Utukufu wa Sioni.

¹*Inuka uangazike!

Kwani mwanga wako unakuja,

nao utukufu wa Bwana umekuzukia.

²Kwani tunapotazama, giza linaifunika nchi,

mawingu meusi yanayafunika makabila ya watu,

lakini wewe, Bwana anakuzukia,

nao utukufu wake unaonekana juu yako.

³Wamizimu wataujia mwanga wako,

nao wafalme wataujia mmuliko uliozuka kwako.

⁴Yainue macho yako, utazame po pote!

Hao wote wamekusanyika, waje kwako;

wanao wa kiume watakuja, wakitoka mbali,

wanao wa kike wataletwa na kubebwa.

⁵Utakapowaona utachangamka,

nao moyo wako utapigapiga, upanuke,

kwani mafuriko ya bahari yatageuka, yaje kwako,

nayo mapato ya wamizimu yataingia kwako.

⁶Makundi ya ngamia yatakufunika,

hata vijana wa ngamia wa Midiani na wa Efa,

wote watatoka Saba, waje kwako,

wakichukua dhahabu na uvumba,

nao watamtangaza Bwana na kumshangilia.*

⁷Makundi yote ya Kedari,

yale ya mbuzi na ya kondoo yatakusanyika kwako,

madume ya Nebayoti utayatumia ya tambiko,

yatanipendeza juu ya meza ya kunitambikia;

ndivyo, nitakavyoitukuza Nyumba ya utukufu wangu.

⁸Hao ni wa nani wanaoruka kama mawingu

au kama hua wanaoyarukia matundu yao?

⁹Kwani visiwa vinaningojea,

nazo merikebu za Tarsisi zitakuwa za kwanza

za kuwaleta wanao toka nchi za mbali;

fedha zao na dhahabu zao wanazo

za kulitolea Jina la Bwana Mungu wako,

kwa kuwa yeye aliye Mtakatifu wa Isiraeli amekupa utukufu.

¹⁰Wana wa nchi ngeni watalijenga boma lako,

nao wafalme wao watakutumikia,

kwani nilipokuchafukia nilikupiga,

tena nilipopendezwa nawe nimekuhurumia.

¹¹Malango yako yatakuwa wazi siku zote,

hayatafungwa mchana wala usiku,

wakuletee mapato ya wamizimu,

nao wafalme wao watajitia mumo humo.

¹²Kwani kila taifa na kila nchi ya kifalme

itakayokataa kukutumikia itaangamia,

nao watu wao watatoweka kabisa.

¹³Utukufu wa Libanoni utakuja kwako,

mivinje na mitamba na mizambarau yote pamoja

iwe mapambo ya mahali pangu patakatifu,

maana mahali, miguu yangu itakapopakanyaga,

nitapapatia marembo.

¹⁴Nao wana wao waliokutesa

watakuja kwako na kuinama chini,

nao wote waliokutukana

watakuangukia penye nyayo za miguu yako,

watakuita mji wa Bwana,

Sioni wa Mtakatifu wa Isiraeli.

¹⁵Kwa sababu ulikuwa umeachwa, ukachukizwa,

watu wakakataa kupitia kwako,

kwa hiyo nitakuweka kuwa mahali

pa kujivunia kale na kale,

tena kuwa wa kufurahisha vizazi na vizazi.

¹⁶Utanyonya maziwa ya mataifa mengine,

kweli vifuani kwa wafalme utanyonya,

kwani mimi Bwana ni mwokozi wako,

mkombozi wako ni yeye amtawalaye Yakobo.

¹⁷Penye shaba nitaleta dhahabu,

penye vyuma nitaleta fedha,

penye miti nitaleta shaba,

penye mawe nitaleta vyuma.

Nitaweka utengemano kuwa ukuu wako

nao wongofu kuwa ubwana wako.

¹⁸Hayatasikiwa tena makorofi katika nchi yako,

wala hayatasikilika maangamizo na mavunjiko

katika mipaka yako.

Boma lako utaliita Wokovu,

nayo malango yako utayaita Mashangilio.

Bwana mi mwanga wao walio ukoo wake.

¹⁹Halitawaka tena jua kwako kuwa mwanga wa mchana,

wala mwezi hautakumulikia tena, upate kuona,

kwani Bwana atakuwa mwanga wako kale na kale,

Mungu wako atakuwa utukufu wako.

²⁰Jua lako halitakuchwa tena,

wala mwezi wako hautakufa tena,

kwani Bwana atakuwa mwanga wako wa kale na kale,

nazo siku zako za kusikitika zitakuwa zimekwisha.

²¹Walio wa ukoo wako wote watakuwa waongofu,

watakuwa wenye nchi kale na kale,

kwa kuwa ni shamba, nililolipanda,

ni kazi ya mikono yangu, nijipatie matukuzo.

²²Aliye mdogo atageuka kuwa elfu,

naye aliye mnyonge atageuka kuwa taifa lenye nguvu.

Mimi Bwana nitayafanyiza upesi,

siku zake zitakapotimia.