Wachungaji wabaya wanaapizwa.

¹Yatawapata wachungaji wanaowaangamiza na kuwatawanya kondoo, niliowapa kuwachunga! ndivyo, asemavyo Bwana.[#Ez. 13:2-16; 34; Zak. 11:5.]

²Hivi ndivyo kweli, Bwana Mungu wa Isiraeli anavyosema kwa ajili ya wachungaji. Ninyi mnaowachunga walio ukoo wangu, mmewatawanya kondoo wangu na kuwakimbiza, hamkuwaangalia; mtaniona, nikiwapatilizia ubaya wa matendo yenu; ndivyo, asemavyo Bwana.

³Nami nitawakusanya masao ya kondoo wangu na kuwatoa katika nchi zote, nilikowaendesha na kuwakimbiza, Nitawarudisha katika makao yao, wazae, wawe wengi tena.

⁴Kisha nitawawekea wachungaji, wawachunge; hawataogopa tena, wala hawatastuka, wala hawatapotea hata mmoja wao; ndivyo, asemavyo Bwana.[#Yer. 3:15.]

Mchungaji mwema atakayetokea mlangoni mwa Dawidi.

⁵Ndivyo, asemavyo Bwana: Mtaona, siku zitakapokuja, nikimwinulia Dawidi chipuko lenye wongofu, naye atakuwa mfalme ajuaye vema kutawala, maana atafanya katika nchi yaliyo sawa yaongokayo.[#Zak. 3:8; 6:12; Yes. 32:1.]

⁶Yuda ataokolewa katika siku zake, naye Isiraeli atakaa salama. Jina lake, watakalomwita, ni hili: Bwana ni wongofu wetu![#Yer. 33:16.]

⁷Ndivyo, asemavyo Bwana: Mtaona kweli, siku zikija, watakapoacha kuapa wakisema: Hivyo, Bwana alivyo Mwenye uzima aliyewatoa wana wa Isiraeli katika nchi ya Misri,[#Yer. 16:14-15.]

⁸ila wataapa wakisema: Hivyo, Bwana alivyo Mwenye uzima aliyewaleta wazao wa mlango wa Isiraeli akiwatoa katika nchi ya upande wa kaskazini na katika nchi zote, nilikowaendesha na kuwakimbiza; ndipo, watakapokaa huku katika nchi yao.

Kuwaonya wafumbuaji.

⁹Kwa wafumbuaji. Moyo wangu umevunjika kifuani mwangu, mifupa yangu yote ikatetemeka; nikawa kama mlevi au kama mtu ashindwaye na mvinyo, nilipoyasikia yaliyotoka kwake Bwana, hayo maneno yake matakatifu kwamba:

¹⁰Nchi hii imezaa wazinzi, kwa hiyo nchi hii inakaa matanga kwa kuapizwa, mbuga za nyikani zimekauka, kwa kuwa ni mabaya, wanayoyakimbilia, nayo nguvu yao siyo ifaayo.

¹¹Kwani nao wafumbuaji pamoja na watambikaji ni wapotovu, namo Nyumbani mwangu nimeuona ubaya wao; ndivyo, asemavyo Bwana.

¹²Kwa sababu hii njia yao itakuwa inateleza, penye giza watateleza na kuanguka hapohapo, kwani nitawaletea mabaya, ndio mwaka wa kupatilizwa kwao; ndivyo, asemavyo Bwana.[#Yer. 13:16; Sh. 35:6.]

¹³Hata kwa wafumbuaji wa Samaria nimeona upumbavu, wakifumbua kwa nguvu ya Baali, wakawapoteza nao walio ukoo wangu wa Isiraeli.

¹⁴Lakini kwa wafumbuaji wa Yerusalemu nimeona mastusho: huzini, huendelea na kudanganya, huitia mikono ya wabaya nguvu, wasiuache kila mtu ubaya wake, wote pia wameniwia kama Wasodomu, nao wakaao humo kama Wagomora.[#Ez. 13:22; Yes. 1:10.]

¹⁵Kwa hiyo Bwana Mwenye vikosi anasema hivyo kwa ajili ya wafumbuaji: Mtaniona, nikiwalisha majani machungu na kuwanywesha maji yenye sumu! Kwani kwa wafumbuaji wa Yerusalemu kumetoka upotovu, ukaziingia nchi zote.[#Yer. 9:15.]

¹⁶*Hivi ndivyo, Bwana Mwenye vikosi anavyosema: Msiyasikie maneno ya wafumbuaji wanaowafumbulia maneno wakiwaegemeza mambo yaliyo ya bure tu! Huyasema, waliyoyaona mioyoni mwao, hawasemi yaliyotoka kinywani mwa Bwana.[#Yer. 6:14.]

¹⁷Huwaambia wanibezao: Bwana amesema: Mtakaa na kutengemana! Kila mtu aufuataye ushupavu wa moyo wake humwambia: Hakuna kibaya kitakachowafikia![#Yer. 7:24.]

¹⁸Kwani yuko nani aliyesimama penye njama ya Bwana, akimwona au akilisikia neno lake? Yuko nani aliyeliangalia Neno lake, akilisikia?[#Yes. 40:13.]

¹⁹Mtakiona kimbunga cha Bwana, hata makali yenye moto, yakitoka kwake, nao upepo wa chamchela wenye nguvu utawaangukia vichwani wao wasiomcha Mungu.[#Yer. 30:23.]

²⁰Ukali wake Bwana hautatulia, mpaka ukiyafanya na kuyatimiza mawazo ya moyo wake; siku za mwisho mtayatambua haya.

²¹Sikuwatuma wafumbuaji hawa, nao hupiga mbio; sikuwaambia neno, nao hufumbua.[#Yer. 14:14.]

²²Kama wangalikuwa wamesimama penye njama yangu, wangeyasema maneno yangu masikioni pao walio ukoo wangu, wangewarudisha wabaya katika njia zao, wauache ubaya wa matendo yao.

²³Ndivyo asemavyo Bwana: Je? Mimi ni Mungu akaaye karibu tu? Si Mungu akaaye hata mbali?

²⁴Ndivyo, asemavyo Bwana: Kama mtu anajificha mafichoni, mimi sitamwona? Si mimi azijazaye mbingu na nchi? ndivyo, asemavyo Bwana.

²⁵Nimeyasikia, wafumbuaji waliyoyasema, wakifumbua maneno ya uwongo katika Jina langu wakisema: Nimeota! Nimeota!

²⁶Hivyo vitakuwa mpaka lini mioyoni mwao wafumbuaji wafumbuao uwongo tu, walio wafumbuaji wa udanganyifu wa mioyo yao?

²⁷Huwaza, ya kuwa watawasahaulisha walio ukoo wangu Jina langu kwa ajili ya ndoto zao, wakizisimuliana kila mtu na mwenziwe, kama baba zao walivyolisahau Jina langu kwa ajili ya Baali.

²⁸Mfumbuaji aliyeota na asimulie ndoto! Naye aliyelisikia Neno langu na aliseme Neno langu, lilivyo kweli! Kumvi na mpunga ziko na fungu gani lililo lao pamoja? ndivyo, asemavyo Bwana.

²⁹Ndivyo, asemavyo Bwana: Neno langu si kama moto au kama nyundo ipasuayo miamba?*[#Ebr. 4:12.]

³⁰Ndivyo, asemavyo Bwana: Mtaniona kweli, nikiwajia wafumbuaji, kwa kuwa wanaliiba Neno langu kila mtu kwa mwenziwe!

³¹Ndivyo, asemavyo Bwana: Mtaniona, nikiwajia wafumbuaji, kwa kuwa huzitumia ndimi zao za kusema: Asema!

³²Ndivyo, asemavyo Bwana: Mtaniona, nikiwajia wafumbuaji wa ndoto za uwongo. Huzisimulia walio ukoo wangu, wakawapoteza kwa uwongo wao na kwa mambo yao makuu, nami sikuwatuma, wala sikuwaagiza neno, nao walio wa ukoo huu hawawafalii kitu hata kidogo; ndivyo, asemavyo Bwana.[#Yer. 23:21.]

³³Kama watakuuliza walio wa ukoo huu au mfumbuaji au mtambikaji kwamba: Tamko zito la Bwana ni nini? ndipo, utakapowajibu: Hili ndilo tamko zito la Bwana, akisema: Nitawabwaga ninyi! ndivyo, asemavyo Bwana.

³⁴Lakini mfumbuaji na mtambikaji nao walio wa ukoo huu watakaolitumia neno hilo la kwamba: Tamko zito la Bwana, mtu huyo nitampatiliza pamoja na mlango wake.

³⁵Hivyo ndivyo, mtakavyoulizana mtu na mwenziwe, hata mtu na ndugu yake kwamba: Bwana amejia nini? au: Bwana amesema nini?

³⁶Tamko zito la Bwana wasilitaje tena! Kama wanalitaja, basi, kila mtu neno lake litamgeukia kuwa tamko zito, kwani ninyi huyageuza maneno ya Mungu aliye Mwenye uzima, aliye Bwana Mwenye vikosi, Mungu wetu.

³⁷Hivi ndivyo, utakavyomwuliza mfumbuaji kwamba: Bwana amejibu nini? au: Bwana amesema nini?

³⁸Lakini mkisema: Tamko zito la Bwana, basi, itakuwa hivyo, Bwana alivyosema: Kwa kuwa mnalisema neno hilo la kwamba: Tamko zito la Bwana, nami nilituma kwenu kuwakataza, msiseme: Tamko zito la Bwana!

³⁹basi, mtaniona, nikiwaacha kabisa na kuwabwaga ninyi pamoja na mji huu, niliowapa ninyi na baba zenu, mtoke usoni pangu.

⁴⁰Hivyo nitawatia soni za kale na kale na matusi ya kale na kale yasiyosahaulika.[#Yer. 20:11.]