Mfano wa mshipi.

¹Hivi ndivyo, Bwana alivyoniambia: Nenda kujinunulia mshipi wa amerekani, ujifunge viunoni! Lakini usiutie majini!

²Nikaununua mshipi, kama Bwana alivyoniagiza, nikajifunga viunoni.

³Neno la Bwana likanijia mara ya pili kwamba:

⁴Uchukue mshipi, ulioununua, ulio viunoni pako! Kisha inuka, uende kwenye Furati, uufiche kule katika ufa wa mwamba!

⁵Nikaenda, nikauficha kule Furati, kama Bwana alivyoniagiza.

⁶Ikawa, siku nyingi zilipopita, ndipo, Bwana aliponiambia: Inuka, uende Furati, uuchukue kule mshipi, niliokuagiza kuuficha huko.

⁷Nikaenda Furati, nikauchimbua, nikauchukua ule mshipi mahali hapo, nilipouficha; lakini nilipoutazama ule mshipi, ulikuwa umeharibika, haukufaa kitu cho chote.

⁸Ndipo, neno la Bwana liliponijia kwamba:

⁹Bwana anasema hivi: Hivi ndivyo, nitakavyoyaharibu majivuno ya Yuda nayo majivuno ya Yerusalemu yaliyo mengi.

¹⁰Watu wa ukoo huu mbaya wamekataa kuyasikia maneno yangu, wakajiendea kwa ushupavu wa mioyo yao, wakafuata miungu mingine wakiitambikia na kuiangukia; basi, watakuwa kama mshipi huu usiofaa kitu cho chote.[#Yer. 11:8.]

¹¹Kwani kama mshipi unavyoambatana na viuno vya mtu, ndivyo, nilivyowaambatanisha na mimi wote walio wa mlango wa Isiraeli nao wote walio wa mlango wa Yuda, wawe ukoo wangu wa kulikuza Jina langu, wakilishangilia na kulitukuza, lakini hawakusikia; ndivyo, asemavyo Bwana.

¹²Basi, utawaambia neno hili: Hivi ndivyo, Bwana Mungu wa Isiraeli anavyosema: Viriba vyote na vijazwe mvinyo! Wakikuuliza: Hatujui, ya kuwa viriba vyote hujazwa mvinyo?

¹³ndipo, utakapowaambia: Hivi ndivyo, Bwana anavyosema: Mtaniona, nikiwajaza ulevi wote wakaao katika nchi hii, wafalme wanaokikalia kiti cha kifalme cha Dawidi na watambikaji na wafumbuaji nao wote wakaao Yerusalemu.[#Yer. 25:15-18; Yes. 51:17.]

¹⁴Kisha nitawaponda kila mtu kwa ndugu yake, hata wababa na wana pamoja, sitawaonea uchungu, wala sitawachagulia, wala sitawahurumia, nisiwaangamize; ndivyo, asemavyo Bwana.

Kutekwa kwa Wayuda.

¹⁵Sikieni na kusikiliza vema! Msijikweze! Kwani Bwana anasema:

¹⁶Mtukuzeni Bwana Mungu wenu, akingali hajaleta giza bado, mkingali hamjajikwaa miguu yenu milimani penye giza! Maana mtangoja, pawe mwanga, naye ataugeuza kuwa kivuli kiuacho akiufunikiza mawingu meusi.

¹⁷Lakini msiposikia, roho yangu itayalilia majivuno yenu mafichoni, nayo macho yangu yatachuruzika machozi pasipo kukoma, kwa kuwa kundi la Bwana limetekwa.[#Yer. 9:1.]

¹⁸Mwambie mfalme na mama yake: Jinyenyekezeni, mkae chini! Kwani vichwani penu vilemba vya urembo vimeanguka chini![#Omb. 5:16.]

¹⁹Miji ya upande wa kusini imefungwa, tena hakuna anayeifungua, Wayuda wote wametekwa, kweli wote pia wametekwa.

²⁰Yainueni macho yenu, mwaone wanaokuja toka kaskazini! Kundi ulilopewa liko wapi, wale kondoo wako wenye utukufu?

²¹Utasemaje, akikuwekea wale kuwa wakuu wako, uliowazoeza kuwa rafiki zako wapendwa? Wao watakapokuwa wakuu, hautakushika uchungu kama wa mwanamke anayetaka kuzaa?

²²Kama unauliza moyoni mwako: Mbona haya yamenitukia? ujue: Kwa mabaya yako mengi, uliyoyafanya, nguo zako zenye mapindo marefu zimefunuliwa, hata miguu yako ikatokezwa nje kwa kukorofishwa hivyo.[#Yes. 47:2-3; Ez. 16:37.]

²³Je? Mtu mweusi anaweza kuigeuza ngozi yake? Au chui anaweza kuyaondoa madoadoa yake? Kama ndivyo, mngeweza kufanya mema nanyi mliofundishwa kufanya mabaya.[#Sh. 55:20.]

²⁴Kwa hiyo nitawatawanya kama makapi yapeperushwayo na upepo wa nyikani.

²⁵Haya ndiyo, uliyopatiwa na kura, ni fungu lako, ulilopimiwa na mimi, kwa kuwa umenisahau, ukaegemea mambo ya uwongo; ndivyo, asemavyo Bwana.

²⁶Kwa hiyo mimi nami nitazipandisha nguo zako zenye mapindo marefu na kuziweka usoni pako, yako yenye soni yaoneke.[#Yer. 13:22.]

²⁷Uzinzi wako na vilio vyako vya utongozi na uovu wako wa kuziwaza njia za ugoni za kwenda vilimani au mashambani, nimeyaona hayo matapisho yako. Yatakupata, wewe Yerusalemu, usieuliwe! Yatakuwa hivyo mpaka lini?