¹Mwongofu akiangamia,

hakuna aumiaye moyoni;

wapole wakiondolewa,

hakuna ayatambuaye,

ya kuwa mwongofu huondolewa, ubaya ulipo.

²Nao huingia kwenye utengemano,

hupumzika hapo, wanapolala wao

waliozifuata njia zao zinyokazo.

Kuhangaika kwao wasiomcha Mungu.

³Nanyi karibuni hapa, mlio wana wa mwaguaji wa kike!

Mlio uzao wa mvunja unyumba na mwanamke mgoni!

⁴Yuko nani, mnayemcheka?

Yuko nani, mnayemwasamia vinywa na kutoa ndimi?

Je? Ninyi ham wana wa upotovu na mazao ya uwongo?

⁵Mnaingiwa na tamaa chini ya mitamba

napo chini ya kila mti wenye majani meusi,

mnachinja watoto mitoni kwenye mapango ya miamba.

⁶Mawe ya mtoni yatelezayo na fungu lako,

hayo ndiyo, unayoyatumia kuwa kura yako;

nayo huyamwagia vinywaji vya tambiko,

ukayatolea hata vilaji vya tambiko.

Sasa je? Hayo niyanyamazie tu?

⁷Kwenye mlima mrefu juu kileleni

hujitandikia pako pa kulalia,

ukipanda huko kuchinja ng'ombe za tambiko.

⁸Kwa kuniacha mimi unakiweka kinyago chako cha nyumbani

nyuma ya mlango kwenye miimo;

kisha ukakifunua kilalo chako, ukakipanda,

ukakipanua, ukajichagulia mmoja wao,

ukapenda kulala nao, ulipoona mkono uliokupungia.

⁹Ukasafiri kumwendea mfalme

ukichukua mafuta ya kukipaka na manukato yako mengi,

ukatuma wajumbe wako kwenda katika nchi za mbali,

ukawaendesha hata kushuka kuzimuni.

¹⁰Ukachoka kwa njia zako nyingi,

lakini hukusema: Tamaa zimekatika;

ulipoona mkononi mwako, ya kuwa nguvu zimo bado,

basi, hukulegea.

¹¹Ni kwa ajili ya nani ukitishika,

ukamwogopa, ukafanya ya uwongo?

Lakini mimi hukunikumbuka, hukuniweka moyoni mwako.

Imekuwaje? Sivyo hivyo:

kwa kuwa mimi nimenyamaza tangu kale, hukuniogopa?

¹²Nami na nitangaze, wongofu wako ulivyo,

lakini viumbe vyako havitakufalia kitu.

¹³Utakapolia, na vikuponye vile vyote, ulivyovikusanya!

Lakini hivyo upepo utavichukua, pumzi tu itaviondoa.

Naye anikimbiliaye ataitwaa nchi,

nao mlima wangu mtakatifu ataupata kuwa wake.

Wajutao wataokoka.

¹⁴Amesema: Chimbeni! Chimbeni! Itengenezeni njia!

Yaondoeni makwazo njiani kwao walio ukoo wangu!

¹⁵Kwani hivi ndivyo, anavyosema atukukaye, Alioko huko juu,

akaaye kale na kale,

aitwaye jina lake Mtakatifu:

Ninakaa hapa juu patakatifu,

tena kwao wapondekao na kunyenyekea rohoni,

nizirudishe uzimani roho zao wanyenyekevu,

niirudishe uzimani nayo mioyo yao wapondekao.

¹⁶Kwani sitagomba kale na kale,

wala sitakasirika siku zote,

roho zao zisizimie mbele yangu

pamoja nao wenye pumzi, niliowafanya mimi.

¹⁷Ubaya wa choyo chao niliukasirikia,

nikawapiga nikijificha kwa kuwa na makali,

nao wakajiendea na kuniacha,

wakashika njia za kuipendeza mioyo yao.

¹⁸Nikaziona hizo njia zao,

kwa hiyo nitawaponya na kuwaongoza,

niwalipe na kuwatuliza mioyo

wao na wenzao, waliowasikitikia.

¹⁹Na niumbe mazao ya midomo

itakayotangaza utengemano kwamba:

Utengemano utawajia walioko mbali nao walioko karibu!

Ndivyo, anavyosema Bwana: Kweli nitawaponya.

²⁰Lakini wasiomcha Mungu hufanana na bahari ichafukayo,

isiyoweza kutulia kamwe,

mawimbi yake hayakomi kutoa machafu na takataka.

²¹Hakuna utengemano kwao wasiomcha Mungu;

ndivyo, anavyosema Mungu wangu.