Utukufu wa Sioni utakaokuwa.

¹Kwa ajili ya Sioni sitanyamaza,

kwa ajili ya Yerusalemu sitapumzika,

mpaka yaupasayo yatokee kama mwangaza,

mpaka wokovu wake uwe kama mwenge uwakao.

²Ndipo, wamizimu watakapoona yaliyokupasa,

nao wafalme wote watauona utukufu wako,

nawe utaitwa kwa jina jipya,

kinywa cha Bwana kitakalolitaja.

³Ndipo, utakapokuwa urembo wa kichwa

wenye utukufu mkononi mwa Bwana,

na kilemba cha kifalme mkononi mwa Mungu wako.

⁴Hutaambiwa tena: Umeachwa!

Wala nchi yako haitaambiwa tena: Ni pori tupu,

ila utaitwa: Hunipendeza,

nayo nchi yako itaitwa: Ameolewa,

kwani Bwana atapendezwa na wewe,

nayo nchi yako itaolewa.

⁵Kwani kama mchumba mume anavyomchukua mwali,

ndivyo, wanao watakavyokuchukua wewe,

kama mwenye ndoa anavyomfurahia mchumba wake,

ndivyo, Mungu wako atakavyokufurahia.

⁶*Bomani kwako, Yerusalemu, nimeweka walinzi juu,

mchana kutwa na usiku kucha wasinyamaze kamwe.

Ninyi mnaolitangaza Jina la Bwana, msiwe kimya!

⁷Wala msimwache Bwana kuwa kimya,

mpaka aushikize Yerusalemu tena

na kuuweka, utukuzwe katika nchi!

⁸Bwana ameapa na kuutaja mkono wake wa kuume

ulio na nguvu kwamba:

Sitazitoa tena ngano zako,

ziliwe na adui zako,

wala wana wa nchi ngeni

wasinywe tena pombe zako, ulizozisumbukia.

⁹Ila watakaozivuna ndio watakaozila, wamshukuru Bwana,

nao watakaozichuma ndio watakaozinywa

nyuani penye Patakatifu pangu.

¹⁰Piteni mlangoni, mwitengeneze njia yao

walio ukoo wetu!

Chimbeni! Ichimbeni barabara na kuyaondoa mawe!

Twekeni bendera, makabila ya watu yaione!

¹¹Angalieni! Bwana anatangaza mapeoni kwa nchi kwamba:

Mwambieni binti Sioni:

Tazama, wokovu wako unakuja!

Tazama, mshahara wake wa kulipa anao,

nayo mapato yake yako mbele yake.

¹²Nao watawaita: Ukoo mtakatifu

ulio wao waliokombolewa na Bwana,

nawe utaitwa Mji uliotafutwa, usioachwa tena.*