Mwangamizo wa Babeli.

¹Shuka, ukae mavumbini, binti Babeli uliye mwanamwali!

Kaa chini! Hakuna kiti kitukufu, mwana wa Wakasidi!

Hutaitwa tena mwanana mwenye mwili mzuri.

²Chukua jiwe la kusagia, jike na dume,

usage unga mwenyewe ukiisha kuuvua ukaya wako!

Pandisha nguo, mapaja yaoneke, ukipita mito!

³Uchi wako na ufunuliwe, nayo yakutiayo soni yaoneke!

Nitakulipisha hivyo, hakuna nitakayemhurumia.

⁴Mkombozi wetu ni Bwana Mwenye vikosi,

Jina lake ni Mtakatifu wa Isiraeli.

⁵Nyamaza kimya, uende zako gizani,

mwana wa kike wa Wakasidi!

Kwani hawatakuita tena bibi mwenye nchi za kifalme.

⁶Nilipowakasirikia walio ukoo wangu,

ndipo, nilipowachafua walio fungu langu,

nikawatia mikononi mwako,

lakini wewe hukuwahurumia,

ukawatwika nao wazee mizigo yako iliyowalemea sana.

⁷Ukasema kwamba: Kale na kale nitakuwa mfalme!

Kwa hiyo hukuyawaza hayo moyoni,

wala hukukumbuka, ya kuwa yako na mwisho.

⁸Sasa yasikie haya, wewe mcheshi uliyekaa salama,

uliyesema moyoni mwako: Ni mimi, hakuna mwingine tena!

Sitakaa ujane, wala sitakujua kuwa pasipo watoto.

⁹Tena yatakujia siku moja na kukugundua hayo mambo mawili:

kuwa pasipo watoto na kukaa ujane;

haya yatakujia yote pamoja,

ijapo mazindiko yako yawe mengi,

ijapo kugangua kwako kuwe kwenye nguvu sana.

¹⁰Ulijiegemeza kwa ubaya wako ukisema: Hakuna anayeniona.

Werevu wako na ujuzi wako ukakuponza,

ukasema moyoni mwako:

Ni mimi, hakuna mwingine tena!

¹¹Basi, mabaya yatakujia, usiyojua kuyalogoa;

teso litakuangukia, usiloweza kujizindikia.

Mara angamizo litakujia, usilolijua.

¹²Jisimamie hapo, unapogangua, panapo mazindiko yako mengi,

ambayo ulijisumbua nayo tangu ujana wako;

labda utaweza kujipatia mafaa, labda utastusha watu.

¹³Umechokeshwa na mashauri yako mengi;

sasa na watokee, wakuokoe,

wao waaguliao ya mbinguni nao wachunguzao nyota,

wao waliolinganya kila mwandamo wa mwezi upande,

yatakakotokea mabaya yatakayokujia.

¹⁴Watazameni! Wako kama makapi yaliyounguzwa na moto,

hawawezi kujiokoa wenyewe katika moto uwashikao,

hakuna makaa ya kuyaotea,

wala hakuna jiko lenye moto la kukaa hapohapo.

¹⁵Ndivyo, walivyokufanyia nao wachuuzi wako,

uliowasumbukia tangu ujana wako,

wametawanyika, kila mmoja upande wake, hakuna akuokoaye.