Waisiraeli wanaitwa kuja kumtii Mungu.

¹Yasikieni haya, ninyi wa mlango wa Yakobo! Mnajiita kwa jina la Isiraeli, mlitoka viunoni mwa Yuda, mnaapa na kulitaja Jina la Bwana, naye Mungu wa Isiraeli mnamtukuza; lakini si kwa kweli wala kwa wongofu.[#Yes. 51:1.]

²Wanajiita kwa jina la mji mtakatifu, wanajishikiza kwake Mungu wa Isiraeli, Bwana Mwenye vikosi na Jina lake.

³Yale ya mbele, niliyoyatangaza hapo kale, yalitoka kinywani mwangu, nikawaambia, myasikie; maana nitakapoyafanya, yatatimia.

⁴Kwani nimekujua, ya kuwa u mgumu, ya kuwa ukosi wako ni mshipa wa chuma, ya kuwa kipaji cha uso wako ni shaba.[#Yer. 5:3.]

⁵Nikakutangazia hapo kale, nikakuambia uyasikie, yalipokuwa hayajatimia bado, usiseme: Kinyago changu kimeyafanya! wala: Kinyago changu cha mti uliochongwa au cha shaba iliyoyeyushwa kimeyaagiza!

⁶Umeyasikia, basi, yatazame hayo yote! Mbona ninyi hamyaungami? Tangu sasa ninakuambia mapya, uyasikie, ni mambo yaliyofichwa, usiyoyajua bado.

⁷Yameumbwa sasa, si kale; mpaka leo hukuyasikia bado, usiseme: Hayo nimekwisha kuyajua.

⁸Kweli hukuyasikia, wala hukuyajua, wala masikio yako hayajazibuka, kwani nimekujua, ya kuwa u mdanganyifu, ukaitwa mpotovu tangu kuzaliwa kwako.

⁹Ni kwa ajili ya Jina langu, nikayakawilisha makali yangu kwa kwamba: Na wanishangilie, nikajizuia, nisikujie, nikakung'oa.

¹⁰Tazama! Nimekung'aza na kukuyeyusha, lakini sikukuona kuwa fedha; nikakujaribu na kukutia motoni mwenye mateso.[#Sh. 66:10.]

¹¹Kwa ajili yangu mimi nimeyafanya, Jina langu lisitiwe uchafu; maana utukufu wangu sitampa mwingine.[#Yes. 42:8.]

¹²Nisikilize, Yakobo, nawe Isiraeli, niliyekuita! Mimi ndiye! Mimi ni wa kwanza, tena mimi ni wa mwisho.[#Yes. 41:4.]

¹³Mkono wangu ndio uliozishikiza nchi, mkono wangu wa kuume ndio ulioziwamba mbingu; ninapoyaita yawayo yote, ndipo, yanapotokea.

¹⁴Kusanyikeni ninyi nyote, msikie! Kwao yuko nani aliyeyatangaza haya ya kwamba: yeye, Bwana ampendaye, ataufanyia Babeli yampendezayo, nao mkono wake utawatokea Wakasidi?[#Yes. 41:2.]

¹⁵Mimi ndimi niliyeyasema! Kisha nikamwita, nikamleta, naye na aitimize njia yake.

¹⁶Nifikieni karibu, myasikie haya! Tangu mwanzo sijasema mafichoni, tangu hapo yalipokuwapo mimi nipo!

Na sasa Bwana Mungu amenituma na kunipa roho yake.

¹⁷Ndivyo, anavyosema Bwana aliyekukomboa, aliye Mtakatifu wa Isiraeli: Mimi Bwana ndimi Mungu wako; ninakufundisha yafaayo, ninakuongoza katika njia, utakayoishika.

¹⁸Kama ungaliyaangalia maagizo yangu, utengemano wako ungalikuwa kama mto, nao wongofu wako ungalikuwa kama mawimbi ya bahari.[#5 Mose 5:29.]

¹⁹Wao wa uzao wako wangalikuwa wengi kama mchanga, nao waliotoka mwako wangalikuwa wengi kama vijiwe vya chembe yake. Majina yao hayatang'olewa hayataangamia mbele yangu.

²⁰Tokeni Babeli! Wakimbieni Wakasidi! Yatangazeni na kupiga vigelegele, yasikilike mpaka mapeoni kwa nchi, mkiyatokeza kwamba: Bwana amemkomboa mtumishi wake Yakobo![#Yes. 52:11; Yer. 51:6; 2 Kor. 6:17; Ufu. 18:4.]

²¹Hawakupata kiu, alipowapitisha majangwani, akawatolea maji miambani; alipopasua miamba, maji yakabubujika.[#2 Mose 17:6.]

²²Lakini hakuna utengemano kwo wasiomcha Mungu; ndivyo, Bwana anavyosema.[#Yes. 57:21; 66:24.]