Watakaoyapata magawio ya Agano Jipya.

¹Hivi ndivyo, Bwana anavyosema:

Yaangalieni yapasayo, myafanye yaongokayo!

Kwani wokovu wangu uko karibu, utokee,

nao wongofu wangu na ufunuliwe.

²Mwenye shangwe ni mtu atakayeyafanya

naye mwana wa mtu atakayeyashika,

anayeziangalia siku za mapumziko, asizichafue,

anayeiangalia mikono yake, isifanye kibaya cho chote.

³Naye mwana wa nchi ngeni aliyeandamana na Bwana asiseme:

Bwana atanitenga kabisa kwao walio ukoo wake!

Wala aliyekatazwa kuzaa asiseme: Nitazameni, mimi ni mti mkavu!

⁴Kwani hivi ndivyo, Bwana anavyosema:

Waume wasiozaa kama wanazingalia siku zangu za mapumziko,

kama wanayachagua yanipendezayo,

walishike sana Agano langu,

⁵nitawapa nyumbani mwangu na bomani kwangu mahali,

ndipo majina yao yakae,

napo patakuwa pema kuliko pengine

penye wana wa kiume na wa kike;

kweli nitawapa majina ya kale na kale yasiyong'oleka.

⁶Nao wana wa nchi ngeni walioandama na Bwana, wamtumikie,

walipende Jina lake Bwana, wawe watumishi wake,

wote waziangaliao siku zake za mapumziko,

wasizichafue, walishike Agano lake,

⁷hawa nitawapeleka kwenye mlima wangu mtakatifu,

niwafurahishe Nyumbani mwangu mwa kuombea,

nazo ng'ombe zao za tambiko

na vipaji vyao vingine vya tambiko vitanipendeza

vitakapotolewa mezani pangu pa kunitambikia,

kwani Nyumba yangu itaitwa nyumba ya kuombea

kwao makabila yote ya watu.

⁸Ndivyo, asemavyo Bwana Mungu

anayewakusanya Waisiraeli waliotawanyika:

Wako wengine wa kwao, nitakaowakusanya,

niwatie kwao waliokusanywa.

Mapatilizo ya wachungaji wabaya.

⁹Ninyi nyama wa porini nyote,

nanyi nyama wa mwituni, nyote njoni, mle!

¹⁰Walinzi wa watu wangu ni vipofu wote, hawajui kitu;

wote ni mbwa mabubu wasioweza kulia,

hulala na kuota ndoto, hupenda kupumzika tu.

¹¹Tena ni mbwa walafi wasiojua kushiba;

hawa walio wachungaji hawajui kitu,

wala hawatambui maana,

wote wamezishika njia zao,

kila hutaka kupata tu, hakuna asiye hivyo.

¹²Husema; Njoni, nichukue mvinyo,

tunywe, hata tutakapolewa!

Vivyo hivyo itakuwa nayo siku ya kesho,

iwe sikukuu kabisa kupita cheo.