Mungu atawapokea wamizimu na masao ya Waisiraeli.

¹Nimetafutwa nao wasioniuliza;

nimeonwa nao wasioninyatia.

Nimewaambia watu wasiolitambikia Jina langu:

Mimi hapa! Mimi hapa!

²Mchana kutwa naliikunjua mikono yangu

kuwaita watu wabishi

washikao njia isiyo nzuri, wayafuatao mawazo yao.

³Ndio watu wanaonikasirisha pasipo kukoma,

ijapo niwatazame,

hutambika shambani, huvukiza kwenye matofali.

⁴Hukaa makaburini, hulala usiku penye mwiko,

hula nyama za nguruwe,

namo vyomboni mwao mna mchuzi wa kibudu.

⁵Husema: Jikalie kwako, usinifikie karibu!

kwani mimi ni mwiko kwako;

hawa ndio wanaotoa moshi puani mwangu,

ndio moto uwakao mchana kutwa.

⁶Tazameni! Yameandikwa mbele yangu;

sitanyamaza, ila nitayalipiza,

kweli nitayalipiza vifuani mwao.

⁷Manza zenu, mlizozikora,

pamoja nazo za baba zenu na mzilipe,

ndivyo, Bwana anavyosema;

maana wamevukiza milimani juu,

nako vilimani juu wamenibeua.

Nami kwanza nitawapimia malipo ya matendo yao,

wayachukue vifuani mwao.

⁸Hivi ndivyo, Bwana anavyosema:

Kama watu wanavyosema fumbo la zabibu,

maji yao yakingali yamo,

kwamba: Usiziangamize! Kwani mbaraka imo,

ndivyo, nitakavyofanya kwa ajili ya watumishi wangu,

nisiwaangamize wote.

⁹Nitatokeza mzao kwake Yakobo,

nako kwake Yuda atakayekuwa mwenye milima yangu,

kusudi wao, niliowachagua, waitwae,

watumishi wangu wapate kukaa huko.

¹⁰Nako Saroni kutakuwa na malisho[#Yos. 7:26.]

ya makundi ya mbuzi na ya kondoo;

nalo bonde la Akori litakuwa pa kukalia ng'ombe

kwao walio ukoo wangu, kwa kuwa wamenitafuta.

Mapatilizo yao waliomwacha Mungu.

¹¹Lakini ninyi mliomwacha Bwana,

mkausahau mlima wangu mtakatifu,

mkamtandikia meza Mwenye kura,

naye Mwenye maaguo mkammiminia vinyweo

vilivyojaa mvinyo za tambiko,

¹²basi, ninyi nimewaagulia kuuawa kwa panga,[#Yes. 65:2; 66:4.]

nyote mpige magoti, mchinjwe,

kwa kuwa nilipowaita, hamkujibu,

niliposema, hamkusikia,

mkayafanya yaliyokuwa mabaya machoni pangu,

mkayachagua, ambayo nilikuwa sipendezwi nayo.

¹³Kweli hivi ndivyo, Bwana Mungu anavyosema:

Kwa hiyo na mwone:

Watumwa wangu watakapokula,

ninyi mtaumwa na njaa;

watumwa wangu watakapokunywa,

ninyi mtaumwa na kiu;

watumwa wangu watakapofurahi,

ninyi mtaona soni.

¹⁴Watumwa wangu watakapopiga shangwe

kwa kuwa na mema mioyoni,

ndipo, ninyi mtakapolia kwa kuumia mioyoni,

tena mtapiga makelele kwa kupondeka rohoni.

¹⁵Nayo majina yenu mtayaachilia wao, niliowachagua,

watayatumia wakitaka kuapiza na kusema:

Bwana Mungu na akuue hivyo!

Lakini watumishi wangu atawaita kwa majina mengine.

¹⁶Atakayejiombea mema katika nchi

atajiombea kwake Mungu mwenye welekevu,

atakayeapa katika nchi

ataapa na kumtaja Mungu mwenye welekevu,

kwani masongano ya kwanza yatakuwa yamesahauliwa,

kwani yatakuwa yametoweka machoni pangu.

Mbingu mpya na nchi mpya.

¹⁷*Tazameni! Mimi nitaumba

mbingu mpya na nchi mpya,

nazo za kwanza hazitakumbukwa tena,

hazitaingia mioyoni tena.

¹⁸Yafurahieni na kuyashangilia kale na kale,

nitakayoyaumba mimi!

Kwani na mwone, nikiumba Yerusalemu kuwa pa kushangilia

nao watu wake kuwa wenye furaha.

¹⁹Nami nitaushangilia Yerusalemu,

nitawafurahia walio ukoo wangu.

Mwake hamtasikilika tena sauti za vilio

wala sauti za maombolezo.*

²⁰Hatakuwamo tena mnyonyaji wa siku chache,

wala mzee asiyezimaliza siku zake;

kwani watakaokufa wakingali vijana

watakuwa wa miaka mia,

nao watakaokufa wenye miaka mia

watawaziwa kuwa wakosaji walioapizwa.

²¹Watakaojenga nyumba wataikaa,

watakaopanda mizabibu wataila matunda yao.

²²Hawatajenga, mwingine akae humo,

wala hawatapanda, mwingine ayale,

kwani siku za miti zilivyo,

ndivyo, siku zao walio ukoo wangu zitakavyokuwa,

nayo, wao niliowachagua watakayoyafanya kwa mikono yao,

watayatumia wenyewe.

²³Hawatasumbuka bure,

wala hawatazaa watoto watakaogunduliwa na kifo,

kwani watakuwa mazao yaliyobarikiwa na Bwana,

wao wenyewe nao watakaotoka miilini mwao.

²⁴*Itakuwa hivyo: Watakapokuwa hawajanililia bado,

mimi nitawaitikia;

watakapokuwa wanasema bado,

mimi nitakuwa nimesikia.

²⁵Mbwa wa mwitu na mwana kondoo watalisha pamoja,

naye simba atakula majani kama ng'ombe,

naye nyoka mavumbi yatakuwa chakula chake.

Hawatafanya mabaya, wala hawataangamizana

katika mlima wangu mtakatifu wote.*

Ndivyo, Bwana anavosema.