Maaagano mapya, Mungu anayouwekea Sioni.

¹Shangilia, wewe uliye mgumba, usiyezaa!

Jichekelee na kupaza sauti, wewe usiyeona uchungu wa kuzaa!

Kwani wana wake yule aliye peke yake ni wengi

kuliko wana wake yule aliye na mumewe; ndivyo, Bwana anavyosema.

²Papanue mahali pa hema lako!

Nazo nguo za hema za makao yako

na waziwambe na kuzivuta! Usiwazuie!

Kamba za hema ziongeze, ziwe ndefu!

Mambo zake zipigilie, zishike vema!

³Kwani utazieneza pande za kuumeni nazo za kushotoni,

nao wazao wako watatwaa makabila ya watu,

wakae katika mahame ya miji yao.

⁴Usiogope! Kwani hutapatwa na soni,

wala hutaiva uso, kwani hutadanganyika,

kwa kuwa utazisahau soni, ulizoziona ulpokuwa kijana,

nayo matusi, uliyotukanwa ulipokuwa mjane, hutayakumbuka.

⁵Kwani mumeo ni yeye aliyekufanya,

Bwana Mwenye vikosi ni Jina lake,

naye mkombozi wako ni Mtakatifu wa Isiraeli

aitwaye Mungu wa nchi zote.

⁶Kwani ulipokuwa mwanamke aliyeachwa,

aliyesikitika rohoni, Bwana alikuita.

Naye mke wa ujana anakataliwaje?

Ndivyo, Mungu wako anavyosema.

⁷Kweli kitambo kidogo nimekuacha,

lakini nitakupokea tena kwa huruma kubwa.

⁸Makali yalipofurika,

nimeuficha uso wangu punde kidogo, usiuone,

lakini kwa upole ulio wa kale na kale nitakuhurumia;

ndivyo, Bwana aliye mkombozi wako anavyosema.

⁹Hayo yatakuwa, kama yalivyokuwa katika mafuriko ya Noa,

nikaapa: Mafuriko ya Noa hayataididimiza nchi tena;

vivyo hivyo nimeapa sasa kwamba:

Sitakutolea makali tena, wala sitakukaripia.

¹⁰Ijapo milima iondoke,

ijapo navyo vilima vitikisike,

upole wangu hautaondoka kwako,

wala agano la utengemano wangu halitatikisika;

ndivyo, Bwana akuhurumiaye anavyosema.

¹¹Kweli umenyongeka kwa kutikiswa na upepo mkali,

hukutulizwa moyo!

Lakini na uone, mimi ninavyokujenga

na kuyaweka mawe yako katika udongo wenye wanja

na kuitengeneza misingi yako kwa mawe ya safiro.

¹²Minara yako nitaijenga kwa mawe ya yaspi,

nayo malango yako kwa mawe yamulikayo,

nalo boma lako zima kwa mawe ya vito vizuri.

¹³Watoto wako wote watakuwa wamefundishwa na Bwana,

hivyo watoto wako watakuwa wametengemana kabisa.

¹⁴Wongofu wao utakuwa nguvu zako;

kwa hiyo jitenge na ukorofi!

Kwani hakuna kitakachokuogopesha.

Acha kustuka! Kwani hakuna tisho litakalokufikia.

¹⁵Kama wanakujia, si kwa kuagizwa na mimi;

kwa hiyo yuko nani atakayekujia, akupige?

Hapo atakapopigana na wewe ataanguka.

¹⁶Tazameni! Mimi nimeumba mafundi

wanaowakisha moto wa makaa,

watengeneze mata ya kufanyia kazi zao;

tena mimi ndiye niliyeumba nao waangamizi wa kuyavunja.

¹⁷Hakuna mata yatakayozimaliza kazi zao

yakiwa yametengenezwa ya kukuumiza,

nao kila ulimi utakaokuinukia shaurini

utashinda na kuupatilizia mabaya;

hilo ndilo fungu, watumishi wake Bwana watakalolitwaa,

hilo ndilo pato la wongofu wao, nitakalowapatia;

ndivyo, asemavyo Bwana.