Vinyago ni vya bure.

¹Lisikieni neno, Bwana alilowaambia ninyi wa mlango wa Isiraeli!

²Hivi ndivyo, Bwana anavyosema: Msijifundishe kuzishika njia za wamizimu! Wala vielekezo vya mbinguni msivistuke, kwa kuwa wamizimu wanavistuka!

³Kwani miiko ya watu wa kimizimu ni kitu pasipo maana; kwani hukata mti wa mwituni, mikono ya fundi ikautengeneza kwa tezo.[#Yes. 44:10-20.]

⁴Kisha huupamba kwa fedha na kwa dhahabu, akautia nguvu kwa misumari na nyundo, usitukutike.

⁵Huwa kama nguzo tu iliyofunikizwa, hausemi; sharti uchukuliwe, kwani hauendi. Msiiogope! Kwani haifanyi kibaya, wala haina nguvu ya kutupatia mema.

Utukufu ni wake Mungu.

⁶Hakuna afananaye na wewe, Bwana! Mkuu ndiwe wewe, nalo Jina lako ni kuu lenye nguvu.

⁷Yuko nani asiyepaswa na kukuogopa, uliye mfalme wa wamizimu? Inakupasa kweli, uogopwe; kwani miongoni mwa werevu wote wa kimizimu, hata katika nchi za kifalme zote hakuna afananaye na wewe.

⁸Wote pamoja ni wajinga na wapumbavu, mafundisho yao wasio kitu ndiyo mti mtupu!

⁹Mabati ya fedha yaliyopigwa nyundo huletwa toka Tarsisi, nayo ya dhahabu hutoka Ufazi, mafundi huyatengeneza, kisha mikono ya wafua dhahabu huyaseneza. Mavazi yao ni nguo za kifalme, nyeusi na nyekundu. Yote pia ni kazi za mafundi wazijuao kazi zao.

¹⁰Lakini Bwana ndiye Mungu kweli, yeye ni Mungu Mwenye uzima na mfalme wa kale na kale. Ukali wake huitetemesha nchi, wamizimu hawawezi kuyavumilia machafuko yake.

¹¹Kwa hiyo mtawaambia: Miungu isiyoziumba mbingu na nchi sharti iangamie ulimwenguni chini ya mbingu.

¹²Yeye ndiye aliyeifanya nchi kwa uwezo wake, akausimika ulimwengu kwa werevu wake wa kweli, akazitanda mbingu kwa utambuzi wake.

¹³Huvumisha maji mbinguni kwa ngurumo na kupandisha mawingu yatokayo mapeoni kwa nchi, kisha hupiga umeme kwenye mvua na kutoa upepo huko, alikouweka.[#Iy. 38:24-30; Sh. 135:7.]

¹⁴Ndipo, kila mtu anapopumbaa tu, asijue yatokako, hata kila mfua dhahabu hupatwa na soni kwa ajili ya kinyago chake, kwani alichokitengeneza ni uwongo tu, hata pumzi haimo.

¹⁵Havina maana, ni kazi ya kuchekwa tu; siku vitakapopatilizwa huangamia.

¹⁶Lakini aliye fungu lake Yakobo hafanani navyo, kwani yeye ndiye aliyeyatengeneza yote, naye Isiraeli ni ukoo uliopata fungu kwake; Bwana Mwenye vikosi ni Jina lake.[#Sh. 16:5; 5 Mose 32:9.]

Wayuda wanaunyenyekea mkono wa Mungu.

¹⁷Yakusanye yaliyo yako katika nchi hii, wewe ukaaye bomani bado!

¹⁸Kwani hivi ndivyo, Bwana anavyosema: Mtaniona mara hii, nikiwatupa kwa nguvu wakaao katika nchi hii, nitawasonga, wapate kuona!

¹⁹A, nimevunjika! Pigo langu halitapona! Nasema mwenyewe: Haya ndiyo manyonge yangu, sharti niyavumilie.[#Sh. 77:11.]

²⁰Hema langu limeharibika, nazo kamba zangu zote zimekatika; watoto wangu wametoka kwangu, hawako; hakuna atakayelipiga hema langu tena na kuziwamba nguo zangu za hema.

²¹Kwani wachungaji wangu wamepumbaa, hawakumtafuta Bwana, kwa hiyo hawakuerevuka, nalo kundi lao lote likatawanyika.

²²Sikilizeni! Sauti zinasikilika zinazokuja, ni uvumi mkubwa sana upande wa kaskazini! Wanataka kuigeuza miji ya Yuda kuwa mapori tu na makao ya mbwa wa mwitu.

²³Ninajua, Bwana, ya kuwa mtu siye anayeilinganya njia yake, wala mtu aendaye siye anayeushupaza mwenendo wake.[#Fano. 16:9; Mbiu. 9:11.]

²⁴Nipige, Bwana, mapigo yapasayo! Usinipige kwa ukali wako, usiniangamize![#Yer. 46:28; Sh. 6:1; Hab. 1:12.]

²⁵Makali yako yenye moto yamwage penye wamizimu wasiokujua, napo penye koo za watu wasiolitambikia Jina lako! Kwani wamemla Yakobo, kweli wamemla na kummaliza, nayo makao yake wameyageuza kuwa mapori tu.[#Sh. 79:6.]