Wayuda hawana budi kuangamia.

¹Bwana akaniambia: Ijapo Mose na Samweli wanitokee, Roho yangu haitawaelekea wao wa ukoo huu. Waondoe usoni pangu, wajiendee![#Sh. 99:6; Ez. 14:14.]

²Kama wanakuuliza: Twende kwenda wapi? utawaambia: Hivi ndivyo, Bwana anavyosema: Kama ni kufa, nendeni kufa! Kama ni kuuawa na panga, nendeni kwenye panga! Kama ni kufa kwa njaa, nendeni kwenye njaa! Kama ni kutekwa, nendeni kutekwa![#Yer. 43:11; Zak. 11:9.]

³Nitawapatia namna nne za mapatilizo; ndivyo, asemavyo Bwana: Panga za kuwaua, mbwa wa kuwakokotakokota, ndege wa angani na nyama wa porini wa kuwala na kuwamaliza.[#Ez. 14:21.]

⁴Nitawatoa, watupwe huko na huko katika nchi zote zenye wafalme kwa ajili ya mambo yote, Manase, mwana wa Hizikia, mfalme wa Yuda, aliyoyafanya Yerusalemu.[#2 Fal. 21:11-16; 23:26.]

⁵Yuko nani atakayekuhurumia, Yerusalemu? Yuko nani atakayekulilia? Au yuko nani atakayekufikia kukuuliza, kama unakaa vema?

⁶Ndivyo, asemavyo Bwana: Wewe umenitupa, ukarudi nyuma; ndipo, nilipoukunjua mkono wangu, ukukamate, nikakumaliza, maana nilikuwa nimechoka kuona uchungu.

⁷Kwa hiyo nimewapepeta ungoni kwenye malango ya nchi hii, nikawaua watoto wao, nikawaangamiza waliokuwa ukoo wangu, lakini hawakurudi katika njia zao.[#Mat. 3:12.]

⁸Nikiwahesabu wajane wao, ni wengi kuliko mchanga wa baharini; maana mwenye kuua mchana nimemleta kwao kwa mama wenye vijana, mara nikawaangushia mastuko na mashangao.

⁹Aliyezaa wana saba akazimia kwa uchungu, akakatika roho yake, kwa kuona soni na kujifunika jua lake likachwa, mchana ungaliko bado. Nayo masao yao nitayatoa, wauawe na panga za adui zao; ndivyo, asemavyo Bwana.[#Amo. 8:9.]

Yeremia anajililia mwenyewe.

¹⁰Nilikuwa nimeapizwa, mama yangu aliponizaa! Nikawa mtu wa kugombezwa na wa kusutwa katika nchi hii yote nzima, nami sikukopesha wala sikukopa, nipate faida; nao wote huniapiza.[#Yer. 20:14.]

¹¹Bwana amesema: Nitakutia nguvu kweli, uone mema! Kweli nitakupa kuwachokesha adui, siku zikiwa mbaya kwa kusongwa.

¹²Je? Yuko awezaye kuvunja chuma? kile chuma chenye shaba kitokacho kaskazini?

¹³Lakini kwanza nitazitoa mali zenu zote na vilimbiko vyenu vyote, wakunyang'anye pasipo kulipa cho chote kwa ajili ya makosa yenu yote, mliyoyafanya katika mipaka yenu yote.

¹⁴Nitawahamisha kwenda na adui zenu katika nchi, msiyoijua; kwani moto umewashwa na makali yangu, nao unataka kuwala.

Yeremia anatulizwa.

¹⁵Bwana, wewe unanijua, nikumbuke! Unipatilizie na kunilipizia wanaonikimbiza! Usiwavumilie! Nipokee mimi! Ujue, ya kuwa ninatukanwa kwa ajili yako!

¹⁶Maneno yako yalipooneka yalikuwa chakula changu; hayo maneno yako yakaufurahisha moyo wangu na kuuchangamsha. Kwani ninakwita kwa Jina lako, Bwana uliye Mungu Mwenye vikosi.[#Ez. 3:1-3.]

¹⁷Sikukaa kwenye wafyozaji kucheka nao; kwa kushikwa na mkono wako nilikaa peke yangu, kwani walinijaza machafuko.

¹⁸Mbona maumivu yangu hayakomi? Mbona kidonda changu ni kibaya sana kwa kukataa kupona? Utaniwia kama kijito kidanganyacho au kama maji yasiyotegemeka?[#Yer. 30:12.]

¹⁹Kweli hivi ndivyo, Bwana anavyosema: Utakaporudi, ndipo, nitakapokurudisha, usimame tena usoni pangu! Nao wapaswao na macheo utakapowatoa kwao wasiofaa, ndipo, utakapokuwa kama kinywa changu, ndipo, wale watakaporudi upande wako, wewe usiporudi upande wao.

²⁰Nami nitakupa kuwawia wao wa ukoo huu boma la shaba lenye nguvu, wasikushinde wakikupelekea vita, kwani mimi niko pamoja na wewe, nikuokoe na kukuponya; ndivyo, asemavyo Bwana.[#Yer. 1:18.]

²¹Nitakuponya mikononi mwao wabaya, nitakukomboa mikononi mwao wakorofi.