Mji wa Yerusalemu utaangamia.

¹Hili ndilo neno lililotoka kwa Bwana, likamjia Yeremia, mfalme Sedekia alipomtuma Pashuri, mwana wa Malkia, na mtambikaji Sefania, mwana wa Masea, kwenda kwake kwamba:[#Yer. 29:25.]

²Mwulize Bwana kwa ajili yetu, kwani Nebukadinesari, mfalme wa Babeli, ametuletea vita. Labda Bwana atatufanyizia nasi, kama mataajabu yake yote yalivyo, akiwaondoa kwetu.

³Yeremia akawaambia: Hivi ndivyo, mmwambie Sedekia:

⁴Hivi ndivyo, Bwana Mungu wa Isiraeli anavyosema: Mtaniona, nikivirudisha vyombo vya vita vilivyo mikononi mwenu, mlivyovitumia kupiga vita na mfalme wa Babeli na Wakasidi wanaowasonga! Nitavitoa huko nje, nivilete kwenye boma, kisha nitavikusanya humu mjini katikati.

⁵Nami mwenyewe nitapigana nanyi kwa kiganja kilichofumbuka cha mkono ulio wenye nguvu kwa kuwa na makali yenye moto na machafuko makubwa.

⁶Nitawatoa wakaao humu mjini, watu hata nyama, watakufa kwa ugonjwa mbaya uuao kabisa.

⁷Ndivyo, asemavyo Bwana: Hayo yatakapokwisha, nitamtoa Sedekia, mfalme wa Yuda, pamoja na watumishi wake nao walio wa ukoo huu waliosalia humu mjini kwa ule ugonjwa mbaya na kwa panga na kwa njaa, nitawatia mikononi mwa Nebukadinesari, mfalme wa Babeli, nami mikononi mwa adui zao namo mikononi mwao wanaozitafuta roho zao, naye atawapiga kwa ukali wa upanga, hatawaonea uchungu, wala hatawachagulia, wala hatawahurumia.

⁸Nao walio wa ukoo huu utawaambia: Hivi ndivyo, Bwana anavyosema: Nitazameni! Ninalinganya machoni penu njia ya uzima na njia ya kufa.[#5 Mose 11:26.]

⁹Atakayekaa humu mjini atakufa kwa upanga na kwa njaa na kwa magonjwa mabaya. Lakini atakayetoka na kuwaangukia Wakasidi wanaowasonga atapona, nayo roho yake itakuwa pato lake.[#Yer. 38:2.]

¹⁰Kwani nimeuelekeza uso wangu kwenye mji huu, niupatie mabaya, mema siyo; utatiwa mkononi mwake mfalme wa Babeli, auteketeze kwa moto; ndivyo, asemavyo Bwana.

¹¹Nao wa mlango wa mfalme wa Yuda waambie: Lisikieni neno la Bwana!

¹²Hivi ndivyo, Bwana anavyosema: Ninyi wa mlango wa Dawidi, asubuhi pigeni mashauri, mwaponye walionyang'anywa mkiwatoa mikononi mwa wakorofi, makali yangu yasitokee kuwa moto uwakao, asipopatikana mwenye kuuzima kwa ajili ya ubaya wa matendo yenu![#Yer. 7:20; 22:3.]

¹³Ndivyo, asemavyo Bwana: Utaniona, nikikujia wewe ukaaye bondeni, uliye kama mwamba mbugani. Ninyi husema: Yuko nani atakayetushukia? Yuko nani atakayeingia katika makao yetu?

¹⁴Mimi nitawapatiliza, kama matendo yenu yalivyowapatia; ndivyo, asemavyo Bwana. Nitawasha moto mwituni kwao utakaozila nchi zote ziwazungukazo.