

Kwani mimi ndimi Mungu, hakuna mwingine tena.

²³Nimeapa na kujitaja mwenyewe,

neno lenye wongofu likatoka kinywani mwangu,

nalo halitarudi bure, hilo la kwamba:

Mimi wote watanipigia magoti,

ndimi zao zote zikisema kwa kuapa:

²⁴Kwake Bwana peke yake ndiko,

nilikopata wongofu na nguvu.

Sharti waje kwake na kuona soni wote waliomkasirikia.

²⁵Kwake Bwana watapata wongofu,

kisha watamshangilia wote walio wa uzao wake Isiraeli.