Mika anatengeneza kinyago.

¹Milimani kwa Efuraimu kulikuwa na mtu, jina lake Mika.[#3 Mose 5:1.]

²Huyu akamwambia mama yake: Hizo fedha 1100, ulizochukuliwa, umemwapizia mwenye kuzichukua namo masikioni mwangu, basi, hizo fedha mimi ninazo, nimezichukua mimi. Ndipo, mama yake aliposema: Ubarikiwe na Bwana, mwanangu!

³Akamrudishia mama yake hizo fedha 1100 naye mama yake akasema: Hizi fedha nimezitoa kabisa kuwa mali za Bwana, zitoke mkononi mwangu kwa ajili ya mwanangu, atengeneze kinyago cha kuchongwa, nacho kivikwe mabati ya fedha. Kwa hiyo sasa nazirudisha kwako.

⁴Alipomrudishia mama yake hizo fedha, huyu mama yake akachukua fedha 200, akampa mfua fedha, akazitumia kutengeneza kinyago cha kuchongwa kilichovikwa mabati ya fedha, kikawekwa nyumbani mwa Mika.[#Yes. 40:19.]

⁵Ndivyo, Mika alivyopata nyumba ya mungu, akatengeneza nacho kisibau cha mtambikaji kuwa kinyago cha nyumbani, kisha mmoja wao wanawe Mika akamjaza gao, akawa mtambikaji wake.[#Amu. 8:27.]

⁶Siku zile hakuwako mfalme kwao Waisiraeli, kwa hiyo kila mtu huyafanya yanyokayo machoni pake yeye.[#Amu. 18:1; 19:1; 21:25.]

⁷Kulikuwa na kijana wa Beti-Lehemu wa Yuda uliokuwa wa ukoo wa Yuda, naye alikuwa Mlawi, lakini alikuwa mgeni huko.[#Amu. 18:3.]

⁸Kisha huyu mtu akaondoka katika mji wa Beti-Lehemu wa Yuda kwenda kukaa ugenini mahali, atakapopaona; naye akafika milimani kwa Efuraimu nyumbani kwa Mika alipokuwa anajiendea tu.

⁹Mika akamwuliza: Umetoka wapi? Naye akamwambia: Mimi ni Mlawi wa Beti-Lehemu wa Yuda, nimekwenda kukaa ugenini mahali, nitakapopaona.

¹⁰Mika akamwambia: Kaa kwangu, uniwie baba na mtambikaji! Nami nitakupa fedha kumi mwaka kwa mwaka, hata nguo za kuvaa na vyakula vya kukutunza nitakupatia. Huyu Mlawi kwanza alitaka kwenda zake,

¹¹halafu ikampendeza huyu Mlawi kukaa kwa huyu mtu, kisha huyu kijana akawa kwake kama mwanawe mmoja.

¹²Mika akamjaza gao huyu Mlawi, ndipo, huyu kijana alipokuwa mtambikiaji wake, akakaa nyumbani mwa Mika.

¹³Naye Mika akasema: Sasa najua, ya kuwa Bwana atanifanyizia mema, kwa kuwa huyu Mlawi ni mtambikaji wangu.