Makosa yao ndiyo yaliyowaponza Waisiraeli.

¹Hivi ndivyo, Bwana anavyosema:

Kiko wapi cheti cha kuachana,

nilichompa mama yenu nilipomtuma kujiendea?

Au yuko nani aliyenidai, nikawauza ninyi kwake?

Tazameni: Mmeuzwa kwa ajili ya manza zenu, mlizozikora;

tena ni kwa ajili ya mapotovu yenu,

mama yenu akitumwa kujiendea.

²Ilikuwaje, nisione mtu nilipofika? Au nilipoita, asijibu mtu?

Je, Mokono wangu ulikuwa mfupi, usiweze kukomboa?

Au je? Sinazo nguvu za kuponya?

Tazameni! Kwa nguvu za makemeo yangu naikausha bahari,

nayo mito naigeuza kuwa jangwa,

samaki wao wanuke kwa kukosa maji wanapokufa kwa kiu.

³Mbingu nazivika weusi, ninapozifunika kama kwa gunia.

Mtumishi wa Bwana aleta wokovu.

⁴Bwana Mungu amenipa ulimi uliojifunza,

mpaka ukijua kuegemeza mchovu kwa kusema naye,

huniamsha kunapokucha, huliamsha sikio langu,

lisikilize, kama wenye kujifunza wanavyosikiliza.

⁵Bwana Mungu amenizibua sikio,

nami sikukataaa, wala sikurudi nyuma.

⁶Mgongo wangu nimeuelekezea wao walionipiga,

nayo mashavu yangu wao walioning'oa ndevu,

uso wangu sikuufichia wao walionitweza,

ndio wao walionitemea mate.

⁷Bwana Mungu akanisaidia, kwa hiyo sikutwezeka,

kwa hiyo nikaushupaza uso wangu kuwa kama jiwe la moto,

nikajua, ya kuwa sitaiva uso.

⁸Yuko karibu atakayenishindisha;

yuko nani atakayenigombeza? Na tutokee kusimama pamoja!

Yuko nani atakayenipeleka shaurini? Na aje, twende!

⁹Na mwone, ya kuwa Bwana Mungu ananisaidia!

Yuko nani atakayenishinda?

Na mwone, ya kuwa hawa wote watachakaa

kama nguo, ikiliwa na nondo!

¹⁰Yuko nani kwenu anayemwogopa Bwana?

Yuko nani kwenu anayeisikiliza sauti ya mtumishi wake?

Akienda gizani pasipo kumulikiwa

na aliegemee Jina la Bwana! Na ajikongojee Mungu wake!

¹¹Sasa ninyi nyote mnaowasha moto,

mwikoleze mishale ya moto,

nendeni kuunguzwa na moto wenu,

mishale, mliyoiwasha, iwachome moto!

Hayo yatatokea mkononi mwangu,

yawajie, mlazwe mahali panapoumiza.