Wenye kumtegemea Mungu wanatulizwa mioyo.

¹Bwana akaniambia: Jitwalie ubao mkubwa, kauandike kwa kalamu ya kimtu, watu waweze kuusoma: Teka upesi! Pokonya hima!

²Nami nitachukua mashahidi welekevu, wanishuhudie, ni mtambikaji Uria na Zakaria, mwana wa Yeberekia.

³Kisha nikafika kwake mfumbuaji wa kike; akapata mimba, akazaa mwana wa kiume. Bwana akaniambia: Ita jina lake Teka upesi! Pokonya hima!

⁴Kwani kijana atakapokuwa hajajua kuita: Baba! au: Mama! watu watakuwa wameyachukua mapato ya Damasko na mateka ya Samaria, wakiyapeleka machoni pake mfalme wa Asuri.[#Yes. 7:16; 2 Fal. 15:29; 16:9.]

⁵Bwana akasema tena na mimi mara nyingine akiniambia:[#Yes. 30:15.]

⁶Kwa kuwa watu hawa wameyakataa maji ya Siloa yaendayo polepole, wakamfurahia Resini na mwana wa Remalia,

⁷kwa sababu hii wataona, Bwana akiwaletea maji makali ya jito kubwa yaliyo mengi; kwani mfalme wa Asuri atakuja na utukufu wake wote. Hapo ndipo, vijito vyote vitakapopanda kwa kuwa na maji mengi, nayo yatapita kingo zao zote.

⁸Ataiingia nchi ya Yuda kwa nguvu, maji yatafika mpaka shingoni kwa kujaa na kufurika, nayo mabawa yake yakunjukayo yataieneza nchi yako, Imanueli, ijapo iwe pana.[#Yes. 7:14.]

⁹Kasirikeni, ninyi makabila ya watu, kalegeeni kwa kituko! Sikilizeni, nyote mkaao katika nchi za mbali! Jifungeni, kisha legeeni kwa kituko![#Sh. 2.]

¹⁰Pigeni shauri, kisha livunjike! Semeni neno, kisha lisitimie! Kwa kuwa Imanueli yuko.[#Yes. 8:8.]

Watu sharti wamtegemee Mungu tu.

¹¹Kwani hivi ndivyo, Bwana alivyoniambia aliponishika mkono na kunionya, nisiifuate njia ya watu wa ukoo huu, akisema:

¹²Msiite angamizo vyote, watu wa ukoo huu wanavyoviita angamizo! Wala msiyaogope, wanayoyaogopa, wala msiyastukie!

¹³Ila mtakaseni Bwana Mwenye vikosi! Yeye ndiye, mmwogope na kumstukia![#Yes. 29:23; Mat. 10:28; 1 Petr. 3:15.]

¹⁴Hivyo atakuwa mwenye kutakasa, tena atakuwa jiwe la kujigongea na mwamba wa kujikwalia kwao milango yote miwili ya Isiraeli; nao wakaao Yerusalemu atawawia kama mtego wa tanzi.[#Yes. 28:16; Rom. 9:33; 1 Petr. 2:7-8.]

¹⁵Wengi watajikwalia papo hapo, waanguke, wachubuke; wengine watanaswa, watekwe.

¹⁶Yafunge, uliyoshuhudiwa! Kisha yatie muhuri pamoja na Maonyo machoni pao wanafunzi wangu!

¹⁷Basi, sasa nitakuwa ninamwegemea Bwana na kumngojea, maana amewaficha uso wake walio mlango wa Yakobo.

¹⁸Tazama, mimi pamoja na hawa watoto, Bwana alionipa, tunakuwa vielekezo na vioja kwao Waisiraeli; ndivyo, alivyotuwekea Bwana Mwenye vikosi akaaye mlimani kwa Sioni.[#Yes. 7:3; 8:3; Ebr. 2:13.]

¹⁹Kama wanawaambia: Watafuteni wajuao kukweza mizimu nao wapunga pepo wanaonong'ona na kusema na sauti ndogo! wajibuni: Wasimtafute Mungu wao, wamwulize? Waulizeje wafu kwa ajili yao walio hai?[#2 Fal. 1:3.]

²⁰Yarudieni Maonyo yaliyoshuhudiwa! Kweli wawezao kusema maneno kama yale hawajatokewa bado na mionzi ya jua.

²¹Hutangatanga katika nchi kwa kuumizwa na ukiwa na njaa; tena kwa kuumizwa na njaa huchafuka, amtukane mfalme wao na mungu wao na kutazama juu.[#Ufu. 16:9,11.]

²²Kisha hutazama chini tena kwa kusongeka na kukosa mwanga, kwani wamo katika giza, nalo linawaogopesha, kwani wamesukumwa kukaa katika usiku mweusi.[#Yes. 5:30.]