Bwana atawaangamiza wasiomcha.

¹Ni nani huyu anayetoka Edomu

na kuvaa nguo nyekundu za Bosira?

Ni mtukufu katika vazi lake,

anatembea na kuzionyesha nguvu zake nyingi;

anasema: Yuko nani asemaye kwa wongofu?

Ninazo njia nyingi za kuokoa.

²Mbona vazi lako ni jekundu?

Mbona nguo zako zinafanana nazo za mkamua zabibu?

³Kweli nimekamua kamulioni mimi peke yangu,

pasipokuwa na mtu mwingine,

nikawakamua kwa makali yangu,

nikawaponda kwa moto wa machafuko yangu,

damu zao zikazirukia nguo zangu,

nikayachafua mavazi yangu yote,

⁴kwani ilikuwa siku ya lipizi,

niliyoiweka moyoni mwangu,

tena umetimia mwaka wa kuwakomboa walio wangu.

⁵Nikatazama, lakini hakuna msaidiaji,

nikachungulia na kushangaa, lakini hakuna ashikizaye;

ndipo, mkono wangu uliponitumikia kuwa wa kuokoa,

nao moto wa machafuko yangu ukanishikiza.

⁶Basi, nikayoponda makabila ya watu kwa makali yangu,

nikawalevya kwa moto wa machafuko yangu

nilipozimwaga damu zao chini.

Kuzikumbuka siku za kale.

⁷*Nitawakumbusha magawio ya Bwana na kumtukuza Bwana

kwa ajili yao yote, aliyotutendea Bwana;

mema yake ni mengi, aliyoutendea mlango wa Isiraeli

kwa huruma zake aliwagawia mengi.

⁸Akasema: Kumbe hawa ndio walio ukoo wangu,

ndio wanangu, hawataongopa;

akawa mwokozi wao.

⁹Katika masongano yao yote naye alikuwa amesongeka;

ndipo, malaika aliyetoka usoni kwake alipowaokoa,

kwa kuwapenda na kwa kuwaonea uchungu

akawakomboa yeye mwenyewe,

akawaokota, akawachukua siku zote za kale.

¹⁰Lakini wakaacha kumtii,

wakaisikitisha Roho yake takatifu;

ndipo, alipogeuka kuwa adui yao,

akapigana nao mwenyewe.

¹¹Ndipo, wao walio ukoo wake

walipozikumbka siku za kale, siku za Mose,

wakasema: Yuko wapi aliyewatoa baharini

pamoja na mchungaji wa kundi lake?

¹²Kwa mkono wake wenye utukufu alimwongoza Mose

alipomshika mkono wake wa kuume,

akayatenga maji mbele yao,

ajipatie Jina la kale na kale.

¹³Akawapitisha vilindini

kama farasi nyikani, wasijikwae.

¹⁴Kama kundi linavyotelemka bondeni,

ndivyo, roho ya Bwana ilivyowapeleka pa kupumzikia.

Hivyo ndivyo, ulivyowaongoza walio ukoo wako,

ujipatie Jina lenye utukufu.

Kuomba wokovu.

¹⁵Chungulia toka mbinguni!

Tazama toka Kao lako takatifu lenye utukufu!

Wivu wako uko wapi?

Matendo yako ya nguvu yako wapi?

Huruma zako zinazovuma moyoni mwako

zimejizuia, zisifike kwangu.

¹⁶Kwani wewe ndiwe baba yetu;

kwani Aburahamu hakutujua,

wala Isiraeli hakututambua.

Wewe Bwana ndiwe baba yetu;

Mkombozi wetu ndilo jina lako la kale.*

¹⁷Mbona umetupoteza, Bwana, tukaziacha njia zako?

Mbona umeishupaza mioyo yetu, isikuogope?

Rudi kwa ajili ya watumishi wako

walio milango ya fungu lako!

¹⁸Ilikuwa kitambo kidogo tu,

watu wako watakatifu walipokuwa wenye mafungu yao,

kisha wao waliotusonga walipaponda Patakatifu pako,

¹⁹tukawa watu, usiowatawala tangu kale,

wasiolitambikia Jina lako.