Wokovu wa Sioni.

¹Amka! Amka! Ivae nguvu yako, Sioni!

Zivae nguo zako tukufu, Yerusalemu, ulio mji mtakatifu!

Kwani mwako hatamwingia tena

asiyetahiriwa wala mwenye uchafu.

²Yakung'ute mavumbi, kisha inuka, upate kukaa, Yerusalemu!

Yafungue mafungo yaliyopo shingoni pako,

binti Sioni, uliofungwa!

³Kwani hivi ndivyo, Bwana anavyosema: Mliuzwa bure, kwa hiyo hamtakombolewa kwa fedha.[#Yes. 50:1.]

⁴Kwani hivi ndivyo, Bwana Mungu anavyosema: Misri ndiko, walikotelemkia kwanza walio ukoo wangu, wakae huko; lakini Waasuri wamewakorofisha bure.

⁵Sasa inakuwaje? Ninapata nini hapo? ndivyo, asemavyo Bwana. Walio ukoo wangu wamechukuliwa bure, nao wanaowatawala hulia kwa furaha, tena siku zote Jina langu hutukanwa; ndivyo, asemavyo Bwana.[#Ez. 36:20.]

⁶Kwa sababu hii walio ukoo wangu na walijue Jina langu, kweli siku ile watajua, ya kuwa mimi ndimi nisemaye: Nitazameni, nipo!

⁷*Tazameni, miguu yake mpiga mbiu njema

jinsi inavyopendeza milimani,

anapotangaza utengemano,

anapopiga mbiu ya mambo mema, anapotangaza wokovu,

anapouambia Sioni: Mungu wako ni mfalme!

⁸Zisikilize sauti za walinzi wako!

Wamepaza sauti pamoja na kupiga shangwe,

kwani wanaona na macho yao, Bwana akirudi Sioni.

⁹Pigeni shangwe na kupaza sauti,

ninyi mabomoko ya Yerusalemu!

Kwani Bwana amewatuliza mioyo walio ukoo wake,

akaukomboa Yerusalemu.

¹⁰Mkono wake mtakatifu Bwana ameuvua nguo

machoni pa makabila yote ya watu,

mapeo yote ya nchi yauone wokovu wa Mungu wetu.*

¹¹Ondokeni! Ondokeni! Tokeni hapa! Msiguse yenye uchafu!

Tokeni humu kati! Jitakaseni, ninyi

mnaovichukua vyombo vya Bwana!

¹²Kwani hamtatoka upesiupesi,

wala hamtakwenda na kukimbia,

kwani atakayewaongoza ni Bwana,

naye atakayewakusanya nyuma ni Mungu wa Isiraeli.

¹³Mtazameni mtumishi wangu,

jinsi atakavyoendelea kwa welekevu:

atatukuka na kukwezwa, awe mkuu kabisa!

¹⁴Kama wengi walivyokustuka, watamstuka naye:

kwa kuwa walipomtazama alikuwa amenyongeka kuliko watu,

nalo umbo lake halikuwa kama la wana wa watu;

¹⁵ndivyo, atakavyoshangaza makabila mengi ya watu,

nao wafalme wafumbe vinywa vyao kwa ajili yake yeye;

kwani watakaomwona ndio wasioambiwa Neno lake,

nao wasiolisikia watalijua maana.